Reforma zgjedhore, ndryshimet
në KQZ brenda 15 shtatorit

Dekretimi nga Presidenti Bujar Nishani i ndryshimeve në Kodin Zgjedhor i hap rrugë riformatimit të plotë të Komisionit Qendror të Zgjedhjeve.

Sipas dispozitave të përcaktuara ligjore, votimi në seancë i trupës së re të institucionit të menaxhimit të proceseve zgjedhore do të duhet të realizohet brenda mesit të muajit shtator. Pika 181 e kodit të ndryshuar përcakton momentin kur duhet të bëhet zëvendësimi i anëtarëve aktualë ndërsa thotë se "Kuvendi 30 ditë nga data e shpalljes së ndryshimeve të këtij ligji zgjedh anëtarët e KQZ-së".

 Duke llogaritur 16 gushtin si datën e dekretimit të ligjit atëherë duhet që brenda një muaji të përfundojë procesi i përzgjedhjes dhe votimi i anëtarëve në Kuvend. Kodi parashikon se gjashtë anëtarë të KQZ-së zgjidhen përkatësisht: dy me propozim të partisë më të madhe të mazhorancës, dy me propozim nga partia kryesore e opozitës dhe dy anëtarët e tjerë vijnë si propozime nga partitë e dyta të mazhorancës dhe opozitës.

Brenda pak ditësh duhet të shpallet edhe posti vakant i kryetarit të KQZ-së i cili votohet jo më vonë se 10 ditë nga zgjedhja e anëtarëve të tjerë. Mandati i shtatë që është njëkohësisht mandati i kryetarit të KQZ-së zgjidhet përmes procedurës së konkursit siç parashikon Kodi Zgjedhor.
(dm/shqiptarja.com)

TAG:
• kqz