Që dhuna dhe bullizmi po përhapen frikshëm mes të rinjve, e dëshmon një episod i rëndë në Fier, i regjistruar më 8 qershor, por i bërë publik së fundmi.

Ngjarja do të mbetej e pazbuluar, nëse 3 vajza, njëra madhore, 20 vjeç, dhe dy të mitura 15-vjeçare, nuk do t’i kishin filmuar veprimet e tyre të dhunshme.

Të rejat ndezin celularin dhe sapo kamera nis regjistrimin, dhunojnë një 17-vjeçare në ambientet e banesës së më të madhes prej tyre, 20-vjeçares.

Ulëritës është fakti që ky veprim turpërues ndaj një vajze, e vetme kundër 3, e pambrojtur dhe në shtëpi të huaj, duhet të filmohet, me siguri për t’u shitur si një provë force përballë shoqërisë që ushqehet me bullizëm.

Megjithatë, e mitura, nën shoqërinë e nënës së saj, ka gjetur forcën të tregojë, dhe t’i kallëzojë vajzat të cilat teksa e dhunonin i qeshnin kamerës. Kallëzimi është bërë ditën kur dhuna ndodhi, më 8 qershor, dhe një hetim tashmë ka nisur për të tria vajzat, dy prej të cilave veprojnë me forcë dhe tjetra që i regjistron me telefon dhe i nxit për dhunë.

Sipas dëshmisë së 17-vjeçares, ajo është dërguar në banesën ku u dhunua, ndaj vepra që po hetohet është “heqje e paligjshme e lirisë” e kryer në bashkëpunim.

Përballë hetuesve të tria e pranuan se e kanë dhunuar 17-vjeçaren, por janë justifikuar me disa arsye, që policia nuk i bën të ditura, por i vlerëson si motive të dobëta.

Në lagjen ku e mitura jeton, fqinjët janë të lënduar.

"Jemi të shokuar, vajzën e kam rritur vetë. Që pas ngjarjes është me trauma dhe e frikësuar, ndërkohë që nuk është në dijeni të videos virale që qarkullon në rrjet”, thotë fqinja.

Për zbardhjen sa më shpejt të çdo detaji mbi këtë ngjarje të rëndë, drejtori i policisë së Fierit, Erjon Ahmetaj, zhvilloi një takim me kryeprokurorin Elion Mustafaj.

20 ditë pas këtij episodi të rëndë të dhunës ndaj të miturës, njëra prej 15-vjeçareve, ka dhunuar edhe nënën e saj, duke i shkaktuar dëmtime fizike. Ngjarje e ndodhur më 28 qershor, ku pas kallëzimit nga nëna, policia thotë se e arrestoi të miturën. Bazuar në vlerësimin e autoriteteve kompetente, 15-vjeçarja e arrestuar është dërguar për trajtim në një institucion shëndetësor të specializuar për shëndetin mendor, në Tiranë.

Video e dhunës është publikuar në rrjetet sociale, por për garantimin e privatësisë dhe mbrojtjen e identitetit të të miturës, përfshirë sensibilitetin e lartë publik që ato imazhe krijojnë, Report Tv nuk e publikon atë.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.

Rendit zhvillimet sipas orarit:
Ora 19:26
Ekskluzive/ Rrëfehet nëna e 17-vjeçares së dhunuar në Fier: E mora nga spitali me fytyrën e nxirë, nuk mund t’i fal! Vajza ime jeton me frikë

Mamaja e vajzës së dhunuar, ka rrëfyer ngjarjen e rëndë për mikrofonin e Report Tv. Ditën e 8 qershorit, ajo e priste të bijën të vinte në shtëpi pas kursit të parukerisë, por një telefonatë e informoi se ajo ndodhej në spital dhe se nuk ishte mirë.

Pasi 17-vjeçarja ishte dhunuar brutalisht nga 3 vajza të tjera, kishte shkuar e vetme në spital për të bërë serum. E ëma shkoi për ta marrë dhe e pa me shenja dhune në fytyrë. Fillimisht ajo nuk pranoi të tregonte, por më pas pranë nënës së saj rrëfeu se ç’kishte ngjarë.

