Rama në Malësi të Madhe: Këta përçarës s'meritojnë kokërr vote! Spiropali: S'rrimë peng i halleve të Meta-Berisha

Nga Malësia e Madhe Kryeministri Edi Rama tha se Berisha-Meta duan ta rikthejnë vendin mbrapa kur Shqipëria ishte një vend i kategorisë së dytë para se të vinte në pushtet PS, ndërsa sot Shqipëria është e barabartë në tryeza me më të mëdhenjtë e botës. Rama shtoi se Berisha dhe Meta u kërkojnë votën shqiptarëve për tu bërë karshillëk SHBA-ve.

 “Kurrë Shqipëria nuk ka qenë me e respektuar në sytë e botës, kurrë nuk ka qenë më e barabartë në tryezë me më të mëdhenjtë e botës. Kush do të mendonte që Shqipëria do të kishte një ulëse në Këshillin e Sigurimit, që do të drejtonte OSBE, që do të mbante  samitin, këto nuk i ka sjellë bukuria e natyrës por Shqipëria kur kemi marrë detyrën ishte një vend që trajtohej si një vend i kategorisë së dytë. Ata që ishin para nesh ulnin kokën dhe mbanin pantallonat që mos u bini para fqinjëve dhe të huajve ndërsa sot u kërkojnë votën shqiptarëve tu bëjnë karshillik Shba-ve. Çfarë tradhtie është kjo për ata që besuan në PD. Për ne nuk ka demokrat e socialist kur vjen puna për të bërë detyrën”, tha Rama.

Gjatë takimit me qytetarët në Malësinë e Madhe kryesocialisti, Edi Rama tha se gjatë viteve që PS kishte pasur në dorë këtë bashki, kanë ndodhur ndyrshime radikale. Ai tha se edhe për edhe për Shkodrën socialistët kanë bërë më shumë sesa PD kishte bërë gjatë gjithë qeverisjes së saj.

Teksa përmendi rrugët kryesore që kanë sjellë edhe shtimin e numrit të turistëve, Rama tha se brenda qytetit të Shkodrës nuk kishte shumë mundësi ndërhyrje sepse bashkia është në duart e kundërshtarëve politikë që ngrejnë pengesa në investime të ndryshme.

“Ne për Shkodrën kemi bërë më shumë se çfarë kanë bërë të gjithë ata që kanë bërë ata. Rrugën Shkodër Velipojë, rrugën në Theth, stadiumin kush e bëri, urën që lidh Velipojën me Shëngjinin po e bëjmë ne apo ata?

Të gjitha këto varen nga ne, nuk pyesim bashkinë. Ndërkohë që kam që kur kam vajtur për Shkodër për herë të parë si ministër i kulturës që kam dashur të kem mundësinë për të ribërë kafen e madhe. Sot Kafja e Madhe është gati për t’u ribërë dhe kushedi sa vite shkojnë për leje dhe budalliqe.

Shkodrën në qytet nuk kemi çfarë bëjmë fare se nuk kemi si të hyjmë aty. Është i vetmi stadium në botë që përballë tribunës vip dhe lavazhe dhe ofiçina që as nuk i prishën për të liruar sheshin para stadiumit”- u shpreh Rama.

I informuar se kandidati i Berisha-Meta në Malësi të Madhe, Isa Ramaj, flet për dallime fetare mes kandidatëve, Kryeministri Rama bëri thirrje sot që këtij kandidati të mos i jepet kokërr vote. Rama tha se askush nuk mund të tolerojë përçarje fetare në Shqipëri.

“Dëgjova se këtu ka një kandidat që i fryn përçarjes fetare. Vetëm për këtë arsye atij nuk i duhet më dhënë asnjë votë, Kjo zonë e Shqipërisë ka nxjerrë shumë figura të mëdha të historisë sonë, figura të mëdha të komunitetit katolik e mysliman por nuk njoh asnjë prej tyre që t’i ketë fryrë përçarjes fetare. Përkundrazi, prej tyre kemi mësuar se shqiptarët janë një dhe katolikët e myslimanët

Unë jam katolik, gruaja myslimane, 2 fëmijët nga martesat e para janë ortodoks dhe i vogli do e vendosi vetë.  Nuk ka poshtërsi më të madhe se sa të flasësh shqip dhe t’u thuash njerëzve ndahuni në myslimanë dhe katolikë. Myslimanët në radhë të parë do t’i thonë ‘shko për dreq’ , s’ke asnjë kokërr vote nga ne”, tha Rama.

Drejtuesja politike e PS-së në Qarkun Shkodër, Elisa Spiropali, tha nga Malësia e Madhe se Shqipëria nuk mund të mbetet peng i halleve personale të Ilir Metës dhe Sali Berishës.

“Berisha dhe Meta e duan votën për ta mbajtur peng Shqipërinë për hallet e tyre personale. Epo nuk nuk mund të mbetemi peng i halleve të tyre. Ne do të vazhdojmë përpara me Tonin dhe me Edi Ramën për ta zhvilluar Malësinë njësoj për të gjithë.  Ne nuk e duam Malësinë e Madhe për ta marrë peng por për ta çuar përpara. Kam shumë besim te Tonini sepse punon për Malësinë, punon për malësorët”, tha Spiropali.