Berisha protestë vetëm me militantë/ Molotovë drejt Kryeministrisë dhe efektivëve te Kuvendi, 19 policë me djegie në spital, 20 protestues të shoqëruar! (VIDEO)

Deputetët e Partisë Demokratike u janë drejtuar komisariateve ku ndodhen protestuesit.

Konkretisht, Flamur Noka, Oerd Bylykbashi dhe Eno Bozdo po shkojnë te komisariati nr. 1, ndërsa avokatët Eda Grimci dhe Franc Nuri gjenden atje.

Avokati Marash Logu gjendet në komisariatin nr. 2, ndërsa atje ndodhen Greta Bardeli, Luan Baci, Sajmir Korreshi, Igli Cara etj.

Në komisariatin nr. 6 gjendet Bardh Spahia.

Deri më tani raportohet të jenë shoqëruar rreth 20 protestues.

Krah një protestuesi që pretendon se është goditur në kokë me plumb gome, Sali Berisha ka akuzuar rëndë organet ligjzbatuese. Kreu i PD tha se protestuesi, i cili quhet Ilir Tushe është goditur nga një snajper.

“Përdorën plumba gome dhe kanë goditur protestuesin në ballë, çka përbën rrezik për jetën. Protestuesi Ilir Tusha është goditur nga snajperi pa asnjë lloj motivi. Bledion Nallbati ka marrë hematomë të ndjeshme nga goditja me shkop në kokë. Unë ju them se plumbat e gomës, kafkën në raste të caktuara mund ta shpojnë. Ilir është goditur me snajper”, tha Berisha.

Protestuesi tha se e ka marrë goditjen që në nisje të protestës te kryeministria.

“Jam goditur në momentet e para që nisi protesta te kryeministria. Isha duke bërë një ’live’ në rrjetet sociale në TikTok dhe aty m’u errësuan sytë”, tha ai.

Drejtori i Përgjithshëm i Policisë së Shtetit, Ilir Proda, ka vizituar mbrëmjen e sotme së bashku me ministren e Brendshme Albana Koçiu në Repartin e Djegieve efektivët e dëmtuar gjatë protestës së opozitës. Proda iu ka uruar efektivëve të policisë shërim të shpejtë.

Gjatë një prononcimi për median, ai ka falënderuar punonjësit e Policisë për profesionalizmin, sakrificën, durimin dhe maturinë e treguar përballë ‘një barbarie të tejskajshme’ me bomba molotov, lëndë piroteknike dhe sende të forta, ku për pasojë u lënduan 16 efektivë.

“Falënderim për të gjithë punonjësit e Policisë për profesionalizmin që kanë treguar dhe vetëm Zoti e di sa krenar jam për ta, për atë që ata bëjnë çdo ditë dhe për vetëpërmbajtjen dhe qytetarinë e tejskajshme që treguan sot, në kundërshtim me atë me të cilën u përballën, e cila ishte shenjë e një barbarie ekstreme”, tha mes të tjerash Ilir Proda.

Ndërkohë drejtori i Përgjithshëm i Policisë, Ilir Proda, iu përgjigj edhe pyetjeve të bëra nga gazetarët.

Pyetje: Mesa u vu re gjatë protestës, pati dy të mitur të cilët shfaqën veprime të dhunshme, duke hedhur sende të forta në drejtim të efektivëve. A do të shoqërohen ata, siç ndodhi edhe në protestën e shkuar, ku u shoqërua një 14-vjeçar?

Ilir Proda: Hetimet sapo kanë filluar, ekipet po kryejnë këqyrjen e vendit të ngjarjes. Ne, në vazhdimësi, kemi bërë thirrje që të miturit të distancohen. Do të nxjerrim përgjegjësitë në bashkëpunim me Prokurorinë e Tiranës dhe besoj se edhe në vijim do të kemi qëndrime për këto situata.

Pyetje: Përveç efektivëve të Policisë, a ka protestues të plagosur, me aq informacion sa keni?

Ilir Proda: Nuk kemi informacion deri më tani për protestues të plagosur.

