TIRANE - Përmes një postimi në rrjetin social Facebook Kryeministri Rama ka reaguar në lidhje me skenën e publikuar në rrjetet sociale, ku kafshët e kopshtit zoologjik Tiranë shfaqen në përleshje.

Duke e cilësuar këtë një shfaqje tragjike, Rama e konsideron ngjarjen si shtysë të zotimit për Rilindjen e Kopshtit Zoologjik brenda 2016. Rama shpreh keqardhjen edhe për komentet e Kryetarit të Bashkisë Lulzim Basha, i cili e cilëson Ramën fajtor për gjendjen.

Ndër të tjera Rama shkruan: Më vjen shumë keq për rrënimin deri në një shfaqje tragjike të shtëpisë së kafsheve të Tiranes dhe, besomëni, do të jem personalisht i angazhuar që çka ndodhi të kthehet jo vetëm në mësim, po në një zotim të mbajtur të mandatit të ri që ju do t'i jepni socialistëve e progresistëve për të qeverisur Tiranën në katër vitet e ardhshme. Me në krye një qytetar të parë që nuk do ta ketë me Tiranën të fundit në radhën e shqetësimeve të veta!


Statusi i plotë i Edi Ramës referuar ngjarjes në Kopështin Zoologjik në Tiranë
Kam marrë shumë mesazhe nga ju për skenën tragjike të publikuar këto ditë në rrjetet sociale mbi ngjarjen e rëndë të Kopshtit Zoologjik të Tiranës. Një përleshje e dëshpëruar kafshësh e organizuar nga dora e njeriut! Askund, në asnjë vend të botës e jo më të Europës, nuk mund të ndodhë që kafazet e Kopshtit Zoologjik të bëhen arenat e epsheve shtazarake të njerëzve. Mjerisht kjo ndodhi në Tiranë. Dhe i befasuar si ju të gjithë ndjeva dhimbje por ndryshe nga ju, nuk fola sepse nuk desha që reagimi im të merrej si përpjekje për të nxjerrë ndonjë përfitim politik nga brirët e demit që sulmonte kalin e gjorë. U habita që edhe këtë shfaqje kulmore të braktisjes së kahershme të detyrës, i pari i Tiranës që për katër vjet me radhë u soll si i fundit, e komentoi si faj të qeverisë e timin personalisht. Megjithatë përseri nuk fola. Dhe as tani nuk dua të flas për këtë e atë, po vetem dua t'ju siguroj të gjithëve ju se rilindja e Kopshtit Zoologjik eshte pjesë e programit tonë të ri të zhvillimit për Tiranën. Ne do t'u japim fëmijëve e familjeve të Tiranës një Kopësht Zoologjik njësoj si në Europë dhe do t'i çelim dyert e kopshtit të rilindur brenda vitit 2016. Bindja ime është se nuk na duhet një vit e gjysëm po vetëm 300 ditë pas fitores së ardhshme të 21 qershorit për t'i dhënë Tiranës Kopshtin e munguar Zoologjik, me pasuri speciesh e standarde europiane kujdestarie, por po e lë brenda 2016-ës për të qenë brenda siç i thonë! Më vjen shumë keq për rrënimin deri në një shfaqje tragjike të shtëpisë së kafshëve të Tiranes dhe, besomëni, do të jem personalisht i angazhuar që çka ndodhi të kthehet jo vetëm në mësim, po në një zotim të mbajtur të mandatit të ri që ju do t'i jepni socialistëve e progresistëve për të qeverisur Tiranën në katër vitet e ardhshme. Me në krye një qytetar të parë që nuk do ta ketë me Tiranën të fundit në radhën e shqetësimeve të veta! Edhe pak muaj dhe do t'i shpëtojmë edhe kafshët e Kopshtit Zoologjik nga pasojat e pashmangshme të një bashkie që ka braktisur detyrën ose, më saktë, që nuk ishte asnjë ditë në detyrë nga dita e parë e mandatit që po mbyllet në mënyrën më të palavdishme.

Bashkia: Kryeministri i mashtrimit nuk di të bëjë gjë tjetër veçse të bllokojë
Kryeministri që bllokoi ndërtimin e një kopështi zoologjik modern me asistencën e Shoqatës Europiane të Kopshteve Zoologjike, për të njëjtat arsye që ka bllokuar Bulevardin e Ri, Terminalin, planin urbanistik dhe dhjetëra rrugë, kopshte e çerdhe, për 11 vite si kryebashkiak nuk investoi asnjë lek në këtë kopësht. Premtimeve të Ramës iu ka dalë boja sepse ish-kryebashkiaku i betonit e kryeministri i mashtrimit nuk di të bëjë gjë tjetër veçse të bllokojë. Siç e pa dhe e dëgjoi sot mbarë Shqiperia, Edi Rama ia ka dalë të krijojë deri më sot vetëm kopshtin e krimit në zemër të pushtetit te tij korruptiv.


Redaksia online
(f.m/shqiptarja.com)