Rama publikon kurbën: Vdekjet për 1 milionë banorë tregojnë qartë se sa vendimtare ka qenë marrja e masave në kohë

TIRANË- Kryeministri Edi Rama ka publikuar grafikun për vdekjet për 1 mln banorë nga COVID-19, ku Shqipëria renditet e fundit mes vendeve si Spanja, SHBA-ja, Italia, Belgjika, për të cilat janë kritikuar se nuk kanë marrë masat në kohë.

Pikërisht tek masat, vë theksin kreu i qeverisë, sipas së cilit është tregues i qartë që kurba e ulët është rezultat i reflektimit në kohë.

"Vdekjet për 1 milionë banorë tregojnë qartë se sa vendimtare kanë qenë shpejtësia, rreptësia dhe respektimi masivisht i masave në Shqipëri. Të gjithë ekspertët kudo në botë, bëjnë thirrje për të mos e ulur vigjilencën dhe asnjë qeveri në botë, nuk ka një plan hapjeje pa shkallë, në varësi të kurbës!

Ne do të vazhdojmë të zbatojmë planin tonë dhe ta adaptojmë atë sipas dinamikës së zhvillimeve në frontin e luftës për mbrojtjen e jetës. Ekonomia bie e ngrihet prapë, të vdekurit nuk ngjallen më, prandaj të gjithë duhet ta kenë të qartë që ne nuk do të tërhiqemi nën asnjë presion të padijes, mendjelehtësisë e vulgaritetit, të atyre që nuk duan të kuptojnë thelbin e kësaj situate dhe flasin për diktaturë e për lloj - lloj fantazish jashtë këtij realiteti", shkruan Rama.

Postimi i plotë i kryeministrit Edi Rama

B.K./Shqiptarja.com

TAG:
• edi rama
• Koronavirus
• koronavirusi ne shqiperi