Policia ka shoqëruar në komisariate 20 protestues, gjatë tubimit të dhunshëm të thirrur nga kryedemokrati Sali Berisha, që u zhvillua ditën e sotme.

Këta persona dyshohet se gjatë protestës së sotme të kenë kryer akte të dhunshme, si hedhje të molotovit dhe gurëve në drejtim të efektivëve.

Ndërkohë kujtojmë se nga dhuna gjatë protestës së sotme të opozitës, u plagosën 16 efektivë policie.

Sali Berisha është paraqitur në Spitalin e Traumës ku po merr trajtim deputeti Bledion Nallbati. Ky i fundit përfundoi në spital pas përplasjes me efektivët gjatë protestës së dhunshme të PD-së përpara kryeministrisë dhe parlamentit.

Ndërsa hyn brenda spitalit i shoqëruar nga Gazment Bardhi, Elda Hoti dhe të tjerë, Berisha është gjendur edhe përpara efektivëve të policisë, prej të cilëve u lënduan 16. Megjithatë, ai nuk ka bërë asnjë reagim, asnjë përshëndetje kundrejt tyre duke tërhequr vëmendjen.

Në një deklaratë për mediat, Berisha mohoi se kishte efektivë të lënduar.

“Unë pyeta dhe më thanë që nuk ka asnjë. Nëse i bien me detyrim këtu le t’i bien. Po ka të plagosur u uroj shërim të shpejtë. Nuk kam asnjë lloj hezitimi, por, por siç patë ju edhe herën e parë thanë 12, edhe doli që ishin një ose dy, sa ishin atëherë aty. Këta mashtrojnë. Policët i përdorin mish për top. I përdorin mish për top. Edi Rama dhe lubi Balluku, për të mbrojtur plaçkën e tyre, për të mos thënë atë fjalë që u shkau goja herën e parë, për të mbrojtur plaçkën e tyre, ata janë të gatshëm të sakrifikojnë policët dhe qytetarët. Janë gati t'i fusin flakën Shqipërisë. Dhe ky është, këto janë qëllime kriminale, do bëhen përgjegjës ata dhe të gjithë të tjerët”, tha Berisha.

Policia e Shtetit ka ndarë një reagim lidhur me protestën e dhunshme të Partisë Demokraitke gjatë së cilës u lënduan 16 punonjës. Policia thekson se u ka bërë vazhdimisht thirrje protestuesve për të mos përshkallëzuar në dhunë, por sulmet kanë vijuar.

Ndërkohë po vijon identifikimi i të gjitha rasteve të dhunës dhe autorëve të tyre.

“Gjatë zhvillimit të tubimit të organizuar pasditen e sotme para godinës së Kryeministrisë dhe më pas te Kuvendi, një pjesë e protestuesve kanë ushtruar akte të rënda dhune ndaj punonjësve të Policisë së Shtetit dhe institucioneve shtetërore. Policia e Shtetit, gjatë gjithë zhvillimit të tubimit iu ka bërë thirrje me megafon protestuesve të dhunshme që të distancoheshin nga dhuna, por sulmet ndaj punonjësve të policisë kanë vijuar deri në përfundim të tubimit me bomba molotov, lëndë piroteknike dhe sende të forta. Si pasojë e sulmeve drejt Policisë  u dëmtuan 16 punonjës Policie, të cilët janë transportuar në spital për ndihmë mjekësore, pasi kanë pësuar djegie dhe dëmtime fizike.

Policia e Shtetit thekson se ka qenë e angazhuar gjatë gjithë tubimit për garantimin e rendit dhe sigurisë publike, si dhe për të siguruar ushtrimin e së drejtës kushtetuese të tubimit paqësor. Strukturat ligjzbatuese po dokumentojnë të gjitha rastet e dhunës, me qëllim identifikimin dhe nxjerrjen përpara përgjegjësisë penale të autorëve, në përputhje me legjislacionin në fuqi.

Policia e Shtetit mbetet e vendosur në përmbushjen e misionit të saj për garantimin e rendit, sigurisë dhe sundimit të ligjit, duke falënderuar qytetarët që kanë bashkëpunuar dhe janë distancuar nga aktet e dhunshme, si dhe gazetarët dhe punonjësit e medias për transparencën që kanë ofruar për publikun”, thuhet në njoftimin e policisë.

