Ministria e Financave ka nisur përgatitjet për të dalë përsëri në tregjet ndërkombëtare në 2027-ën për të marrë një eurobond me vlerë 650 milionë euro, që do të përdoret kryesisht për shlyerjen e një borxheve të mëparshme.

Deri në qershor të vitit 2027 Shqipëria duhet të shlyejë eurobondi 650 milionë euro të marra në 2020-ën, dhe brenda 2028-ës, mbyllet borxhi 600 milionë euro i marrë në 2023-shin.

Tanimë qeveria ka nisur punën për të emetuar një eurobond të ri, prej 650 milionë eurosh, i cili do të përdoret kryesisht për të shlyer huatë e mëparshme.

Ndërsa dy eurobondet e vitit 2021 dhe ai i 2025-ës, mbyllen pas 2030-ës.

Për këtë huamarrje të re, Ministria e Financave po merre edhe mbështetje parapërgatitore nga Erste Group Bank AG është një nga grupet më të mëdha financiare në Evropën Qendrore dhe Lindore, me seli në Vjenë, Austri. E themeluar në vitin 1819 si banka e parë e kursimeve në Austri. Në takim me ta ishte zëvendësministri i Financave Endrit Yzeiraj, i cili njofton edhe nisjen e përgatitjeve, ndersa zyrtarisht procedura për emetimin e eurobondit të 8, ku do të kërkohen edhe konsulentët ndërkombëtar, do të jetë gati në shtator.

 “Me përfaqësuesit e Erste Group, një konglomerat financiar austriak, i përqendruar në Evropën Qendrore dhe Lindore, diskutuam mbi: Zhvillimet më të fundit makroekonomike; Planet tona për huamarrje në tregjet ndërkombëtare të kapitalit; Bashkëpunime të mëtejshme të partnerëve ndërkombëtarë në ekonominë tonë”, shkruan Yzeiraj.

Gjithashtu takime informuese për daljen e radhës në treg janë zhvilluar edhe përtej oqeanit, me Bank of America banka e dytë më e madhe në SHBA dhe një nga gjashtë më të mëdhatë në botë. 

Dalja e fundit në tregjet ndërkombëtare ishte në shkurt të vitit te kaluar, kur u emetua eurobondi 10- vjeçar, me shumë 650 milionë euro me interes 5%.

Referuar raportit të Ministrisë së Financave borxhi i vendit ra për herë të parë në 49.02%, ose afro 3.9% më pak se në fund të vitit të kaluar. Afro 20% e borxhit publik të vendit është marrë në monedhë të huaj.