Pjesë nga intervista

Më merr burri dhe më thotë: "Goca ishte sëmurë." Hajde, thashë, ndoshta ka kaluar diçka, si gjithë moshatarët. Shkoj për të marrë gocën, se nuk doja që të priste autobusin. Goca më vjen me vrap, e tmerruar. E shoh me serumin në dorë. I them: "Çfarë ke, moj të keqen mami? Pse je vrarë? Kush të ka vrarë?" "Hiç, asgjë", tha. "Thjesht bëra një serum dhe nga që isha vetëm në spital, u çorra."

"Po ti ke syrin të nxirë, moj bijë", i thashë. "Ti ke mjekrën të nxirë", i thashë. "Flokët e tu pse më duken kështu?", i thashë.

....tha se gjoja i kishin hapur nga këto rrjetet sociale. Pastaj më tregon: "Më dhunuan 3 goca."

"Pse moj bijë? Unë të çova për në kurs, të prisja të vije në shtëpi. Mos ndoshta i ke ngacmuar gocat?", i thashë.

"Jo moj mami", tha, "se nuk kam asgjë me gocat. Thjesht më thanë: 'Hajde me mua se kemi një surprizë'."

Thjesht shoqe rastësisht. Më duket ishte takuar një herë, dy herë mos gaboj. Ato i kishin dalë para pasi kishte dalë goca nga kursi.

"Çfarë ke moj gocë? Ç'është kjo jotja kështu?"

Aty u mërzit goca. Ishte ora 6 e pasdites. I thashë: "Të ka ndodhur diçka. Mamin e ke pranë." Filloi të qante e të dridhej.

Me lot në sy dhe e rrënuar pasi ka parë të bijën duke u rrahur pa mëshirë nga bashkëmoshatare të saj, u nisën për të bërë denoncimin në polici. Ajo tregon se vajza e saj është e traumatizuar, refuzon të ushqehet, qan e dridhet e vijon të jetë e frikësuar.

“Kur pashë vajzën time të dhunuar, nuk më mbante vendi më. Ndoshta dhe ato nëna nuk dinë gjë, por çdo kush ta kthejë thikën nga ana e tij. Sepse unë atë fëmijë mezi e kam rritur, e ushqej me pikat e qumështit. Ngrihet burri, ikën në orën 4 të mëngjesit në punë e të më dhunojnë mua vajzën? Nëse unë fëmijën e kam të sëmurë, unë do shkoj ta kuroj. Vajza ime nuk ngatërrohet me njeri. Është e thjeshtë, sheh punën e saj. Unë s'di gjë si ka ndodhur ky dhunim. Ndoshta mund të ketë qenë ndonjë presion më parë”, tha ajo.

Pjesë nga intervista:

-Mami i njërës nga vajzat ka kërkuar falje...

E di, por unë nuk mund të fal, se shpirti im e di sesa po e vuaj. Iki e qaj fshehurazi. Nuk qaj në sy të vajzave.

Kam një muaj që nuk fle gjumë. Goca ime po dhunohet kështu? Goca ime po ulëret? Po kërkon ndihmë, o ma? Kjo gocë po më kërkon mua ndihmë dhe nuk jam pranë saj.

Të njëjtën gjë do kishin bërë edhe ato nëna. Kap dy veta për flokësh dhe shqit. Çfarë bëri vajza ime? Ishte një kriminele?

K.B/Shqiptarja.com

Ora 17:29
Flet nëna e një prej tre vajzave që dhunuan shoqen në Fier: Nuk e dinim! U diagnostikua me probleme të shëndetit mendor para 3 muajsh (VIDEO)

 

Mes reagimeve që ka sjellë ngjarja e rëndë e dhunimit të një 17-vjeçareje në Fier, kanë folur edhe prindërit e njërës prej vajzave 15-vjeçare të përfshira në këtë rast.

Ata tregojnë se ngjarjen e kanë mësuar fillimisht përmes mediave dhe më pas janë shoqëruar në polici për të dhënë dëshminë e tyre.

Me lot në sy, nëna e 15-vjeçares i kërkon falje publike vajzës së dhunuar dhe familjes së saj, duke shprehur keqardhje të thellë për atë që ka ndodhur.

Prindërit bëjnë me dije se vajza e tyre është diagnostikuar 3 muaj me pare me probleme të shëndetit mendor dhe se prej kohësh kanë kërkuar ndihmë pranë institucioneve për trajtimin e saj. Sipas tyre, ajo kishte shfaqur edhe më parë episode agresiviteti, por kërkesat për mbështetje nuk kanë marrë përgjigjen e nevojshme.