Deputeti i Partisë Demokratike Bledion Nallbati është përplasur me efektivët gjatë protestës. Ngjarja ka ndodhur te Kuvendi teksa shihet se policia ka përdorur shkopinj gome.

Bledion Nallbati është shoqëruar për tek Trauma me një makinë private të tipit ‘Porsche’. Nuk dihet cilat janë shkaqet që kanë çuar në konfrontim të palëve.

Sali Berisha foli pas mbylljes së protestës së PD. Berisha sulmoi policët duke thënë se banditët me uniformë iu vërsulën protestuesve si bisha.

“Me guximin, mençurinë, vendosmërinë e tyre, qytetarët de facto zotëruan qytetin, banditë me uniformë, kriminelë me uniformë u vërsulën si bisha duke menduar se mund ti mposhtin. Vetëpërmbajtja, guximi, qëndrimi paqësor i protestuesve është dhjetar qindra herë më i fuqishëm se banditizmi juaj. Këtyre guximtarëve, u mjaftojnë pak minuta për tu dhënë atë që meritoni. Vetëpërmbajtjen e tyre mos e merrni dobësi, vetëpërmbajtja e tyre është vendosmëri për të realizuar qëllimin, për të rrëzuar, për të hedhur në kosh të plehrave, njërin prej armiqve më të rrezkshëm në historinë e kombit shqiptar, edi ramën. Mos mendoni se durimi nuk ka një fund, se ju garantoj, se kjo vetëpërmbjatje, kjo vendosmëri e jona nuk mund të provokohet dhe provokatorët mund të marrin një mësim që meritojnë”, tha Berisha.

Operatori i medias News24 Aldo Kashri, ka marrë flakë si pasojë e molotovëve të hedhur te Kuvendi.

Kashri ndodhej në krye të detyrës sipër makinës duke filmuar ndërsa papritur është përfshirë nga flakët. Ai ka zbritur menjëherë poshtë dhe në ndihmë u kanë ardhur dhe të pranishmit për t’i shuar flakët në trup.

Policia ka shoqëruar me forcë në polici një protestues, i cili ka qëlluar me gurë në drejtim të tyre.  Siç shihet nga pamjet, ai është tërhequr zvarrë nga efektivët për ta futur më pas në furgonin e policisë.

Deputeti demokrat, Bledion Nallbati nuk është ndjerë mirë pas protestës. Report Tv sjell momentin kur Nallbati kur nxirret nga selia dhe futet në një makinë tip ‘Porsche’ për tu dërguar drejt Traumës, pasi mësohet se ka goditje në kokë.

Autoambulanca ka mbërritur përpara Kuvendit ku ka marrë me barelë një efektiv të policisë, i cili ka mbetur i lënduar. Ende nuk dihet sesi është gjendja e tij shëndetësore.

Janë rikthyer një pjesë e protestuesve përpara parlamentit. Policia është në gatishmëri bashkë me autobotin duke i paraprirë situatës duke hedhur ujë. Gjithashtu po hidhet edhe gaz lotsjellës, ndërsa protestuesit po përgjigjen me molotovë në sasi të madhe.

Policia këtë herë duket se ka përdorur bombola të reja gazi lotsjellës.

Ndërsa mban në dorë një prej tyre, gazetari i Report Tv, Sokol Dema thotë se data e prodhimit duket se i përket vitit 2025, ndërsa e skadencës mund të jetë e vitit 2030.

Report Tv ka siguruar foto nga fishekzjarrët e përdorura gjatë protestës së PD. Një pjesë prej tyre ishin lidhur me bombat molotov.

Bombat kanë shkaktuar lëndime te një numër efektivësh policie, të cilët kanë përfunduar me djegie e lëndime të shumta në trup.

Në protestën e PD-së, i pranishëm është dhe djali i kreut të opozitës, Shkëlzen Berisha.

