Donald Trump thotë se bisedimet SHBA-Iran mund të rifillojnë “në dy ditët e ardhshme”, por Teherani thotë se nuk ka “asnjë informacion” për ndonjë marrëveshje për një takim të dytë.

“Lufta në Iran është pothuajse e përfunduar. E konsideroj shumë pranë fundit”, ka thënë presidenti amerikan. “Bisedimet me Iranin mund të rifillojnë në dy ditët e ardhshme, por po mendojmë për një vend tjetër që të mos jetë Pakistani”, vijoi ai.

Zëvendëspresidenti i SHBA-ve, JD Vance, thotë se Trump dëshiron të arrijë një “marrëveshje të madhe” me Iranin, por pranon vështirësinë e zgjidhjes së mosbesimit midis vendeve. Ndërkohë, Vance mund të jetë udhëheqësi i delegacionit të raundit të dytë të negociatave.

Vance deklaroi se Trump “nuk dëshiron të bëjë një marrëveshje të vogël. Ai dëshiron të bëjë një marrëveshje të madhe. Ky është shkëmbimi që ai po ofron dhe që Trump po i thotë Iranit: ‘Nëse angazhoheni të mos keni një armë bërthamore, ne do ta bëjmë Iranin të lulëzojë. Do ta bëjmë ekonomikisht të begatë dhe do ta ftojmë popullin iranian në ekonominë botërore në një mënyrë që nuk ka qenë kurrë gjatë gjithë jetës sime’”, shpjegoi ai.

Zëvendëspresidenti deklaroi se ka shumë “mosbesim” midis Uashingtonit dhe Teheranit, i cili nuk mund të zgjidhet brenda një dite, por shtoi se negociatorët iranianë duan të arrijnë një marrëveshje dhe se ai ndihet “shumë i sigurt”.

Izraeli dhe Libani po synojnë të zhvillojnë negociata të mëtejshme të drejtpërdrejta pasi ranë dakord të punojnë drejt reduktimit të ndikimit të Hezbollahut të mbështetur nga Irani.

Bllokada detare e SHBA-ve ndaj porteve iraniane është “zbatuar plotësisht” dhe ka “ndalur plotësisht tregtinë ekonomike”, thotë admirali Brad Cooper i Komandës Qendrore.

Ndërkohë, Kina e quan bllokadën “të rrezikshme dhe të papërgjegjshme”, ndërsa Irani thotë se ajo është shkelje e sovranitetit të tij.

Një anije cisternë kineze është kthyer në Ngushticën e Hormuzit pasi kishte lënë Gjirin një ditë më parë, duke mos arritur të kalojë bllokadën e vendosur nga Shtetet e Bashkuara. Tetë anije kanë zbatuar udhëzimet e forcave amerikane për të ndryshuar kurs dhe për t’u kthyer në një port iranian.

Lajm në përditësim…

Rendit zhvillimet sipas orarit:
Ora 08:44
SHBA, Izraeli e Libani flasin njëzëri: Vijojmë negociatat

Izraeli, Libani dhe Shtetet e Bashkuara kanë lëshuar një deklaratë të përbashkët në përfundim të bisedimeve në Uashington, duke theksuar se “të gjitha palët kanë rënë dakord të nisin një proces negociatash të drejtpërdrejta, në një vend dhe kohë që do të përcaktohen, si dhe mbi formatin e tyre”.

Nga pala amerikane u bë e ditur se Shtetet e Bashkuara “mbështesin planet e qeverisë libaneze për të rikthyer monopolin mbi armët dhe për t’i dhënë fund ndikimit të brendshëm iranian, si edhe të drejtën e Izraelit për vetëmbrojtje”.

Nga pala izraelite u komunikua se “është shprehur mbështetje për çmontimin e të gjitha organizatave të armatosura joqeveritare dhe të infrastrukturave terroriste në Liban, duke nënvizuar angazhimin për të bashkëpunuar me qeverinë libaneze për arritjen e këtij objektivi”.

P.J/Shqiptarja.com

Ora 08:31
Irani kërkon të afrohet me Evropën për të rritur presionin mbi Shtetet e Bashkuara

1775889992_luftaniran.jpg

Foto: Flamuri i SHBA-së dhe Iranit 

Me qëllim rritjen e presionit mbi Shtetet e Bashkuara për të bërë kompromis në konfliktin me vendin e tij, Ministri i Jashtëm iranian Abbas Araghchi i informoi kryeqytetet evropiane mbi natyrën e ofertës që Irani kishte deklaruar se ishte i gatshëm të bënte në lidhje me rezervat e tij të uraniumit të pasuruar shumë dhe menaxhimin e ardhshëm të Ngushticës së Hormuzit gjatë bisedimeve të fundjavës në Islamabad. Raporton The Guardian.

Pas bisedimeve të pafrytshme, Araghchi zhvilloi biseda telefonike me ministrat e jashtëm francezë dhe gjermanë Jean-Noël Barrot dhe Johann Wadephul, si dhe me ministrat e jashtëm të Arabisë Saudite, Omanit dhe Katarit.

Ai theksoi se Irani nuk e konsideronte procesin e udhëhequr nga Pakistani të shteruar, edhe pas 21 orësh bisedimesh intensive.

Evropa është lënë mënjanë nga Donald Trump në çështjen e Iranit për më shumë se një vit, pasi presidenti amerikan është përqendruar në bashkëpunimin me Izraelin, ndërsa Teherani ka injoruar kryesisht qeveritë evropiane, duke i parë ato si besnikë të SHBA-së. Megjithatë, shenjat e një përçarjeje transatlantike në thellim dhe presionit të fortë mbi ekonomitë evropiane e kanë shtyrë Iranin të rishqyrtojë qëndrimin e tij ndaj Evropës, të cilën e sheh si një levë të mundshme kundër Trump.

Xh.K/Shqiptarja.com