I gjithë vendi është përfshirë sot nga një mot i ftohtë me reshje të dendura shiu dhe ulje temperaturash. Emergjencat Civile janë në gatishmëri për përballjen e situatave të vështira, ku në disa zona pritet të ketë dhe përmbytje. Deri në orët e para të mëngjesit të sotëm nuk janë paraqitur probleme serioze, përveç disa zonave që kanë mbetur pa energji elektrike në Qarkun e Kukësit.

Informacion mbi situatën e krijuar nga zhvillimet klimaterike në Qarkun e Kukësit datë 30.11.2017 ora 08.00.
Situata në Qarkun e Kukësit gjatë datës 30.11.2017 ora 08.00 është si më poshtë: Situata klimaterike: Në orët e vona të datës 29.11.2017 e në vazhdim Qarku i Kukësit është përfshirë nga reshje shiu me intensitet mesatar shoqëruar me erëra deri në 12 m/s me drejtim nga Jugu. Temperaturat variojnë minimale 8 Gradë Celsius e aktuale 9.6 Gradë Celsius. Shikueshmëria 7 km. Nga informacionet e marra nga strukturat e emergjencave civile në Bashkitë, institucionet përgjegjëse e verifikimin në vend, aktualisht kemi këtë situatë:

Akset rrugore: Aktualisht të gjitha aktet rrugore që përshkojnë Qarkun e Kukësit janë të qarkullueshme pa probleme. Për shërbimet publike: Aktualisht nuk kemi probleme të veçanta për shërbimet publike. Për energjinë elektrike: Në përgjithësi furnizimi me energji ka qenë normal në të gjithë Qarkun.

Ka probleme në furnizimin me energji elektrike në Nj.A Ujmisht dhe Nj.A Bushtricë, Nj Grykë –Çaj e Nj.A Malzi të Bashkisë Kukës. Ka probleme në furnizimin me energji elektrike në Nj.A Golaj, fshatrat Mujaj, Dajç e Cahan të Nj.A Qendër Krumë të Bashkisë Has. Në Bashkinë Tropojë është pa energji elektrike Nj.A Llugaj. Nga grupet e punës po punohet për eliminimin e avarive.

Komisioni i Emergjencave Civile vazhdon të ndjekë situatat që po zhvillohen, si pasojë e situatës klimaterike duke marrë masat përkatëse.

Për shkak të situatës sinoptike të pritshme sot me datë 30.11.2017 nga Prefekti i Qarkut Kukës janë thirrur në një takim urgjent firmat kontraktore të akseve rrugore në shkallë Qarku së bashku me Komisionin i Emergjencave Civile për të diskutuar situatën aktuale klimaterike e marrjen e masave përkatëse.

kukes
(Ja si u 'zgjua' Kukësi sot, nuk paraqiten probleme në qarkullim)

d.c./shqiptarja.com