Ambasada e SHBA-ve në Tiranë ka paralajmëruar se grupe të lidhura me Iranin mund të kenë në shenjestër opozitën iraniane në Shqipëri apo edhe subjekte të lidhura me SHBA.

Kreshnik Spahiu thotë në "Frontline" se qeveria shqiptare duhet t'i përgjigjet këtij paralajmërimi edhe duke nisur edukimin e shoqërisë se si të reagojë në rast sulmesh ushtarake apo terroriste, pasi sipas juristit, shqiptarët në Shqipëri kanë humbur reflekset e reagimit në një skenar lufte.

Gjithashtu, Spahiu solli në vëmendje shpalljen e Iranit shtet sponsor të terrorizmit nga Kuvendi i Shqipërisë. Juristi thotë se ky qëndrim i shtetit shqiptar nuk duhet të përfundojë me kaq, por duhet të merren masa që shtetësia shqiptare t'i hiqet çdo shqiptari që bashkëpunon me Teheranin.

"Unë mendoj që qeveria shqiptare nuk duhet të bëjë as atë që bën Irani, as atë që bën Amerika, por atë që bën Europa. Duke qenë se jemi shtet europian dhe vend i NATO-s, padyshim që në një moment të caktuar je i detyruar të pozicionohesh, por ajo çfarë na intereson ne: bëhet fjalë për një rrezik që Shqipëria të hyjë në luftë të drejtpërdrejtë, apo atentate të specifikuara. Bëhet fjalë për atentate, vetë ambasada tha se mund të ketë atentate të specifikuara.  Një nga financimet që bën zbulimi dhe kundërzbulimi iranian është survejimi dhe monitorimi i disidentëve politikë. Kjo është një nga objektivat e deklaruar të qeverisë iraniane. E ka objektiv që i monitoron, jo vetëm në Shqipëri, opozitë iraniane nuk ka vetëm në Shqipëri. Çfarë duhet të bëjë Shqipëria, unë do të doja të thoja që Shqipëria ka detyrim dy aspekte kryesore, e para të fusë kulturën ushtarake për popullin, studentët, qytetarët. Për më shumë se 3-4 dekada shqiptarët jemi shkëputur, është një gjeneratë që nuk ka fare informacion si duhet përgatitje në rast lufte. Ne kemi popullin më të papërgatitur jo vetëm për luftë ose akte terroriste. Problemi është që shteti duhet të mendojë dhe kjo nuk zgjidhet as me mbledhje të Këshillit Kombëtar, as me debat në parlament, ne kemi dy luftëra masive, kemi në Ukrainë dhe në Lindjen e Mesme, ekzistojnë të gjitha shkaqet dhe ka me mijëra analiza që lufta mund të zgjerohet. Kuvendi shpalli Iranin shtet terrorist. A është e përgatitur Shqipëria të ndryshojë legjislacionin shqiptar për shtetësinë, në rastet kur qytetarë shqiptarë bashkëpunojnë me këtë shtet terrorist, a duhet të mbajnë pasaportën? Apo është shpallje fiktive",- tha Spahiu.

Rendit zhvillimet sipas orarit:
Ora 22:09
Spahiu: Shqipëria s’ka as zjarrfikëse apo shkallë emergjence në rast aktesh terroriste në hotele e kulla

Juristi Kresnik Spahiu thotë se Shqipëria nuk rrezikon të përfshihet në një luftë frontale, por aktet terroriste të sponsorizuara nga Irani janë një rrezik potencial, të cilin shteti shqiptar ende nuk di si ta përballojë nëse ndodh.

Në "Frontline", Spahiu thotë se kapacitetet e shtetit shqiptar për të reaguar ndaj një sulmi terroristi, janë të dobëta dhe minimale, dhe se ky duhet të jetë shqetësimi kryesor i vendit në këtë periudhë.

"Përfshirjen e Shqipërisë në luftë frontale e themi vetëm ne në studio, nuk e ka thënë as ambasada amerikane. Shqipëria deri më sot nuk ka asnjë lloj indicie që të flasim për kapacitete ushtarake. Pyetja është a është e përgatitur Shqipëria për akte terroriste, sepse ambasada thotë për rrezik për akte terroriste. Vijmë tek fokusi që na ka orientuar ambasada amerikane. A ka mundësi Shqipëria të marrë masa dhe cilat janë masat që të gjitha vendet që rrezikohen nga terroristët. A ka marrë masa Shqipëria se çfarë duhet të bëjë për akte terroriste në vende publike. A kemi ne zjarrfikëse që të përballojnë një atentat në një kullë 50 kate. A kemi shkallë emergjence në rast të një atentati terrorist në një kullë. A kemi mjete të emergjencës për shpëtimin e jetës në qendra tregtare apo jo. Unë jetoj në një qytet ku janë zhvilluar akte terroriste dhe e di si e kanë zgjidhur këtë, sheshet publike i kanë mbushur me blloqe betoni, që minimalisht të pengojnë një makinë me eksplozivë. Në tërësinë e vet unë shoh një frymë jo konstruktive, një lloj neglizhence amatoreske",- thotë Spahiu. 

K.M/Shqiptarja.com