Shkëlzen Berisha është i rrethuar nga bodyguard-ët e Sali Berishës ndërsa ndodhet te Rruga e Elbasanit, mes selisë së PD-së dhe Kuvendit. Ai është zhvendosur aty së bashku me protestuesit pas hedhjes së gazit lotsjellës te Kuvendi.

Në protestën e sotme të thirrur nga kryedemokrati Sali Berisha, kanë mbetur të plagosur 19 efektivë policie.

Mësohet se 9 efektivë janë paraqitur pranë shërbimit të djegie - plastikës në QSUT, ndërsa 10 të tjerët janë paraqitur drejt Spitalit të Traumës dhe po ekzaminohen.

Sipas burimeve nga Policia, mësohet se njëri prej efektivëve u dëmtua gjatë hedhjes së molotovëve para Kryeministrisë, ndërsa të tjerët gjatë hedhjes së molotovëve para godinës së Parlamentit.

Efektivët e lënduar kanë djegie të shumta në trup, ndërkohë që ende nuk dihet saktë si është gjendja e tyre shëndetësore. Po ashtu të dëmtuar gjatë protestës së opozitës mbetën edhe deputeti demokrat Bledjon Nallbati dhe një qytetar, të cilët janë paraqitur në spital për ndihmë mjekësore.

Efektivët e Policisë i kanë ardhur në ndihmë gazetarit shqiptar Arian Asimi që punon në SHBA, i cili kishte ardhur në Shqipëri për të mbuluar protestën e opozitës, të thirrur nga kryedemokrati Sali Berisha.

Gjatë përplasjeve mes protestuesve dhe Policisë, Asimi është ndjerë keq nga gazi lotsjellës, i hedhur nga efektivët për të shpërndarë militantët e dhunshëm që po shkaktonin trazira.

Sheshi para Parlamentit u kthye në një ‘arenë lufte’ ku militantët e Berishës hodhën molotov dhe fishekzjarrë drejt policëve, ndërkohë që këta të fundit iu kundërpërgjigjën me ujë dhe gaz lotsjellës.

Pamje të gazetarit të lënduar gjatë protestës së Berishës

Hedhja e molotovëve në mes të turmës, ka dëmtuar efektivët e policisë, të cilët kanë pësuar dhe djegie në trup. Siç shihet nga pamjet, uniformat e efektivëve janë djegur, ndërsa njëri prej tyre nuk është ndjerë mirë dhe është larguar nga protesta.

Protestuesit e PD-së hodhën papritur molotovë dhe fishekzjarrë në mes të kordonit të policisë të vendosur përpara godinës së parlamentit. Ata janë shpërndarë nga uji dhe gazi lotsjellës.

Hidhet breshëri molotovësh përpara godinës së parlamentit. Situata ka përshkallëzuar duke rrezikuar edhe policët. Disa prej tyre janë prekur nga flakët dhe janë të lënduar. Shihet që edhe uniformat e tyre janë djegur. Ata po marrin ndihmën e parë.

Policia ka reaguar menjëherë duke hedhur ujë dhe gaz lotsjellës për të neutralizuar situatën.

Edhe një protestues shihet të jetë në gjendje jo të mirë prej gazit lotsjellës dhe po merr gjithashtu ndihmë prej policisë.

Protestuesit e PD-së po tentojnë të çajnë me forcë kordonin e policisë të krijuar përpara derës kryesore të godinës së Kuvendit. Militantët kanë hedhur dhe sende të forta në drejtim të efektivëve. Protestuesit po kryesohen nga deputetët e PD Flamur Noka e Luçiano Boçi. Ndërkohë efektivët po tentojnë për t’i larguar. 

Protesta tashmë është zhvendosur tek parlamenti pas hedhjes së molotovëve dhe mjeteve piroteknike tek kryeministria.

Lapaj dhe grupi i tij i protestuesve janë rikthyer në pozicionin e tyre të përhershëm përpara kryeministrisë.

Pas largimit të protestuesve të PD që tashmë i janë drejtuar parlamentit, “Shqipëria Bëhet” ka rivendosur karriget. Protestuesit e PD u larguan pasi hodhën edhe fishekzjarrët e molotovët.

