Nga Orikum–Dukat te Milot- Balldren dhe PPP-të, rrëzohen 5 dekretet e para të Metës, që ktheu në Kuvend

TIRANË- Komisioni i Ekonomisë dhe Financave ka rrëzuar dekretet e presidentit Meta që riktheu për shqyrtim në Kuvend. Komisioni Parlamentar i Ekonomisë ka vendosur gjatë mbledhjes së të martës rrëzimin e dekreteve për “Për privatizimin dhe dhënien në përdorim shoqërive tregtare”, ligjin për Koncesionet, PPP-të dhe zhvillimin e territorit dhe dy dekretet e tjera të Metës për ndërtimin me koncesion të segmenteve rrugore Orikum – Dukat dhe Milot- Balldren. Ndërsa në Komisionin për Veprimtarinë prodhuese, tregtinë dhe Mjedisin u vendos rrëzimi i dekretit për disa shtesa dhe ndryshime për planifikimin dhe zhvillimin e territorit.

***
Me 11 vota pro dhe 1 kundër komisioni rrëzoi dekretin për Privatizimin e shoqërive tregtare. Ka qenë deputeti i opozitës së re Korab Lita i cili ka votuar kundër rrëzimit të këtij dekreti. Në diskutimet mbi këtë ligj, deputetja socialiste Evis Kushi deklaroi se argumentet e Metës për kthimin e dekreteve nuk janë kushtetuese.

Diskutimet ne komision
Evis Kushi-Ligji që në miratuam thjesht i përgjigjet një problematike. Argumenti i [presidentit lidhet me pretendimin se është në kundërshtim flagrant me linjën e vitit 2001 dhe kështu mund të bëjë rrezik për konflikt institucional. Ligji i vitit 2001 e përmban këtë gjë. Ligji që ne miratuam është ligj i veçantë dhe në këtë aspekt plotësohet kushti i dytë se tjetërsimi i pronave përcaktohet nga këshilli bashkiak. Dhe kushti i tretë plotësohet. Ky komision ka bërë ndryshimet përkatëse ku përcaktohet se pjesa shtetërore nuk duhet të jetë më shumë se 20%.

Ndërsa deputeti i opozitës së re Korab Lita i cili qe e vetmja votë kundër për rrëzimin e këtij dekreti tha se opozita nuk duhet të bëhet pjesë e aferave.

Korab Lita- Ka argumente sa të duash për të kthyer ligje. E përshëndes veprimin e presidentit. Por deri dje i ka lejuar se ka qenë me ju. Jo se besoj tek vendosmëria e presidentit për të luftuar korrupsionin por gjithsesi ftoj kolegët e opozitës të mos bëhen pjesë e këtyre aferave dhe të votojnë pro dekretit të presidentit.

Përgjatë dy muajve të fundit presidenti Ilir Meta ka kthyer në Kuvend 9 dekrete. Në mbledhjen e djeshme të konferencës së kryetarëve u vendos edhe kalendari i punimeve sipas të cilit dekretet e Metës do të rrëzohen brenda datës 19 shtator.

/r.k./Shqiptarja.com

TAG:
• Ilir Meta
• komisioni i ekonomise