SHBA, vogëlushja korçare
operohet me sukses në zemë

Një vogëlushe shqiptare, që ka lindur me probleme në zemër, ka shpëtuar për mrekulli pas një ndërhyrjeje kirurgjikale në shtetin amerikan të Indianës. Vajza rreth 9-muajshe, Luna Kosta, udhëtoi nga qyteti i lindjes, Korça, drejt Indianës, me ndihmën e organizatës “Gift of Life International.

"Kjo është një mrekulli,"-  është shprehur halla e saj Natasha Vasili, e cila jeton me familjen e saj në West Lafayette.

Luna ka lindur më 30 nëntor 2012 dhe është fëmija e parë e Klaidi dhe Mariela Kostës. Gëzimi i tyre u venit kur ata mësuan se vajza e tyre kishte një problem në zemër. Nga konsultimet me mjekët u mësua se për Lunën ishte e nevojshme një ndërhyrje kirurgjikale e vështirë, e pamundur të kryhej në Shqipëri.

Familja Vasili ia bëri të ditur historinë e Lunës, spitalit të fëmijëve "Riley" në Indianapolis dhe u angazhua për të grumbulluar paratë e duhura për operacionin e saj, nga bashkëqytetarët.

Dhe, në fund të pranverës së këtij viti, familja Kosta mori lajmin shpresëdhënës se organizata “Dhurata e Jetës” do të mbulonte të gjitha shpenzimet mjekësore të vogëlushes, një përgjigje kjo për të gjitha lutjet e tyre.

Tashmë, Luna e vogël është në gjendje të mirë shëndetësore dhe do të kthehet në Shqipëri së bashku me familjen e saj, muajin e ardhshëm.



(Në foto: Vogëlushja Luna Kosta dhe familjarët e saj)

Redaksia online
(Ludmilla Çenga/ar.sh/shqiptarja.com)