Reforma Zgjedhore, OSBE: Gati të
ndihmojmë komisionin me ekspertizë

Kryetarja e KQZ-së, Lefterie Luzi dhe OSBE kanë zhvilluar disa takime në Dibër në kuadër të zgjedhjeve lokale për ndërgjegjësimin e grave, përfshirë atyre që votojnë për herë të parë, të drejtat e tyre, rëndësinë e votës dhe kuotën gjinore për zgjedhjet vendore.
 
Kryetarja e KQZ-së gjatë fjalës së saj e vendosi theksin te barazia gjinore në proceset zgjedhore, lirinë e votës dhe problemin e votimit familjar.
 
Ndërsa kryetari në detyrë Robert Wilton deklaroi se OSBE është e gatshme t’i ofrojmë komisionit të posaçëm të reformës zgjedhore ekspertizën e kërkuar, sapo ai të fillojë punën.
 
“Këto veprimtari tregojnë besimin e OSBE-së në rëndësinë që ka rritja e pjesëmarrjes së grave në jetën politike dhe publike, si dhe janë pjesë e mbështetjes për partnerin tonë afatgjatë, Komisionin Qendror të Zgjedhjeve.
 
Pas bisedave paraprake, ne jemi gjithashtu të gatshëm t’i ofrojmë komisionit të posaçëm të reformës zgjedhore ekspertizën e kërkuar, sapo ai të fillojë punën”, tha Wilton.
 
OSBE i njohu të pranishmet me hapat e fundit lidhur me reformën zgjedhore dhe me kuotën gjinore për zgjedhjet vendore.
 
Gjatë kësaj jave, Prezenca e OSBE-së po zhvillon, gjithashtu, takime me këshilltare bashkiake të partive të ndryshme në bashkitë e Vlorës, Sarandës, Konispolit, Himarës dhe Dibrës, për të diskutuar për përfaqësimin e tanishëm të grave në politikë, zbatimin e mekanizmave të barazisë gjinore në nivelin vendor dhe përmirësimin e mundshëm të kuotës gjinore për zgjedhjet parlamentare të 2017-s.
 
Këto veprimtari janë pjesë e punës së vijueshme të Prezencës për të nxitur angazhimin qytetar në Shqipëri, për të fuqizuar profesionalizmin e administratës zgjedhore, si dhe për të përmirësuar cilësinë e zgjedhjeve, në përputhje me rekomandimet e OSBE/ODIHR-it.
 
Zgjedhjet në bashkinë e Dibrës do të zhvillohen në 11 shtator, ndërsa përballë njëri tjetrit janë Sherefedin Shehu nga PD dhe Muharrem Rama nga aleanca e majtë.


d.b/shqiptarja.com

 

TAG:
• kqz
• OSBE