Një konflikt për zhurmën ka përfunduar me të shtëna me armë zjarri në rrugën “Selaudin Zorba”, në Tiranë, rreth orës 03:30 të mëngjesit.

Sipas informacioneve paraprake, gjatë sherrit një 45-vjeçar ka nxjerrë armën, por një person i ka kapur dorën në përpjekje për ta ndaluar.

Nga e shtëna ka mbetur i dëmtuar lehtë një 37-vjeçar që ndodhej pranë vendngjarjes. Policia ka identifikuar dhe shpallur në kërkim 45-vjeçarin, ndërsa po punon për kapjen e tij.

“Identifikohet dhe shpallet në kërkim një 45-vjeçar, i cili dyshohet se ka qëlluar me armë zjarri në ajër, ku mbeti i dëmtuar lehtë një shtetas.

Shërbimet e Komisariatit të Policisë Nr. 4, pas njoftimit të marrë se rreth orës 03:30, në rrugën “Selaudin Zorba”, një shtetas kishte qëlluar me armë zjarri në ajër, organizuan menjëherë punën dhe shkuan në vendngjarje, për të sqaruar rrethanat dhe autorësinë e rastit.

Si rezultat i veprimeve të para hetimore, u bë i mundur identifikimi i autorit të dyshuar, shtetasit Xh. Xh., 45 vjeç, i cili u shpall në kërkim dhe vijon puna për lokalizimin dhe kapjen e tij.

45-vjeçari, dyshohet se pas një konflikti për motive të dobëta ka qëlluar me armë zjarri në ajër. Si pasojë në afërsi të vendit të ngjarjes ndodhej shtetasi M. G., 37 vjeç, i cili ka mbetur i dëmtuar lehtë”, njofton Policia.

Materialet procedurale iu referuan Prokurorisë, për veprime të mëtejshme.