“Prisja të qëndronin, nuk kanë qëndruar”, tha Lapaj pak i zhgënjyer.

Militantët që kanë marrë pjesë në protestën e thirrur nga kryedemokrati Sali Berisha, i kanë vënë flakën një koshi mbeturinash në rrugët e kryeqytetit.

Ky është vazhdim i një sërë aktesh vandale që militantët e Berishës kanë bërë në protestën e sotme, por edhe në protestat e kaluara të thirrura nga PD.

Pas hedhjes së molotovëve dhe fishekzjarrëve në drejtim të kryeministrisë, protestuesit po i drejtohen godinës së Kuvendit. Militantët e PD-së po drejtohen nga deputeti Gazment Bardhi, i cili i largoi nga hyrja e kryeministrisë dhe i bëri thirrje për tu nisur drejt godinës së parlamentit.

Ndërkohë përpara parlamentit është formuar kordoni policor.

Report TV ka siguruar pamjet me dron, në momentin që Policia i është kundër-përgjigjur dhunës së protestuesve me ujë, për të bërë të mundur shpërndarjen e tyre.

Nga pamjet duket një autobot është pozicionuar pranë Kryeministrisë dhe ka hedhur ujë drejt protestuesve, të cilët më herët hodhën molotovë, fishekzjarre dhe gurë në drejtim të policëve dhe godinës së Ekzekutivit.

Protesta e sotme kishte një skenar të ngjashëm me protestën e 24 janarit, ku sulmi ndaj institucioneve vijoi menjëherë pas fjalës së Berishës.

Nga hedhja e bombave molotov, lëndëve piroteknike dhe sendeve të forta, është lënduar një punonjës policie.

Tensionohet situata në një krah të godinës së kryeministrisë. Protestuesit kanë reaguar duke shkundur e hequr kangjellat rrethuese në përpjekje për të thyer kordonin e policisë.

Pavarësisht tentativës për shpërndarjen e tyre me hedhjen e ujit, protestuesit po bëjnë rezistencë duke u kundërpërgjigjur në mënyrë agresive. Gjithashtu ata po hedhin edhe sende të forta në drejtim të efektivëve.

Kryetari i Partisë Demokratike, Sali Berisha, është larguar me automjetin e tij tip ‘Benz’ nga protesta e PD-së para Kryeministrisë.

Në sheshin para Kryeministrisë, protestuesit kanë krijuar një situatë jo normale, duke hedhur molotov dhe gurë drejt godinës së Kryeministrisë, por edhe policëve.

Ende nuk dihet nëse protesta e thirrur nga Berisha do të mbyllet këtu, apo protestuesit do të zhvendosen drejt Parlamentit si në protestën e kaluar.

Sapo kryetari i Partisë Demokratike, Sali Berisha ka përfunduar fjalën, militantët kanë hedhur shishe molotov e fishekzjarrë në drejtim të kordonit të policisë dhe kryeministrisë. Aspak një surprizë, por i njëjti skenar si në protestat e kaluara. Nga pamjet me dron që sjell Report Tv shihen shkallët e kryeministrisë në flakë nga molotovët ndërsa ka filluar hedhja e ujit në drejtim të protestuesve.

Përpara militantëve në shesh, Sali Berisha ripërsëriti të njëjtat akuza se me Edi Ramën nuk ka zgjedhje të lira dhe të ndershme. Berisha tha se nuk mund të fitojnë kurrë një farsë elektorale.

“Cilido që mendon se një opozitë mund të fitojë zgjedh kundër tij, është jashtë këtij realit, me Ramën. S’ka zgjedhje, opozita nuk fiton kurrë një farsë elektorale. Për të votuar të lirë, të ngrihemi, të largojmë Ramën nga pushteti, të shkojmë drejt zgjedhjeve të lira dhe të ndershme. Të bashkohemi kundër armikut më të rrezikshëm”, tha Berisha.

Kryetari i Partisë Demokratike Sali Berisha në fjalën e mbajtur përpara protestuesve, e ka cilësuar kryeministrin Edi Rama si armikun më të egër dhe të pamëshirshëm të Shqipërisë.

