Berisha rikonfirmohet pa garë kryetar me 95% të votave: Do mbaj shënim votën e atyre që më dolën kundër! Por merr 17 mijë vota më pak se Basha në 2017

Gjatë fjalimit të ‘fitores’ pas shpalljes së rezultateve të zgjedhjeve pa garë të PD, Sali Berisha e trajtoi procesin e brendshëm të partisë sikur do të ndryshojë rezultatin e zgjedhjeve të ardhshme parlamentare. Ai tha se kjo votë e ka lënë pa gjumë kreun e qeverisë, Ramën.

“Me votën tuaj ju keni lënë pa gjumë organizatën kriminale dhe kreun e saj. Keni lënë pa gjumë kartelet e drogës dhe lidhjet e tyre me qeverinë”, tha Berisha.

Në fjalën e tij pas shpalljes së rezultatit të referendumit për PD, Berisha tha se ky është votimi më i rëndësishëm që nga 1991.

“Unë sonte dua t’u them të gjithë këtyre dhjetëra mijëra demokratëve se për mua në të gjitha votimet nga shtatori i vitit 1991 gjer sot, ky është votimi më i rëndësishëm, më i jashtëzakonshëm sepse me këtë votëbesim ju vendosët të ecim të pamposhtur drejt qëllimeve tona madhore. Të ecim të pamposhtur në përmbushjen e misionit të madh”, tha Berisha.

Sipas Berishës, 39 441 votuesit e PD kanë zgjedhur PD më të fortë se kurrë në ekzistencën e saj. Madje, është i bindur se me të njëjtën ‘forcë’, shqiptarët do të votojnë në zgjedhjet e ardhshme.

“Kanë zgjedhur PD më të fortë se kurrë në ekzistencën e saj. Siç votuam ne sot, do të votojnë shqiptarët nesër. Ky është betimi ynë! Edi Rama, dije mirë se për këtë ushtri 40 mijëshe, ti ke 0 legjitimitet! Ti, kudo që të shkosh, në hënë e prapa diellit, shkon një hajdut i shpërfytyruar”, tha Berisha.

Në selinë blu shpërtheu festa dhe fishekzjarret pas konfirmimit të Sali Berishës në krye të PartIsë Demokratike, Sipas deklaratës zyrtare të PD-së, Berisha u konfirmua kryetar me votat e 37 mijë demokratëve.

Partia Demokratike ka përmbyllur procesin e zgjedhjeve pa garë në Kukës për zgjedhjen e kryetarit. Procesi i votimit u zhvillua në mënyrë të qetë dhe pa probleme.

Sipas rezultateve zyrtare, në votim morën pjesë 1.014 anëtarë. Në kuti u gjetën po 1.014 fletë votimi, nga të cilat 1.005 rezultuan të vlefshme dhe 9 të pavlefshme.

Rezultati i referendumit në degën Kukës ishte 964 vota pro, 17 kundër dhe 24 abstenim.

Edhe në degën Has u zhvillua procesi i votimit. Në kuti u gjetën 853 fletë votimi, ndërsa nga numërimi rezultuan 826 vota pro dhe 27 vota kundër.

Në Durrës, Berisha ka grumbulluar 892 vota nga referendumi. 29 votues kanë votuar kundër, ndërsa 10 kanë abstenuar.

Ka përfunduar procesi i numërimit të votave ne Qarkun Lezhe për zgjedhjet pa garë që u zhvlluan për konfirmimin e Sali Berishës në krye të Partisë Demokratike.

Në degën e Mirditës morën pjesë 712 votues, nga të cilët 667 votuan pro, 28 kundër dhe 8 abstenuan.

Në degën e Kurbinit votuan 975 anëtarë. Nga këto, 952 vota ishin pro, 6 kundër, 4 abstenim, ndërsa 13 vota rezultuan të pavlefshme.

Ndërsa në degën e Lezhës, nga 1222 votues në total, 1059 votuan pro, 38 kundër, 45 abstenuan dhe 80 vota u shpallën të pavlefshme.

Procesi i votimit dhe numërimit u zhvillua pa incidente, ndërsa drejtues të PD-së e cilësuan referendumin si një tregues të mbështetjes së anëtarësisë dhe bashkimit të demokratëve.

Në degën e PD në Elbasan, Berisha ka marrë 1120 vota nga 1181 në total. 33 votues janë shprehur kundër, 12 kanë abstenuar ndërsa 16 janë të pavlefshme.

Në degën e Partisë Demokratike në Pogradec janë publikuar rezultatet e votimit për konfirmimin e Sali Berisha në krye të PD-së.

Sipas rezultatit zyrtar:

295 vota pro

19 vota kundër

10 abstenime

Ka përfunduar procesi i votimit në disa degë të Partisë Demokratike në qarkun e Korçës për rikonfirmimin e Sali Berisha në krye të PD-së.

Në degën e Kolonjës, Berisha ka marrë 213 vota pro, ndërsa janë regjistruar 4 abstenime.

Në Korçë, kandidatura e tij është mbështetur nga 392 anëtarë, ndërsa 18 vota kanë qenë kundër. Po ashtu janë regjistruar 7 abstenime dhe 18 fletë votimi të pavlefshme.

Ndërkohë, në Devoll, 648 anëtarë kanë votuar pro Berishës, 29 kundër, 15 kanë abstenuar dhe 3 fletë votimi janë shpallur të pavlefshme.