Sërish zgjedhje në Korçë, 1 shtator
zgjidhet kreu i komunës Dardhas

TIRANE- Proceset zgjedhore për Qarku e Korçës pritet që të zgjasin deri në muajin tetor, kjo pasi pas zgjedhjeve që do të bëhen në qytet për kryebashkiakun e ri të saj, pritet që dhe në datën 1 shtator të mbahen zgjedhje në komunën e Dardhës për të zgjedhur në këtë mënyrë kryetarin e ri të komunës.

Nëpërmjet një dekreti të datës 31 korrik, Presidenti Nishani ka dekretauar datën 1 shtator që të mbahen zgjedhjet në këtë komunë.

“Në mbështetje të nenit 92 gërma “gj” dhe 93 të Kushtetutës së Republikës së Shqipërisë, si dhe të nenit 10, paragrafi 3 të ligjit nr. 10019 datë 29.12.2008 “Kodi Zgjedhor i Republikës së Shqipërisë” (i ndryshuar), Dekretaoj: Caktimin e datës 1 shtator 2013, për zhvillimin e zgjedhjeve për kryetar të komunës Dardhas, qarku Korçë”, thuhet në dekretin e Nishanit. Ndërkohë që sot KQZ do të marrë në shqyrtim dhe do të japë vendim për miratimin e disa afateve proceduriale që lidhen me zhvillimin e zgjedhjeve, që do të përdoren për zgjedhjet për Kryetar të Komunës Dardhas, Qarku Korçë, të datës 01 Shtator 2013. Njëkohësisht 4 anëtarët  do të shqyrtojnë sot edhe Projekt-vendimin "Për miratimin e modelit të vulës së KZAZ-së, KQV-së, Kryetarit të KQV-së dhe vulës rezervë për KQV-në, që do të përdoren për zgjedhjet për Kryetar të Komunës Dardhas, Qarku Korçë, të datës 01 Shtator 2013".

Por në fillim të muajit tetor qyetarët korçarë do të votojnë për të zgjedhur kryebashkiakun e ri të tyre, kjo pas dorëheqjes që pritet të japë kryetari aktual i bashkisë Niko Peleshi, pas postit të zvendëskryeministrit që do të ketë në qeverinë e re. Pas betimit të tij në këtë post, kreu i shtetit do të dekretojë brenda 45 ditëve edhe datën e zgjedhjeve për Bashkinë Korçë.

Shkrimi u botua sot në gazetën “Shqiptarja.com” (print) 02.08.2013
 
Redaksia Online
(e.s/shqiptarja.com)

TAG:
• kqz