SHBA- Ish-presidenti i Shteteve të Bashkuara George W Bush ishte “plotësisht i informuar” mbi teknikat e marrjes në pyetje të CIA-s të dënuara në një raport të Senatit për brutalitetin e tyre. Lajmi është bërë me dije nga ish-zëvendës presidenti Dick Cheney, i cili në një intervistë për Fox News ka thënë se Bush dinte gjithçka duhet të dihej mbi programin.
 
CIA ka mbrojtur metodat e përdorura, si torturat me ujë, me arsyetimin se kjo ishte në ndihmë të zbulimit të terroristëve të dyshuar pas sulmeve të 11 shtatorit.
 
Raporti i Senatit deklaroi fillimisht se agjencia ivestiguese përjashtonte çdo përfshirje të politikanëve në dijeni rreth akteve ç’njerëzore, por ish-presidenti republikan e hedh poshtë duke thënë se ky është një mashtrim i senatit.
 
Cheney komentoi se raporti ishte një punë e bërë keq dhe me gabime, dhe se Presidenti Bush ishte plotësisht i informuar mbi teknikat e marrjes në pyetje të terroristëve dhe askush nuk është përpjekur t’ia fshehë këtë fakt.
 
Ende para publikimit të raportit George Bush e kundërshtoi raportin duke dalë në mbrojtje të CIA-s në televizionin Amerikan. Bush deklaroi se ata janë me fat që kanë burra dhe gra që punojnë fort në shërbim të CIA-s për të mbrojtur të gjithë qytetarët.
Në përmbledhjen e raportit tepër të klasifikuar theksohet se CIA ka përdorur metoda ‘brutale’ dhe ‘të padobishme’ pyetjesh për terroristët e dyshuar të Al-Kaedas, duke mos arritur as qëllimin e këtyre seancave, dhe duke i fshehur këto procedura të palejueshme nga zyrtarët më të lartë. Megjithatë përveç dijenisë mbi këtë fakt, ish-zëvendës presidenti Cheney shprehet se ky program shpëtoi jetë duke parandaluar sulme terroriste dhe agjencia meriton të nderohet e jo të dënohet.
 
Nga ana tjetër Kombet e Bashkuara dhe grupet për mbrojtjen e të drejtave të njeriut kanë kërkuar hetimin e zyrtarëve amerikanë të përfshirë në këtë program, nga 2001-2007, dhe nxjerrjen e tyre përpara drejtësisë.
 
Redaksia Online
(a.h/shqiptarja.com)