Shpërthim gazi te karburant ‘Eida’ në Tiranë, plagosen 3 punonjës! Dy versione për shkakun, Zjarrfikësja: Dyshohet se erdhi nga zyra! ISHTI: Flakët nisën nga një makinë! 3 të shoqëruar

TIRANË-Ishte ora rreth 06:00 e mëngjesit, kur një shpërthim i fuqishëm tronditi banorët e zonës pranë Brrylit në Tiranë, në bulevardin “Zhan D’Ark”. Ndërtesa njëkatëshe e zyrave të pikës së karburantit Eida, u kthye në gërmadhe, ndërsa 3 punonjës mbetën të lënduar

Në vendngjarje mbërritën forca të shumta zjarrfikëse, të cilat arritën brenda një kohe të shkurtër të vënë nën kontroll flakët që pasuan shpërthimin, si dhe të mbyllnin një valvulë gazi

Pranë pikës së karburantit, ndodhet një “Volkswagen Polo”, që po furnizohej në momentin e shpërthimit. Makina u dëmtua vetëm në pjesën anësore që ishte përballë me zyrat shumë pranë pompave të gazit. Pasojat e shpërthimit shihen edhe përtej rrugës, ku duken xhamat e shkërmoqur prej valës së goditjes.

Shkakun e shpërthimit do e përcaktojë një hetim i plotë në vijim, por deklaratat paraprake e institucioneve përgjegjëse vetëm sa kanë ushqyer pikëpyetjet mbi ngjarjen. Fillimisht, Policia njoftoi se dyshohet se ka shpërthyer bombola e gazit gjatë kohës një automjet po furnizohej me karburant. 

“Tek “Brryli”, në një karburant, dyshohet se ka shpërthyer një bombul gazi, gjatë kohës që po furnizohej me karburant një automjet. Si pasojë, janë dëmtuar 3 persona, punonjës të karburantit, të cilët janë dërguar në spital për mjekim, jashtë rrezikut për jetën”, njoftoi Policia.

Por drejtori i Zjarrfikëses së Tiranës, Shkëlqim Goxhaj në një prononcim për mediat tha se kanë dyshime se shpërthimi mund të ketë ndodhur në zyrën e karburantit, e cila është shembur totalisht. Sipas shefit të zjarrfikëseve, Goxhaj, është vënë re dhe një rrjedhje gazi

“Nga ajo që dyshojmë, mendojmë se shpërthimi ka ndodhur në zyrat e pikës së karburanti. Zyrat janë rrëzuar, edhe vetë pika e karburantit pjesa para nuk është përfshirë nga flakët por është dëmtuar nga shpërthimi. Edhe xhamat që janë përhapur këtu na bën ne të mendojmë që shpërthimi është në zyrat e karburantit.

Përfaqësuesit e bizneseve na thonë që një automjet mund ketë goditur zyrat e karburantit, por mbetet për t'u parë, do shihen kamerat e sigurisë. Do ta hetojmë nëse ka qenë defekt teknik i karburantit”, tha Shkëlqim Goxhaj.

Tjetër version ka Inspektorati Shtetëror Teknik dhe Industrial, i cili thotë se shpërthimi nisi nga automjeti.

“Nga vlerësimi paraprak i grupit të inspektimit të ISHTI-t në stacionin e shitjes me pakicë të karburanteve “Skënderi G” sh.p.k., me vendndodhje te Brryli, Tiranë, rezulton se nuk ka pasur shpërthim të rezervuarëve të karburanteve. Dyshohet se zjarri ka nisur nga një automjet në territorin e stacionit të karburanteve, i cili është shoqëruar edhe me eksplozion” tha ISHTI në një reagim paraprak nga mediat.

Në Komisariatin nr. 1 u shoqëruan administratori, drejtuesi teknik dhe menaxheri i karburantit. Në pyetje u morën edhe punonjësit e dëmtuar, të cilët janë jashtë rrezikut për jetën te Spitali i Traumës, si dhe drejtuesi i automjetit që po furnizohej me gaz në momentin e shpërthimit.

Paralelisht po verifikohet i gjithë dokumentacioni i pikës së karburantit, për të kontrolluar aktivitetin e saj, kontrollet e kryera ndër vite dhe nëse dispononte lejet përkatëse të parashikuara nga ligji. Pika e karburantit me emrin tregtar “Eida” rezulton e regjistruar si “Skënderi G” sh.p.k. dhe është në pronësi të Frident Kuqit.

Xh.K/SI.E./Shqiptarja.com

TAG:
• Tirane
• karburant
• shperthim
• eida
• Frident Kuqi
• ISHT
• Shkëlqim Goxhaj