Deputetja e Partisë së Lirisë ka ndarë një reagim në rrjetet sociale për nisjen e gjyqit në themel për Ilir Metën si një seancë që shkeli standardet e procesit të rregullt ligjor.

Xhixho shprehet se mohimi i transparencës, kufizimi i fjalës dhe izolimi janë “shenjat më të qarta të një regjimi të kalbur.” Ajo shkruan se mostransmetimi publik i seancës, një kërkesë e shprehur nga ish-presidenti, provon frikën nga e vërteta. Sipas saj, kjo është vetëm filozofi e politikave të Ramës për t’u mbyllur gojën kundërshtarëve.

Më tej, shton se Meta nuk i është shmangur asnjëherë drejtësisë dhe shpreh bindjen e plotë se do ta fitojë betejën, kurse sistemi “është i kapur.”

Reagimi i Xhixhos:

Një proces politik i paligjshëm dhe shkelje e çdo të drejte themelore të njeriut që po i bëhet Ilir Metës.

Ajo që nisi një vit e gjysmë më parë me një rrëmbim kriminal, vijoi sot me një seancë gjyqësore që shkeli hapur çdo standard të një procesi të rregullt ligjor. Një seancë e zhvilluar në izolim, pa transparencë dhe me kufizim të qëllimshëm të të drejtës së fjalës për një ish-Kryetar Shteti.

Kjo nuk është kurrën e kurrës drejtësi. Ky është thjesht dhe vetëm një narkoregjim.

Sot, shqiptarët panë se si trajtohen kundërshtarët politikë në Shqipërinë e Edi Ramës: ata izolohen, keqtrajtohen në burgje, u mohohet fjala dhe mbahen larg publikut, sidomos kur janë figura si Ilir Meta, që njeh të vërtetat që i dhembin narkoregjimit.

Ish-Presidenti i Republikës, ish-Kryetari i Kuvendit dhe ish-Kryeministri i vendit, Ilir Meta, u mbajt i mbyllur, pa mundësi komunikimi me publikun dhe median, në një shkelje flagrante të të drejtave themelore sipas një skenari mafioz të organizuar në zyrat e qeverisë.

Kjo është filozofia e një narkoregjimi mafioz që, kur nuk blen dot kundërshtarët, përpiqet t’u mbyllë gojën me çdo mënyrë.

Mungesa e transparencës sot nuk ishte thjesht problem procedural — ishte provë e një frike të thellë nga e vërteta dhe bunkerizimi i sallave të gjyqit u bë për të dënuar në mënyrë të paligjshme kundërshtarët politikë.

Ilir Meta nuk i është shmangur asnjëherë drejtësisë. Ai ka përballuar çdo betejë me dinjitet dhe deri në fund.

Ky nuk është thjesht një gjyq politik. Ky është një krim politik.

Mohimi i transparencës, kufizimi i fjalës dhe izolimi i qëllimshëm janë shenjat më të qarta të një regjimi të kalbur dhe që ka frikë shumë të madhe.

Fjala e Ilir Metës diskrediton plotësisht ata që sajuan një dosje të manipuluar, pa prova, fakte e dokumente, por vetëm me urdhër politik.

Dhe kur një regjim ka frikë nga e vërteta, ai nuk prodhon më drejtësi, por vetëm padrejtësi me regji.

Ilir Meta do ta fitojë pa as më të voglin dyshim edhe këtë betejë, por sistemi i drejtësisë së “re” është damkosur shumë rëndë si i kapur dhe në krah të antiligjit.

P.J/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 25 Prill, 21:24

    A duhet që seancat në GJKKO të transmetohen live për publikun?

Lajme të tjera