Kryeministri Hashim Thaçi gjatë mbledhjes së djeshme të Qeverisë ka deklaruar se përpjekjet e Beogradit për të organizuar zgjedhje në Kosovë do të dështojnë.
Sipas tij, pretendimet për organizimin e zgjedhjeve vlerësohen si agresion i Serbisë në Republikën e Kosovës. Ai ka thënë se do të përdoret e gjithë forca kushtetuese e ligjore që Serbia të mos ndërhyjë në çështjet e brendshme të vendit, - ka deklaruar në mes tjerash kryeministri.

Por, nga ana tjetër Beogradi këmbëngul në mbajtjen e zgjedhjeve në Kosovë. Sekretari shtetëror në të ashtuquajturën Ministri për Kosovën në Qeverinë e Serbisë, Oliver Ivanoviq, i tha RTK-së se Beogradi nuk ka hequr dorë nga mbajtja e zgjedhjeve lokale në Kosovë.

Në të njejtën ditë për në Itali ka udhëtuar Ministri i Jashtëm i Kosovës, Enver Hoxhaj i cili gjatë takimit me homologun e tij italian, Gjulio Terci, kanë diskutuar, ndër të tjera, për mbajtjen e zgjedhjeve të Serbisë në territorin e Kosovës. 
Ata janë pajtuar se duhet të respektohet sovraniteti i Kosovës.
Ministri i Jashtëm i Kosovës, Enver Hoxhaj, ka kërkuar nga homologu i tij në Romë që qeveria italiane ta kundërshtojë mbajtjen e zgjedhjeve serbe në Kosovë. Ndërsa shefi i diplomacisë italiane ka kërkuar respektimin e sovranitetit të Kosovës kur bëhet fjalë për zgjedhje lokale. 
/rg/shqiptarja.com/