TIRANË- Shkarkimi i Arben Malajt nga posti në Këshillin Mbikëqyrës të Bankës së Shqipërisë do duhet të kalojë në disa faza para se të vijë në Kuvendin e Shqipërisë. Kjo çështje ishte parashikuar në rendin e ditës së Kuvendit por u hoq vetëm pak para nisjes së seancës. Siç njoftoi kreu i Kuvendit Gramoz Ruçi procedurat për shkarkimin e Malajt do duhet të nisin përmes Këshillit të Ministrave për t'i lënë vend nisjes së procedurave të tjera sipas rregullores së Kuvendit, komisionet dhe mandej seanca e Kuvendit.
"Lidhur me këtë çështje njoftoj nismëtarët dhe kuvendin se kërkesa nga ana ime i është përcjellë Këshillit të Ministrave për kompetencë, pasi në zbatim të nenit 47/1 të ligjit për BSH Këshilli i Ministrave është ai që nis procedurën dhe nëse ai e nis vihen në lëvizje procedurat e tjera sipas rregullores së Kuvendit, komisionet dhe mandej seanca e Kuvendit." u shpreh Ruci.
Partia Socialiste kërkon shkarkimin e Arben Malajt si anëtar i Këshillit Mbikëqyrës të Bankës të Shqipërisë me argumentin se ka shkelur kodin e etikës në daljen e tij publike.
Deputetët e Partisë Socialiste kanë mbledhur 28 firma, me anë të të cilave kërkojnë që Arben Malaj të lirohet nga posti i tij.
Në letrën e firmosur nga 28 deputetët socialistë thuhet se Malaj ka kryer shkelje etike në daljet publike duke bërë deklarata politike, gjë të cilën nuk ia lejon posti i tij e Bankës së Shqipërisë. Edhe institucioni i Bankës së Shqipërisë përmes një reagimi publik pohoi shkeljen e pretenduar nga socialistët.
Banka e Shqipërisë theksoi se në përcaktimin e parimeve bazë të sjelljes së anëtarëve të Këshillit Mbikëqyrës, Kodi i Etikës sanksionon detyrimin e tyre për të qenë të ndërgjegjshëm për rëndësinë e detyrave dhe të përgjegjësive të tyre, pasi përfaqësojnë organin më të lartë vendimmarrës dhe mbikëqyrës të Bankës së Shqipërisë.
