Në nisje të sezonit turistik, plazhi i Velipojës i ngjan një gërmadhe. Kjo është pamja, një ditë pas shembjes së objekteve me strukturë të lehtë.

Gjatë aksionit të IKMT-së janë dëmtuar ndriçuesit e vendosur nga bashkia në shëtitore.

Në total u shembën 24 objekte gjatë të mërkurës dhe të enjtes. Ndërtimet pa leje në bregdet ishin kryesisht lokale verore. Pas aksionit IKMT u largua nga Velipoja duke lënë pas pirgje me mbetje dhe inerte.

Aksioni i Inspektoriatit Kombëtar të Territorit i mbështetur nga dhjetëra forca policore u kundërshtua nga pronarët, ku pasditen e së enjtes u shënuan incidente.

Më herët në mbrojtje të tyre kishte dalë kryetarja e bashkisë së Shkodrës, Voltana Ademi, e cila i kërkoi ministrit të Brendshëm Sandër Lleshaj shtyrjen e aksionit për në shtator.

Për shembjet reagoi edhe kreu i Partisë Demokratike, Lulzim Basha, i cili akuzoi kryeministrin Rama se po grabit tokat në Velipojë për tua dhënë plazhin oligarkëve.