Shkelën Shengenin për shkak të COVID-it, Denaj: Sot nis aplikimi, qytetarëve që u gjobitën do u japim lekët

Të gjithë qytetarët që kanë marrë gjobë për shkak të shkeljes së lejes së qëndrimit në një shtet të huaj për shkak të pandemisë COVID-19, do të rimbursohen nga shteti, aq sa është edhe vlera e penalitetit. 

Përfitues do të jenë ata persona që janë ndëshkuar nga data 10 mars deri më 1 qershor. Ministrja e Financave Anila Denaj njoftoi se për rimbursimin e tyre do të alokohet një fond nga buxheti i shtetit dhe se të gjithë qytetarët duhet të aplikojnë pranë drejtorisë së tatimeve.

“Është alokuar një fond nga buxheti i shtetit për të rimbursuar vlerën e penaliteteve që shtetasit kanë marrë si pasojë e qëndrimit jashtë republikës së Shqipërisë për periudhën 10 mars-1 qershor 2020.

Sipas këshillit të ministrave çdo qytetar duhet të aplikojë pranë administratës tatimore, që dorëzon dokumentet që vërtetojnë marrjen e penalitete dhe rimbursimi do të ndodhë i plotë në lekë. Aplikimi nis prej ditës së sotme dhe brenda muajit qershor i gjithë fondi i akorduar do të disbursohet”, tha Denaj.

Çdo individ, shtetas shqiptar, që është gjobitur nga autoritet ndërkombëtare, për shkelje të afatit të lejes së qëndrimit duhet të dorëzojë disa dokumente, të tilla si dokumentin që vërteton marrjen e gjobës, çdo dokument që vërteton kryerjen e pagesës së saj, të dhënat individuale të llogarisë bankare emër banke dhe IBAN, si dhe një numër kontakti personal.

/r.k./Shqiptarja.com

TAG:
• Ministria e Financave
• anila denaj
• Koronavirus
• koronavirusi ne shqiperi