Shfaqja "Qejfharami", Bora sjell
“portretin e vërtetë” të pushtetarit

“Qejfharami” është drama satirike e regjisorit dhe autorit Armand Bora që erdhi premierë mbrëmjen e kësaj të diele në një mjedis dhe interpretim krejt ndryshe në Cirkun Kombëtar në kryeqytet.
 
Shfaqja është ndërtuar bazuar në parimet e Teatrit Polifonik, çka e dallon nga shfaqjet klasike teatrale për mënyrën se si aktori përdor trupin dhe lëvizjet skenike.
 
Bora, vjen kështu sërish me një version grotesk të trajtimit të diktaturës duke nxjerrë në pah komplekset e shoqërive postdiktatoriale që ende shqetësojnë shqiptarët, por kësaj herë duke çmitizuar Edipin përmes vendosjes së tij në rrethana komike.
 
Në rolin e Edipit është Aleks Seitaj, djali Edvin Mustafa, në rolin e shefit është Shegushe Bebeti, në rolin e shitësit Suela Bako, oborrtari Anila Muçaj, vajza Jorida Meta dhe në rolin e nënës mbretëreshë Rexhina Mollaymeri.
 
Formulimi muzikor nga Sokol Marsi, lëvizja skenike Fatjon Sulstarova dhe mjeshtër i artit marcial Shihan Enver Cakiqi. Mjeshtër i cirkut Kujtim Dumi dhe maskat janë realizuar nga Merita Spahiu. Historia e këtij Edipi mbivendoset me situata dhe rrethana që kanë jetuar personazhe të tjerë të rëndësishëm në historinë e njerëzimit si Stalini, Makbethi apo perandori Kaligula.
 
Shfaqja tenton të ironizojë forcën e pushtetit, që në lashtësi e deri në ditët tona, ndërsa Bora ka dashur të sjellë atë që e quan portretin e vërtetët të një pushtetari, që në thelb mbetet i njëjtë pavarësisht kohës të një pushteti.
 
Një element tjetër që e bën të veçantë këtë produksion është edhe vendimi për të dhuruar një pjesë nga të ardhurat e shitjes së biletave në ndihmë të disa familjeve në nevojë. Kostumet e realizuara nga Anila Zajmi Katanolli janë të konceptuara mbi të njëjtat parime estetike dhe filozofike që është ndërtuar shfaqja.
 
Për realizimin e shfaqjes është punuar duke u ushtruar me teknikat e arteve marciale dhe teknika të artit të cirkut. Shfaqja u vu në skenë nga “Theatre of the day” (Teatri I Ditës) në bashkëpunim me Teatrin Kombëtar dhe Cirkun Kombëtar, të dielën prezanton shfaqjen “Qejfharami”.







Redaksia Online
Al.N/Shqiptarja.com