Rama vizitë në QSUT: Buxheti për shëndetësinë në 2026 rritet me 50 mln euro, rimbursim të plotë të barnave të Onkologjikut

Buxheti i shëndetësisë për vitin 2026 do të rritet me mbi 50 milionë euro krahasuar me vitin 2025, ndërsa për barnat e Onkologjikut do të ketë një total prej 30 milionë eurosh shtesë deri në mesin e vitit, për të garantuar rimbursim domethënës dhe mbulim të plotë të barnave në të gjithë sistemin shëndetësor. Kështu tha sot Kryeministri Edi Rama në përfundim të vizitës së tij në Qendren Spitalore Universitare Nënë Tereza.

“Sa i përket vitit 2026, shëndetësia ka marrë më shumë se 50 milionë euro më shumë se në vitin 2025 dhe 15 milionë euro ekstra vetëm për barnat onkologjike. Kësaj shume të shtohet edhe një 15 mln tjetër në mesin e 2026 për të pasur një rimbursim domethënës të barnave të onkologjikut në shërbimin parësor dhe për të siguruar mbulimin me barna të gjithë sistemin. Në buxhet kemi vendosur një kapacitet domethënës për të rimbursuar 400,000 pacientë” tha Rama.

Kryeministri paralajmëroi gjithashtu vijimin e rritjes së pagave për mjekët dhe infermierët, me një shtesë mesatare prej 135 euro në muaj, si dhe njohjen e vjetërsisë në punë, ndërsa do të vijojë investimi në dixhitalizim dhe inteligjencë artificiale në proceset e trajtimit të pacientëve, me synimin për ndërtimin e një rrjeti kombëtar të onkologjisë dhe ngritjen e Institutit Kombëtar të Tumoreve.

"Do të vazhdojmë me transformimin e QSUT ndërsa ambicia është për të ngritur institutin kombëtar të tumoreve dhe për të pasur një rrjet kombëtar për të adresuar këtë problem në ccdo vend ku kanceri po prek gjithnjë e më shumë njerëz. Do të vazhdojmë të rrisim pagat për mjekët dhe infermierët. Deri tani, qindarkë për qindarkë, 135 euro ne muaj dhe për herë të parë, do të bëjmë dhe vjetërsinë në punë. Kjo do të jetë një shtesë tjetër që do të vlejë për mjekët, infermierët dhe teknikët. Ndërkohë do të vazhdojmë pjesën tjetër të planit për të rritur dixhitalizimin dhe inteligjencën artificiale në proceset e trajtimit të pacientëve" u shpreh Rama.

I shoqëruar nga Ministrja e Shëndetësisë Evis Sala dhe drejtoresha e QSUT-së Anxhela Paparizo, Rama vlerësoi punën e mjekëve, infermierëve dhe ekipeve të emergjencës, duke u ndalur edhe te skandali i ndodhur një vit më parë në Onkologjik, të cilin e cilësoi si “një njollë që u pagua nga i gjithë sistemi”. Kryeministri theksoi se çdo vit në QSUT realizohen rreth 95 mijë ndërhyrje mjekësore të suksesshme, të cilat nuk bëhen lajm, ndryshe nga rastet e izoluara negative që ndikojnë padrejtësisht në perceptimin publik për shërbimin shëndetësor.

“Është sakrifica dhe përkushtimi i të gjithë mjekëve, infermierëve dhe punonjësve të Urgjencës Kombëtare, si dhe i gjithë stafit mbështetës, që punojnë çdo orë dhe çdo ditë të vitit pa pushim, duke shpëtuar jetë dhe duke shëruar njerëz të sëmurë. E mira nuk bën lajm, e keqja po. Natyrisht, rreth 60 mijë operacione të suksesshme që kryen shërbimi ynë shëndetësor çdo vit dhe mbi 35 mijë ndërhyrje mikrokirurgjikale, të cilat janë të suksesshme, nuk bëhen lajm, sepse nuk janë lajme të këqija. Mjafton një operacion i dështuar, mjafton një tragjedi, për ta kthyer në të kundërt perceptimin për të gjithë trupën e mjekëve dhe për gjithë shërbimin tonë kombëtar shëndetësor. Kur ndodh që brenda këtij shërbimi identifikohen individë apo veprimtari që njollosin bluzën e bardhë, kostoja e reputacionit është shumë e lartë dhe e paguajnë të gjithë. Në fund të ditës, si ata që e dinë çfarë do të thotë të shërbesh, ashtu edhe ata që marrin shërbim, e dinë se pjesa pozitive është ajo që dominon. Para se të vinim këtu, kujtuam Onkologjikun, që, siç e dini, u bë shkas në një moment të caktuar për të ulur kokën të gjithë përballë fakteve që nuk nderojnë askënd. Megjithatë, takuam disa pacientë që ishin shumë të kënaqur me shërbimin dhe ishin të sinqertë në fjalët e tyre. I thoja drejtoreshës dhe ministres se opinioni ushqehet me një negativitet të madh për shërbimin shëndetësor nga ata që nuk kanë marrë shërbim në spital. Pjesa dërrmuese e atyre që kanë marrë shërbim, i kujtojnë mjekët për mirë”, tha Rama.

Rama u ndal edhe te transformimi i QSUT-së, duke përmendur ndërtimin e parkimit multifunksional me 1 400 vende, i cili do të lehtësojë qarkullimin dhe do të gjenerojë të ardhura për QSUT-në dhe Fondin Shqiptar të Zhvillimit. Sipas tij, rreth 80 mijë metra katrorë të territorit do të kthehen në park urban, duke ndarë hapësirat e automjeteve nga ato të këmbësorëve dhe shërbimeve.

“Ndërtesa e re e parkingut do të zgjidhë të gjithë problematikën e lëvizjes, sepse do të akomodojë të gjitha makinat që hyjnë në territorin e QSUT. Do të ketë 1400 vende dhe do të krijojë të ardhura që do të ndahen mes QSUT dhe FSHZH-së. I gjithë territori i QSUT sot, që është 80.000 katrot të bëhet parku më i madh urban i Tiranës, duke krijuar një atmosferë tërësisht tjetër, ku rrugët e makinave të ndahen nga ato të këmbësorëve e të shërbimit”, tha Rama.

Në Qendrën Spitalore Universitare QSUT Nënë Tereza po zhvillohen paralelisht disa projekte të rëndësishme që synojnë modernizimin e infrastrukturës, rritjen e kapaciteteve dhe përmirësimin e shërbimeve shëndetësore për pacientët, mjekët dhe studentët e mjekësisë.

K.B/A.A/Shqiptarja.com

TAG:
• edi rama
• QSUT
• onkologjiku