“Zhvillimet e ditëve të fundit, bëjnë që ne të mblidhemi sot në këtë shesh, në kushte më alarmantet. Ndoshta jemi mbledhur në kryengritjen tonë paqësore, në momentin më kritik të Shqipërisë në 35 vitet te fundit, ndaj dhe më duhet të nis këtë fjalë me një shprehje, ‘Ata që harrojë të shkuarën, janë të dënuar ta përsërisin atë’.

Shqipëria është e bekuar, prej pasurive përrallore që zoti i ka dhuruar, por ne jemi të bekuar për traditat tona të mrekullueshme të mbartura brez pas brezi. Nëse Shqipëria është e bekuar me popullin e saj, pasuritë me traditat, nuk mund të mohohet se ne kemi qenë apo kemi përjetuar shekuj pas shekujsh mallkime. Ne kemi përjetuar dhe provuar armiqtë të egër të pamëshirë ndaj nesh që padyshim i kanë sjellë dëmet më serioze kombit tonë. Enver Hoxha ka qenë një armik i egër, ishte Hitleri shqiptar i pasluftës së 2 botërore.

Nuk duhet të harrojë se Enver Hoxha na qeverisi për 45 vite pavarësisht krimeve të tij ndaj shqiptarëve, por sot çfarë po ndodh me Shqipërinë? Në shekullin e kaluar Shqipëria u mbaj peng 45 vite, këtë shekull, Shqipëria po përballet me pasoja akoma më katastrofike. Prej 13viteve të fundit, pasojat rrënojnë çdo ditë vetë ekzistencën e shqiptarëve si banorët ë saj. Nga Brukseli, BE, për shkak të vjedhjeve të papërmbajtura, dërgohet paralajmërimi më ogurzi, për zhbërjen nga e para të tumtimit tonë 32 vjeçar plot sakrifica, shpresa e ëndrra drejt BE. Rama është armiku më i pamëshirë i të sotmes dhe të ardhmes. Është kërcënimi më i rrezikshëm”, tha Berisha.

Sali Berisha është ngjitur në podiumin e PD duke renditur akuzat kundrejt Ramës dhe Ballukut. Ai thotë se kryeministri përdori pushtetin ekzekutiv për të bllokuar SPAK dhe presionuar Gjykatën Kushtetuese në mbrojtje të Ballukut.

“Edi Rama prej 2 muajve përdori gjithë pushtetin e ekzekutivit për bllokimin e prokurorisë dhe presionit të të gjitha llojeve ndaj Gjykatës Kushtetuese për të mbrojtur bashkëhajduten e 50 mln eurove në tunelin e Llogarasë, për të mbajtur në detyrë bashkautoren e qindra mln eurove, për të mbajtur bashkëhajduten që ndërtoi Qukës-Qafë Plloçë 9 mln euro pa asnjë urë e tunel. U përpoq të bëhej pushteti për të mbrojtur lubinë sepse prapa saj është vetë ai. Faza e parë e këtij grushti shteti dështoi dhe këtu ju keni të gjithë pjesën e kontributit tuaj, me protestën tuaj”,  tha drejtuesi i PD.

Berisha u shpreh i sigurt se brenda këtij muaji “do të çlirojë Shqipërinë”.

“Edhe grushti i dytë që po përgatit do të dështojë dhe shkurti është muaji kur ne zvarritëm diktatorin. Shkurti është muaji kur ne do të çlirojmë Shqipërinë!”, tha Berisha.

Pjesëmarrja e protestës së PD duket se nuk e ka kënaqur Ervin Salianjin. Ai i numëroi Sali Berishës të gjithë protestuesit që mungonin në shesh. 

Ai shprehet për Report Tv se priste që të shihte të gjithë ata që po revoltohen në Velipojë, Durrës e Kamëz, por shprehu vlerësimin edhe për ata përkrahës që kanë zgjedhur të jenë të pranishëm.

