Rritet paga minimale/ Zv.ministrja e financave për Report TV: Në maj, 290 mijë punonjës do të marrin 40 mijë lekë! Ja pse u mor ky vendim

TIRANË- Olta Manjani, zv ministre e Financave në një intervistë për Report Tv ka deklaruar se rritja e pagës minimale do të hyjë në fuqi në datën 1 prill. Pra e thënë ndryshe, në muajin maj, punonjësit do të marrë pagën e plotë prej 40 mijë lekët. Në një intervistë me gazetarin Arbër Hitaj, Manjani tha se nga ky vendim përfitojnë 290 mijë punonjës në sektorin publik dhe privat.

“Do të hyjë në fuqinë  datë 1 prill, krahas vendimit të rritjes së pagës minimale që do të përfitojnë rreth 290 mijë punonjës në sektorin publik dhe privat”, tha Manjani.

Ajo ka deklaruar se për t’iu ardhur në ndihmë bizneseve, është vendosur që të subvensionohen me 1974 lekë për punonjës në muaj. Ky subvencionim do të jetë i vlefshëm për 4 sektorë, industria përpunuese, bujqësia, pyjet dhe peshkimi.

“Është marrë dhe një vendim tjetër për subvencionin për kostot e shtuara nga ky vendim, kostot e sigurimeve shoqërore dhe shëndetësore në sektor të caktuar të cilët kanë një kosto shumë të lartë të pagave të punonjësve në buxhetin e tyre, prandaj do të do të subvencionohen në masën 1974 lekë për punonjës çdo muaj për një periudhë 1 vjeçare. Janë 4 sektorë që do përfitojnë nga ky sektor, industria përpunuese, bujqësia, pyjet dhe peshkimi. Arsyeja pse e kemi vendosur që të bëjmë këtë kompesim lidhet me faktin që bizneset do të përballen me kostro të shtuar dhe është menduar që t’i ndihmojmë për t’i përballuar këto kosto deri sa biznesi të jenë gati. Janë zgjedhur ato sektor që në koston e tyre, që pagat i kanë substanciale”, tha zv.ministrja.

Në Report Tv, Manjani ka listuar edhe arsyet se përse u vendos rritja e pagës minimale. Së pari, lidhet me faktin se Shqipëria ishte ndër vendet me pagën minimale më të ulët në rajon. Së dyti, është një ndihmë për këtë shtresë të shoqërisë për të rritur mirëqënien e tij, por edhe për faktin se është një detyrim i BE-së.

“Shqipëria renditet ndër vendet me pagën më të ulët në rajon, ndërkohë që vendet e tjera kanë një nivel më të lartë se ai në Shqipëri, prandaj bëhet për 2 qëllime, që të angazhohet forcë shtesë në tregun e punës dhe së dyti që këto punonjës me pagë minimale te kenë një mirëqenies së tyre, nisur edhe nga rritja e çmimeve. Nuk ka një vendimmarrje se sa do të rritet, por është edhe një detyrim për rrugën e integrimit në BE, paga duhet t jetë në nivelin 60% të pagës minimale”, përfundoi Manjani në Report Tv.

Paga minimale nga 34 mijë lekë që është aktualisht, paga minimale do të arrijë në 40 mijë lekë, sipas vendimit që qeveria mori këtë të mërkurë edhe për të lehtësuar pasojat e inflacionit. 

B.K./Shqiptarja.com

TAG:
• Olta Manjani
• paga minimale
• Ministria e Financave