TIRANË- Ambasadori i BE, Luigi Soreca i ka drejtuar një mesazh palëve politike në Shqipëri përpara Konferencës së Parë Ndërqeveritare. Ai u ka bërë thirrje që të gjejnë konsensus politik, në një kohë kur Shqipëria është shumë afër përmbushjes së kushteve të kërkuara nga Bashkimi Europian.

 "Moment kritik", e cilëson Soreca, për pasoja ambasadori vë theksin te bashkëpunimi me palëve për të çuar përpara vendin drejt integrimit Europian.

"Shqipëria vazhdoi të bëjë përparim dhe marsin e kaluar bëri një hap të madh me BE kur vendosi të hapë negociatat e pranimit. Tani Shqipëria është afër përmbushjes së kushteve të kërkuara. Në këtë moment kritik, të gjitha palët politike duhet të investojnë në ndërtimin e konsensusit të domosdoshëm politik, dhe të gjitha institucionet e pavarura duhet të japin rezultatet e nevojshme, për të ndjekur objektivin e përgjithshëm që ata ndajnë.  Kjo është ajo që dëshirojnë më shumë se 90% e popullit shqiptar", shkruan Soreca. 

Ky reagim vjen një ditë pas lajmeve që kanë qarkulluar në disa portale online e Holanda ka bllokuar integrimin e Shqipërisë në BE. Lidhur me këtë lajm reagoi ditën e sotme sekretari i Përgjithshëm i Partisë Socialiste, Taulant Balla i cili tha se përfaqësues të Holandës kanë vlerësuar punën e Shqipërisë në reformat e kryera.

"KE sikurse të gjithë jeni në dijeni, ka vlerësuar se Shqipëria i ka përmbushur parakushtet. Nuk dua të hyj në polemikë, kam pasur me kolegë të tjerë deputetë shqiptarë dhe përfaqësuesë një video-konferencë online me parlamentin holandez, me Komitetin për Çështjet Europiane. Edhe nga kolegët nga ana e Holandës kemi marrë vlerësimet për arritjen dhe parakushteve deri në momentin që flasim", tha më herët Balla.

Ndërkohë, tre ditë më parë, lidhur me integrimin e Shqipërisë në BE, kryeministri Edi Rama zhvilloi një bisedë me Skype me Presidentin e Këshillit të Europës Charls Mishel, ku ky i fundit vlerësoi progresin e Shqipërisë për reformat e ndërmarra nga qeveria dhe shtoi se mezi po pret konferencën ndërqeveritare mes Shqipërisë dhe BE-së për hapjen e negociatave.