““Unë jam në protestë kundër qeverisë dhe kam qenë dhe jam një nga denoncuesit më të fortë të opozitës duke treguar se nuk bëj kompromis, aq shumë sa kam përfunduar në burg politik për shkak të përplasjes. Të gjithë ata që bëjnë akuza të tilla, janë në dëshpërim. Sot unë prisja që në protestë të ishin qytetarë që kanë revoltë reale si protestuesit e Velipojës, Rrjollit, Durrësit që ishin në protestë sot, protestuesit e Kamzës që iu rrit çmimi i biletave, por pa diskutim që edhe këta qytetarë janë për t’u respektuar dhe secili tregon dinjitet për veten e vet”, tha Salianji.

Aktivisti Aulon Kalaja ka marrë pjesë në protestën e PD-së të zhvilluar ditën e sotme para Kryeministrisë, ku edhe ka mbajtur një fjalë në podium.

Gjatë fjalës së tij, Kalaja i ka bërë thirrje popullit që të reagojë dhe të ngrihen kundër qeverisë së kryeministrit Edi Rama.

Mes të tjerash, Kalaja tha gjithashtu se skllevërit e lumtur janë armiqtë më të mëdhenj të lirisë, prandaj sipas tij, reagimi ishte i domosdoshëm.

“Zoti nuk do ta ndryshojë kurrë gjendjen e një vendi, nëse ai nuk do që ta ndryshojë vetë gjendjen e tij. Çdo komb çlirohet me përpjekjet e veta, prandaj fati i popullit tim, është fati im. Kujdes, fati i buzëqesh vetëm guximtarëve dhe kurrë nuk është arritur ndonjë gjë e madhe, pa përpjekje të madhe. Skllevërit e lumtur janë armiqtë më të mëdhenj të lirisë. Për zogjtë e rritur në kafaz, fluturimi është sëmundje. Prandaj një thirrje për ty e kam edhe për ty o mercenar, që pështyn gënjeshtra e propagandë përnatë në ekranet televizive. Shpirtin me bukë mbaje, por mos e bëj leckë dinjitetin e atdheut. Ne nuk po vuajmë vetëm nga dhuna e Ramës, por edhe nga heshtja e të mirëve. Më mirë zbardhur, sesa këmbët në një këpucë. Mos vdis para se të të prekë plumbi”, tha mes të tjerash Kalaja.

Ervin Salianji nuk mungoi në protestën e PD, por qëndroi larg ‘zemrës’ ku ajo po mbahet para kryeministrisë. Salianji është vendosur te Piramida, aty ku edhe protestuesit janë edhe më të shpërndarë, ndërsa shihet duke qeshur e biseduar me hare me disa prej përkrahësve të tij.

Ndërkohë Berisha e ka përjashtuar nga partia duke thënë se ka shkelur vijat e kuqe dhe se punon për Ramën.

Në protestën e tretë kombëtare të PD, nënkryetari Agron Gjekmarkaj ka vijuar me akuzat kundrejt qeverisë duke thënë se Rama po mbron Ballukun.

“Në pushtet për të ruajtur veten është gati ta asgjësojë çdo nuancë të drejtësisë, ta marrë peng atë, të marrë peng parlamentin, të grisë kushtetutën nëpërmjet tiranisë së shumicës abuzuese. Ne nuk do ta lejojmë.  Dje, Edi Rama hoqi dhe maskën e fundit, për të mbrojtur zëvendësen e vet Belinda Ballukun, për të mbrojtur veten dhe për të mbrojtur një labirint prej minotauri që e ka ndërtuar vetë, në të cilin po humbet shpresën një shoqëri e tërë. Në këtë labirint, alternativa e vetme që u ofrohet njerëzve është depersonalizimi, të mos mendosh, të mos ndjesh, të mos reagosh, të jesh i nëpërkëmbur, t'i bësh të gjitha këto siç i kërkon sistemi.  Kur drejtësia i nënshtrohet pushtetit, demokracia fillon të vdesë ngadalë”, tha Gjekmarkaj.

Në protestën kombëtare të Partisë Demokratike, ka edhe të mitur. Një grup prej tyre, siç shihet në pamje, ndërsa mban pankartat në duar, shkon edhe drejt kangjellave, pas të cilave janë rreshtuar efektivët e policisë, duke i shkundur pengesat e hekurta.

Një prej tyre shihet edhe duke vendosur këmbën mbi to.

Report TV sjell pamjet nga ‘grupi i zjarrit’ në protestën e thirrur nga kryedemokrati Sali Berisha, të cilët duket se qëndrojnë të fshehur mes turmës dhe pankartave.

Këta persona, një pjesë e të cilëve janë të maskuar, duket se janë përgatitur për hedhje molotovi drejt godinës së Kryeministrisë.

Një skemë e tillë u ndoq edhe në protestën e kaluar, ku një grup i kamufluar mes turmës, nisi sulmet me molotov pas fjalës së Berishës, ku mbetën të plagosur edhe disa policë.

Në protestën kombëtare të radhës, Sali Berisha arriti të mbledhë vetëm militantë. Report Tv solli pamjet me dron gjatë momentit kur kreu i PD iu bashkua protestuesve para Kryeministrisë.

Por, siç shihet edhe në këto pamje, pjesëmarrja në protestë duket më e ulët se ajo e 24 janarit.

Një person është shfaqur në selinë e Partisë Demokratike me një shkop (që ngjan si një shkop gome), pak para nisjes së protestës së thirrur nga Sali Berisha.

Ky person mban veshur një xhup të gjatë, të mbushur me mbishkrime të tilla ku e krahason kryeministrin Edi Rama me Maduron e Venezuelës dhe qeverinë shqiptare me mafien.

Duket se militantët e Berishës janë përgatitur për akte dhune, të cilat ishin prezente edhe në protestën e 24 janarit, ku u hodhën molotovë dhe gurë drejt policëve dhe godinës së Kryeministrisë.

Më herët sot, një protestues mbante pllaka guri në dorë dhe me to po qëllonte drejt godinës së Kryeministrisë.

Adriatik Lapaj dhe grupi i tij i protestuesve janë zhvendosur nga vendqëndrimi i zakonshëm para Kryeministrisë duke i lënë hapësirë protestës së Berishës. Ai nuk ka qenë aty as gjatë ditës së sotme duke ndjekur një skenar të ngjashëm me atë të herëve të tjera të protestave kombëtare të PD.

Lapaj ka preferuar që për të mos krijuar incidente, të mos qëndrojë aty dhe të rikthehet më vonë.

Kryetari i Partisë Demokratike Sali Berisha ka dalë nga selia blu dhe është nisur drejt bulevardit ‘Dëshmorët e Kombit’, përpara kryeministrisë, aty ku do të zhvillohet protesta. Përpara selisë blu Berishën e kanë pritur dhe po e shoqërojnë militantët e PD-së dhe besnikët e tij, Flamur Noka, Luçiano Boçi, Xhelal Mziu, Gazment Bardhi.

Një i mitur pa nisur ende protesta e Partisë Demokratike është filmuar teksa në dorë mban disa pllaka guri dhe i hedh drejt kryeministrisë. Ai shihet i afruar në gardhin e vendosur nga Policia e Shtetit me disa moshatarë të tjerë ndërsa në dorë mban disa pllaka.

Në selinë e Partisë Demokratike kanë filluar përgatitjet për protestën që do të mbahet ditën e sotme para godinës së Kryeministrisë.

Ajo që vihet re, është se veç flamujve të PD-së dhe atyre Kombëtar, si dhe pankartave me shkrime të ndryshme, aty janë shfaqur edhe ‘fantazmat’.

Mesa duket disa persona janë veshur si fantazma dhe në veshjen e tyre shkruhet ‘faleminderit z.Rama që i kthyetë studentët në fantazma’.

Ndërkohë në selinë e PD-së vihet re edhe një person që është veshur me një xhup të gjatë, me mbishkrime të ndryshme në të. Në shkrimet në xhupin e tij, qeveria shqiptare cilësohet si ‘mafia’ dhe duhet të ikë.

Kujtojmë se në protestat e thirrura nga Berisha ka pasur pak pjesëmarrje, por edhe akte dhune ndaj punonjësve të Policisë.