Partia Republikane ka përshëndetur kthimin e ligjit të Pronave nga Presidenti Nishani duke theksuar se është kundër vendimeve të marra nga Kushtetuesja. Përmes një njoftimi për mediat PR shkruan se ligji u kundërshtua edhe nga shoqatat e pronarëve.
 
"Partia Republikane e mirëpret dhe e vlerëson  vendimin e marrë nga Presidenti  i  Republikës   për kthimin për rishqyrtim të  ligjit mbi pronat, të dërguar nga qeveria dhe të miratuar nga Parlamenti. Ky ligj është kundërshtuar me forcë nga shoqatat e pronarëve dhe Partia Republikane në takimin e organizuar prej Tij në muajin Tetor të këtij viti në Presidencë.

Ligji  është në kundërshtim me vendimet e marra nga Gjykata Kushtetuese, standartet e vendosura nga  Gjykata e të Drejtave të Njeriut  në Strasburg dhe Kushtetuta e Shqipërisë. Ai nuk garanton sigurinë juridike në trajtimin  e kompensimit financiar, pasi cënon parimin e barazisë ndërmjet shtetasve, duke i vendosur ata në regjime të  ndryshme shpërblimi për të njejtën lloj prone.

Harta e vlerës që pretendohet në ligj, nuk është transparente  dhe nuk  reflekton  çmimin e tregut. Në ligj hiqet e drejta e kthimit fizik të pronës, duke cënuar të drejtën e qytetarëve  të sanksionuar në nenin 41 të Kushtetutës.Partia republikane, në bashkëpunim me shoqatat e pronarëve , do të kundërshtojë këtë ligj edhe në instancat më të larta ndërkombëtare si Gjykata e Strasburgut dhe Sekretariati i Komitetit të Ministrave pranë B.E.

I bëjmë thirrje Partisë Demokratike dhe gjithë partive opozitare,  të bashkohen me inisiativën tonë, me qëllim që jo vetëm të mbështesim vendimin e Presidentit, por në bashkëpunim me shoqatat e pronarëve të  hartojmë  një ligj i cili ti japë zgjidhje reale problemit të pronave."-shkruan PR ne njoftimin e saj

Redaksia online
(s.m/shqiptarja.com)