Rama: Me ligjin special do të godasim krimin, si Italia mafien! Vullnet të hekurt për anti-KÇK-në

TIRANE-Kryeministri Edi Rama shprehet se është i vendosur me vullnet të hekurt për të vijuar luftën kundër krimit dhe terrorizmit me qëllim sekuestrimin e pasurive që kanë vendosur në mënyrë të paligjshme. E ndërsa sulmon jo vetëm PD-në por edhe analistë e komentatorë që sipas tij i kundërvihen antiKÇK-së, ai thotë se ka për të qenë shembull suksesi sikur Italia luftoi mafien.

"Jo vetëm PD po edhe plot të ashtuquajtur analistë e komentatorë po i kundërvihen antiKÇK-së, në një përçartje kolektive brenda kutisë së televizorit! Sepse për ta krimi është ushqimi i politikës e audiencave së tyre kundër qeverisë dhe mes krimit e qeverisë ata zgjedhin krimin. AntiKÇK është reagimi i duhur në kohën e duhur,kur puna e sakrificat e policisë poshtërohen nga prokurorë&gjykatës të korruptuar,të cilët janë partnerë të krimit  jo nuk dënojnë, po lirojnë vrasës e trafikantë të dënuar dhe punojnë të kapin ç’të kapin para se t’i fshijë Vetingu.

Ligji Special është frymëzuar nga dashuria për këtë vend dhe vullneti i hekurt për të shkatërruar burimet financiare të krimit, duke marrë shembull nga historitë e suksesit të vendeve si Italia e Britania e Madhe që me ligjet speciale goditën në zemër mafian apo terrorizmin.

Koha do të provojë përsëri edhe njëherë se dashuria për vendin, vullneti për ta bërë shtet modern Shqipërinë, vendosmëria për t’i rënë me kokë mureve të vjetra, do të fitojnë mbi hipokritët, dembelët e parazitët që jetojnë me llafe, gënjeshtra e broçkulla duke helmuar shqiptarët" shkruan Rama.  Dje u sekuestrua pasuria e parë nga OFL-ja, resorti, shtëpitë dhe karburanti i Hajrajve në Shijak, ndërsa sot pritet goditja e dytë.

TAG:
• edi rama
• anti kck