Receta

Role viçi e mbushur nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 18 Dhjetor 2023, 14:31 | Përditesimi: 18 Dhjetor 2023, 14:37

Role viçi e mbushur

Përbërësit:

1 kg mish viçi tul
100 gr proshutë
100 gr djathë në feta
1 salçiçe
1 karrotë
1 qepë
1 degë selino
3-4 gjethe sherebelë
2 gjethe dafine
1 gotë verë të bardhë
Vaj ulliri
Pak rozmarinë
Kripë, piper

Përgatitja:

LEXO EDHE:
Melomakarona, biskota me arra dhe mjaltë të sherbetosura nga zonja Albana

Marrim copën e mishit dhe fillojmë t'a presim me kujdes si libër për së gjati rreth e qark duke e hapur në një fetë të vetme. I hedhim pak kripë e piper. E rrahim pak mishin dhe fillojmë t'a mbushim. Vendosim një shtresë me proshutë, më pas një shtresë me copat e djathit dhe mbi të shtojmë salçiçen e prerë në copa. E mbledhim rolenë me kujdes duke futur brenda të gjithë përbërësit dhe e lidhim me fill kuzhine.

Në një tenxhere hedhim vaj ulliri, vendosim mishin në të dhe e skuqim mirë nga të gjitha anët. Shtojmë qepën e qëruar, karrotën, degën e selinosë edhe erëzat me radhë. Kur mishi të ketë marrë ngjyrë e shuajmë me verë të bardhë. E lëmë të avullojë vera e më pas shtojmë 2 gota lëng mishi ose ujë. I hedhim pak kripë e pak piper dhe e mbulojmë me kapak tenxheren. E lëmë mishin të gatuhet në zjarr të ulët. Më pas e lëmë pak të qetësohet, e vendosim mbi një dërrasë ku e presim në copa duke hequr me kujdes fijet që e kemi lidhur. Copat e mishit i vendosim në pjatë dhe i hedhim sipër lëngun e mbetur të kulluar ose sipas dëshirës perimet që janë në lëng mund t'i frulojmë dhe i hedhim sipër mishit.

MC/Shqiptarja.com

TAG: