SHËNGJIN- Banorët e prekur nga tërmeti i 26 nëntorit që vijojnë të jenë të strehuar në Shëngjin, janë hequr nga lista e trajtimit ushqimor. Ata duhet të lirojnë hotelet ku qëndrojnë prej më shumë se 2 muajsh, pasi bashkia e Kurbinit e ka mbyllur kontratën me këto subjekt.

Vendimi nuk është pritur aspak mirë nga banorët, të cilët thonë se nuk kanë ku të strehohen dhe kërcënojnë me veprime ekstreme nëse nuk do gjendet një zgjidhje për ta.

"Ne nuk kemi ku të shkojmë, jemi me fëmijë dhe mamanë e kam të sëmurë bëjmë apel që të na gjendet një strehim", tha një banore.

"Unë me tre fëmijë, nuk na kanë dhënë bonus dhe pa pikë turpi na thonë që të dalin dhe të aplikojmë për çadër. Nuk dal nga këtu sikur të bëhet nami, aty do rri bashkë me 3 fëmijët", tha një tjetër banore.

"Shkuam aty për të dhënë firmën, na thanë që duhet të dalim. I thashë ku të shkoj unë jam 13 vetë, me fëmijë të vegjël", tha një tjetër.

"Jam nënë e 8 fëmijëve, nuk kam ku të shkoj vetëm të dal para makinave", u shpreh  një tjetër banore.

Kryetarja e Bashkisë së Kurbinit,  Majlinda Cuka deklaroi se do të largohen banorët të cilët kanë përfituar bonus qiraje ndërkohë banorët thonë se vijojnë të qëndrojnë në hotele pasi nuk gjejnë banesa me qira, për shkak se një pjesë e tyre nuk kanë përfituar bonus apo pagesa nuk iu është levruar ende.