SHBA: Anëtarët e KQZ apolitik
Janë zgjedhur sipas Kodit Zgjedho

Anëtarët e Komisionit Qendror të Zgjedhjeve të cilët u përzgjodhën dhe emëruan mbi bazën e konsensusit ndërpartiak, në përputhje me Kodin Zgjedhor, konsiderohen se janë apolitik. Është ky qëndrimi i Ambasadës së Shteteve të Bashkuara të Amerikës në Tiranë, në lidhje me debatet e forta politike në vend për shkarkimin e anëtarit të LSI-së nga KQZ-ja pas prishjes së koalicionit të kësaj force politike me qeverinë.

Duke vlerësuar vendimin e seancës plenare të së enjtes për shtyrjen e vendimit mbi këtë çështje, përmes një deklarate për mediat, Aleksandër Arvizu thekson se “me t’u emëruar, anëtarët e KQZ-së janë betuar, dhe janë të detyruar, që të kryejnë detyrat e tyre për të realizuar zgjedhje të lira, të ndershme e demokratike në Shqipëri”.

Në reagimin e Shteteve të Bashkuara të Amerikës, theksohet më tej se “duke pasur parasysh një kontekst të tillë – si dhe për hir të qartësisë morale – ne nxisim të gjitha aktorët politikë që të riafirmojnë përkushtimin e tyre të shpallur ndaj integritetit dhe transparencës procedurale kur shqyrtojnë çfarëdo veprimi të mundshëm lidhur me përbërjen e KQZ-së”.

Në përfundim, ambasada e SHBA vë theksin në nxitjen e partive politike që ta përdorin këtë kohë për diskutime konstruktive dhe konsultime të gjera”.


Deklarata e plotë e Ambasadës së SHBA

Ne mirëpresim vendimin e sotëm për të shtyrë votimin e kuvendit mbi anëtarësinë në KQZ, dhe nxisim partitë politike që ta përdorin këtë kohë për diskutime konstruktive dhe konsultime të gjera. Shtetet e Bashkuara iu kanë bërë thirrje në mënyrë konseguente dhe të përsëritur të gjithë aktorëve politikë në Shqipëri – atyre në qeveri dhe atyre në opozitë – që të veprojnë në mënyra të tilla që rrisin besimin e publikut në ndershmërinë dhe integritetin themelor të procesit zgjedhor. Të tilla veprime do të përmirësonin perspektivën që rezultati i zgjedhjeve të pranohet nga të gjitha palët dhe nga publiku, në të mirë të demokracisë dhe integrimit më të thellë të Shqipërisë në bashkësinë euroatlantike të kombeve.

Për sa i përket përbërjes së Komisionit Qendror të Zgjedhjeve (KQZ), është me rëndësi të mbahet mend që anëtarët e KQZ-së – të cilët u përzgjodhën dhe emëruan mbi bazën e konsensusit ndërpartiak, në përputhje me Kodin Zgjedhor – konsiderohen se janë apolitikë. Me t’u emëruar, anëtarët e KQZ-së janë betuar, dhe janë të detyruar, që të kryejnë detyrat e tyre për të realizuar zgjedhje të lira, të ndershme e demokratike në Shqipëri. Duke pasur parasysh një kontekst të tillë – si dhe për hir të qartësisë morale – ne nxisim të gjitha aktorët politikë që të riafirmojnë përkushtimin e tyre të shpallur ndaj integritetit dhe transparencës procedurale kur shqyrtojnë çfarëdo veprimi të mundshëm lidhur me përbërjen e KQZ-së.
(ad.ti/shqiptarja.com)

(ad.ti/shqiptarja.com)

TAG:
• kqz