Përballë pamundësive ekonomike për të financuar trajtimin e specializuar, familja u bën thirrje institucioneve shtetërore që të ndërhyjnë dhe të ndihmojnë në kurimin e vajzës, me shpresën se ajo do të marrë kujdesin e nevojshëm mjekësor dhe psikologjik.

Prindërit theksojnë se nuk synojnë të justifikojnë veprimet e së bijës, por kërkojnë që, krahas përgjegjësisë ligjore për ngjarjen, të mos neglizhohet nevoja për trajtimin e problemeve të saj shëndetësore.

K.M/Shqiptarja.com

Ora 17:12
Rrahu shoqen dhe e filmoi/ 15-vjeçarja nga Fieri u trajtua në psikiatri në maj, raporti: Nuk frekuenton shkollën prej 1 viti! E dhunshme ndaj nënës, bashkëpunuese me mjekët

 

Report Tv ka zbuluar detaje të reja lidhur me një prej tre të miturave që morën pjesë në dhunimin e një 17-vjeçareje në Fier, akt të cilin e filmuan nga fillimi në fund me anë të një telefoni smart.

15-vjeçarja ka marrë trajtim për herë të parë në Psikiatrinë e Fëmijëve dhe Adoleshentëve në muajin maj të këtij viti, “për shkak të sjelljeve të dhunshme në familje duke dëmtuar objektet në shtëpi”. Në raportin e spitalit thuhet ndër të tjera, se vajza “është e dhunshme edhe ndaj nënës dhe këto problematika të sjelljes kanë rreth 1 vit që janë shfaqur. Vajza nuk frekuenton shkollën prej 1 viti, endet rrugëve shumicën e kohës me vajza me të rritura, të cilat ajo i konsiderohen shoqe”, theksohet në informacionin e spitalit për këtë paciente.

Në një shënim të mjekut, thuhet se gjatë shoqërimit në spital vajza ishte bashkëpunuese me bluzat e bardha dhe kryerjen e ekzaminimeve, ndërsa me nënën komunikimi qe i vrazhdë. Sipas mjekes, ajo është larguar nga spitali kundër këshillës mjekësore.

1783439213_vlcsnap2026070717h22m38s881.png

K.M/Shqiptarja.com

Ora 12:33
Fier/ Fqinja e së miturës së dhunuar nga 3 vajzat: Jemi të tronditur, e kemi rritur vetë! Është e traumatizuar, s’ka dijeni për videon virale

 

Fqinja e së miturës së dhunuar nga 3 vajza në Fier, shprehet për Report TV se ngjarja tronditëse e ka shokuar. 17-vjeçarja shkonte shpesh në shtëpinë e saj, e cila rrëfen detaje nga 8 qershori, dita kur e mitura shkoi në shtëpi me shenja dhune.

“U prekëm shumë. Unë e kam rritur atë. Ky muhabet ka që në datën 8, mbush muajin nesër. Erdhi çupa e dhunuar, por nuk tregoi gjë për momentin. Ishte në kurs, doli nga kursi, dolën shoqet përpara, e rrahën. Erdhi në shtëpi me blana, e pyeti e ëma, tha isha sëmurë, bëra serum, u godita, nuk tregoi. Iu kundërvu e ëma, pasdite vonë tregoi. Mori çupën dhe bëri denoncimin në polici. Nga data 8 asnjë përgjigje s’ka marrë tha, i thoshin e ka prokuroria rastin”, tha fqinja.

Dhuna e bëri vajzën të pësonte shenja të forta stresi nga trauma e kësaj ngjarjeje duke reaguar ndaj çdo zhurme. Fqinja thotë se 17-vjeçarja është vajza e madhe nga tre fëmijët e familjes. Nuk i njihte vajzat që e dhunuan, përveç njërës që e kishte në shkollë.

“Më thanë hajde se kemi një sqarim”, citon fqinja fjalët e së miturës dhe më pas “e morën në shtëpi dhe e rrahën”, shton ajo.

Pamjet e dhunës së 17-vjeçares janë bërë virale, por ajo nuk është në dijeni të këtij fakti.

P.J/Shqiptarja.com