Kryeministri i Sllovakisë, Robert Fico, ka paralajmëruar se vendi i tij mund të ndërpresë furnizimin emergjent me energji elektrike për Ukrainë, nëse furnizimi rus me naftë nuk rikthehet deri të hënën.

“Nëse furnizimet me naftë për Sllovakinë nuk rifillojnë të hënën, do t’i kërkoj SEPS-it, kompanisë aksionare shtetërore, të ndalojë furnizimet emergjente me energji elektrike për Ukrainën”, tha Fico në një postim në X.

Kërcënimi vjen vetëm një ditë pasi Hungaria njoftoi se do të bllokojë një kredi emergjente prej 90 miliardë eurosh për Ukrainën për shkak të tubacionit të dëmtuar. 

Sllovakia, së bashku me Hungarinë, është një nga vetëm dy vendet e BE-së që ende mbështeten në sasi të konsiderueshme të naftës ruse të transportuar nëpërmjet tubacionit Druzhba të epokës sovjetike që kalon në territorin ukrainas. 

Sllovakia ka luajtur një rol kyç si furnizues evropian i energjisë elektrike për Ukrainën, duke mbuluar boshllëkun e krijuar pas dëmtimeve të mëdha në rrjetin elektrik të vendit nga sulmet ruse.

Që nga tetori i vitit të kaluar, Rusia ka intensifikuar sulmet e saj me dronë dhe raketa ndaj sistemit energjetik të Ukrainës, duke ndërprerë energjinë elektrike.

Ukraina ka lejuar që territori i saj të përdoret për eksportet e energjisë ruse në Evropë, të cilat janë kufizuar ndjeshëm, por nuk janë ndaluar.