Referendumi për importin e
mbetjeve më 22 dhjetor 2013

TIRANE - Presidenti  Bujar Nishani dekretoi sot datën për mbajtjen e referendumit popullor për improtin e mbetjeve me qëllim riciklimin në Shqipëri. Referendumi do të mbahet më 22 dhjetor të 2013.  Dekreti është bërë publik sot në faqen zyrtare të presidencës.

"Në mbështetje të nenit 93 dhe nenit 152, pika 3 të Kushtetutës së Republikës së Shqipërisë, dekretoj caktimin e datës 22 dhjetor 2013, për zhvillimin e referendumit të përgjithshëm me objekt shfuqizimin e nenit 22, pika 3, dhe nenit 49 të ligjit nr.10463, datë 22.09.2011 “Për menaxhimin e integruar të mbetjeve”. Ky dekret hyn në fuqi menjëherë."- thuhet në dekretin me nr  8093,  Tiranë, më 8 Prill 2013.

Më 5 mars Gjykata Kushtetuese i hapi dritёn jeshile mbajtjes sё referendumit, pas kёrkesёs sё paraqitur nga Aleanca Kundër Importit të Plehrave dhe aktivistёtё shoqёrisё civile, duke dalë kundër qeverisë e cila nuk ishte dakord me mbajtjen e këtij referendumi.

Kërkesa u mor në shqyrtim nga Gjykata Kushtetuese pasi u mblodhën mbi 60 mijë firmave me të cilën kërkohej shfuqzimimi i dy neneve për ligjin e integruar të mbetjeve.

Ndër argumentimet në vendimin e zbardhur, më 8 mars, thuhej se: “Kushtetuta, në nenin 150 parashikon të drejtën e popullit, nëpërmjet 50 mijë shtetasve me të drejtë vote, për të kërkuar referendumin për shfuqizimin e një ligji. Gjykata ka theksuar se referendumi është mjeti kushtetues që lidhet me nocionin e sovranitetit të popullit (neni 2/1 i Kushtetutës), që ushtrohet nëpërmjet përfaqësuesve të zgjedhur prej tij ose në mënyrë të drejtpërdrejtë (neni 2/2)"

KU NDAHEN AKIP E QEVERIA
Sipas Alekancë Kundër Importit të Plehrave në Shqipëri nuk ka kapacitete për trajtimin e mbetjeve. Fillimisht duhen trajtuar mbetjet që prodhon vendi, ndërsa importi do ta përkeqësojë ndotjen e ambientit. Nga ana e saj qeveria thotë se ligji aktual kufizon importin e mbetjeve të rrezikshme, ndërsa i ka të gjitha kapacitetet për riciklimin e mbetjeve që parashikohen me ligj.

PSE NISHANI DEKRETOI  DATEN E REFERENDUMIT
Bashkëngjitur me dekretin presidenca shton dhe relacionin për caktimin e datës së referendumit:

Më datë 30.11.2011, në Komisionin Qendror të Zgjedhjeve (KQZ), është paraqitur një kërkesë për fillimin e procedurave për zhvillimin e një referendumi të përgjithshëm për shfuqizimin e një pjese të ligjit nr. 10463, datë 22.09.2011 “Për menaxhimin e integruar të mbetjeve”.

Me Vendimin nr. 1236, datë 22.12.2011, KQZ ka vendosur miratimin e modelit të fletës tip për mbledhjen e nënshkrimeve të 50 mijë zgjedhësve, siç sanksionohet në nenin 150 të Kushtetutës së Republikës së Shqipërisë dhe në nenin 127 të ligjit nr. 9087, datë 19.06.2003 “Kodi Zgjedhor i Republikës së Shqipërisë”.

Në përfundim të procesit të verifikimit të nënshkrimeve dhe saktësisë së dokumenteve të identifikimit të zgjedhësve, KQZ me vendimin nr.10, datë 28.06.2012 vendosi pranimin e kërkesës për zhvillimin e referendumit të përgjithshëm për shfuqizimin e një pjese të ligjit nr. 10463, date 22.09.2011 “Për menaxhimin e integruar të mbetjeve” si dhe dërgimin e kërkesës Presidentit të Republikës dhe Gjykatës Kushtetuese më datë 03.01.2013. Shtyrja e dërgimit të kërkesës nga KQZ është arsyetuar dhe bazuar në përcaktimet e pjesës së nëntë të ligjit nr. 9087, datë 19.06.2003 “Kodi Zgjedhor i Republikës së Shqipërisë”.

Gjykata Kushtetuese me Vendimin nr.8, datë 08.03.2013, ka vendosur pranimin e kërkesës si dhe deklarimin si të pajtueshme me Kushtetutën të kërkesës për zhvillimin e referendumit të përgjithshëm për shfuqizimin e nenit 22, pika 3, dhe nenit 49 të ligjit nr.10463, datë 22.09.2011 “Për menaxhimin e integruar të mbetjeve”.

Bazuar në nenin 152, pika 3 të Kushtetutës, Presidenti i Republikës cakton datën e referendumit brenda 45 ditëve pas shpalljes së vendimit pozitiv nga Gjykata Kushtetuese. Në përputhje me këtë përcaktim kushtetues si dhe me nenin 119, pika 6 të Kodit Zgjedhor të vitit 2003, kërkesa për referendum duke mos kaluar në të gjitha procedurat e kërkuara, brenda datës 15 mars 2012, u shty deri në vitin 2013. Ndërkohë, neni 119, pika 2 e Kodit Zgjedhor të vitit 2003 nuk lejon mbatjen e një referendumi të përgjithshëm brenda periudhës 6 muaj para përfundimit të mandatit të Kuvendit deri 3 muaj pas mbledhjes së parë të Kuvendit të ri (sipas një përllogaritje kjo periudhë korrespondon me datat 7 mars 2013 -17 dhjetor 2013).

Për sa më sipër, Presidentit të Republikës i mundësohet caktimi i datës 22 ose 29 dhjetor 2013 si datë për zhvillim referendumi.

Në këto kushte, Presidenti i Republikës vendosi të caktojë datën 22 dhjetor 2013 si datë për zhvillimin e referendumit të përgjithshëm me objekt shfuqizimin e nenit 22, pika 3, dhe nenit 49 të ligjit nr.10463, datë 22.09.2011 “Për menaxhimin e integruar të mbetjeve”.

(sg/shqiptarja.com)

TAG:
• kqz