Serbët lavdërojnë Fatos Lubonjën
për kritikat e tij ndaj UÇK-së

BEOGRAD - Lubonja merr lëvdata në Serbi! Komentet e analistit dhe shkrimtarit nga Shqipëria, Fatos Lubonja se "lideri i AAK-së, Ramush Haradinaj dhe udhëheqës të tjerë të UÇK-së janë vrasës” dhe se “elita politike në Shqipëri dhe Kosovë kanë mbyllur sytë para krimeve të UÇK-së”, kanë zënë vend në shumicën e mediave të Serbisë.
 
Radio Televizioni publik i Serbisë në portalin e Rts.rs i ka dhënë hapësirë të rëndësishme Lubonjës, duke cituar atë që ai ka thënë. “Në artikullin e botuar në numrin e muajit maj të revistës “Sudosteuropa”, Lubonja ka shkruar për mosreagimin e autoriteteve shqiptare pas lirimit nga Haga të ish-komandantit të UÇK-së, Ramush Haradinaj. Lubonja ka theksuar se "megjithëse kishte dëshmi të mjaftueshme, Haradinaj është liruar. Sipas tij, dëshmitë ishin të vërteta”, shkruan Rts.
 
Më pas, në këtë artikull, Rts thekson se këto komente te Lubonjës kanë ngjallur reagime të shumta në Kosovë, dhe citon deklaratën e Haradinajt, "se do ta padisë atë".
 
Po ashtu, aty citohen edhe deklaratat e zëdhënësit të AAK-së, Ernest Luma, i cili Lubonjën e quan “bir kurve”, pastaj mospajtimet që shfaqën ministrat Vlora Çitaku e Memli Krasniqi etj.
 
Gati të gjithë komentuesit në këtë artikull e kanë “lavdëruar” Lubonjën, duke shkruar se “ai e ka mirë” dhe se “shqiptarët e Kosovës më mirë do të kishin jetuar me Serbinë sesa të udhëhequr nga komandantët e UÇK-së”.
 
Sipas mediave vendore, komentuesit, të gjithë serbë, e kanë çuar në “qiellin e shtatë” Lubonjën për “heroizmin dhe sinqeritetin e tij”.

Marrë nga 'Zëri"

Redaksia Online
(mag/shqiptarja.com)