“Në fakt nuk kemi të bëjmë me një rast të izoluar apo me një rastësi të hidhur, por me një histori të përsëritur shpesh dhe të kthyer tashmë në praktikë, ku ato që ndryshojnë janë emrat e biznesmenëve, por ato që mbeten të pandryshueshme janë emrat e familjarëve të Berishës. Në cilin vend demokratik do të mund të imagjinohej që Kryeministri i vendit të adresonte një investitor të huaj potencial tek zyra e së bijës për konsulencë dhe për ta pajisur ose jo me licencë?
Jemi përpjekur vazhdimisht t’u japim shqiptarëve dëshmi dhe prova të argumentuara të keqqeverisjes. Nuk kemi dalë për të hedhur baltë, shpifur apo akuzuar kundërshtarët tanë politikë. Besojmë se ka një dallim të qartë midis transparencës që kërkojmë të bëjmë para shqiptarëve, të mbështetur mbi fakte ose dyshime të bazuara mbi të vërteta dhe akuzave me shumë zhurmë dhe baltë që Sali Berisha hedh mbi ne.
Ky denoncim është një rast flagrant dhe rikonfirmim i faktit se pa bekimin e së bijës së Sali Berishës, bekim i cili paguhet dhe paguhet shtrenjtë madje, nuk mund të investosh në Shqipëri. Kjo është ekonomia e tregut ky është modeli i zhvillimit që u predikon shqiptarëve Sali Berisha duke mbytur konkurrencën e lirë dhe të ndershme”, deklaroi Shalsi.
Deputeti socialist theksoi se askush nuk mund të qëndrojë mbi ligjin.
"Kjo provon se slogani “Përpara” domethënë “Për PARA,” justifikon plotësisht arsyen se përse Sali Berisha kërkon të qeverisë edhe për katër vjet të tjera. Por çfarë do të bëjë tani Prokuroria, kjo është një pyetje normale që e bën çdo shqiptar, pasi është njohur me këtë dëshmi të mekanizmit të korrupsionit? I takon këtij organi që të provojë që të rikthejë besimin tek qytetaret se askush nuk mund të qëndrojë mbi ligjin", tha Shalsi.
Redaksia online
(eç/shqiptarja.com)