Shqipëria duhet të presë për të marrë një përgjigje nga Këshilli i Bashkimit Evropian mbi Raportin e Ndërmjetëm, që do ta kalonte në fazën tjetër procesin e negociatave. Këshilli i BE deklaroi për Report Tv se për të arritur në një marrëveshje, vendeve anëtare do t’i duhen edhe disa raunde të tjera bisedimesh.

Për juristin Kreshnik Spahiu, vendimmarrja për zgjerim në BE nuk është në dorë të kryeministrit Edi Rama dhe të qeverisë shqiptare.

Në një lidhje live për emisionin ‘Repolitix’ me gazetarin Denis Minga në Report Tv, Spahiu tha se qeveritë europiane janë të drejtpërdrejta dhe nëse do të kishin një shkak politik, ligjor apo diplomatik për mos-anëtarësimin e Shqipërisë në Union, do ta deklaronin.

“Në radhë të parë, vendimmarrja për zgjerim nuk është në dorë të Ramës dhe Shqipërisë. Të vetmen gjë që ka në dorë Shqipëria është që të plotësojë çdo kërkesë. Vendimmarrja është e shteteve të tjera që janë anëtare të BE-së. E dyta do të thoja se të gjitha komentet që bëhen në media, në tërësi janë spekulative. Në Shqipëri ndahen tifoza politikë, ata që përfaqësojnë opozitën dhe median e mbushin me spekulime.

Një gjë duhet të jemi të qartë, që qeveritë europiane janë të drejtëpërdrejta. Nëse kanë një shkak politik, ligjor, diplomatik, e thonë drejtpërdrejtë, nuk e thonë me nënkontekste indirekt. Qeveria ka një lloj nguti për të marrë përsipër edhe afate. Një gjë duhet të jemi realistë, që Shqipëria është e mbushur plotë me gropa në mos-plotësimin e standardeve”, tha mes të tjerash Spahiu.

Më tej Spahiu deklaroi se nëse nacionalistët e djathtë marrin pushtetin në shtetet kryesore të Europës, si Francë dhe Gjermani, atëherë procesi i integrimit të Shqipërisë në BE do të ndalej.

Kjo pasi sipas Spahiut, partitë e ekstremit të djathtë kanë në programin e tyre politik ndalimin e procesit të zgjerimit të Bashkimit Europian.

“Ajo çfarë ne duhet të kemi ngut, është që ne rrezikojmë nga ndryshimi i qeverive europiane, që të hyjmë në BE. Që do të thotë një largim i Macron dhe ardhja e nacionalistëve në Francë, një largim i Merz dhe CDU-së dhe ardhja e nacionalistëve në Gjermani, pra ardhja e gjithë euroskeptikëve, nacionalistëve, të djathtës ekstreme në Europë, do ta largonte përfundimisht Shqipërinë nga BE dhe do të printe çdo lloj shprese, jo për shkak të standardeve, por për shkak se ata e kanë platformën e tyre. Pra duhet të nxitojmë që të kapim trenin europian të partive që janë pro-zgjerimit”, tha mes të tjerash Spahiu.

Rendit zhvillimet sipas orarit:
Ora 23:02
Spahiu: Disa shtete të BE-së janë kundër Shqipërisë, pasi firmosi “Bordin e Paqes” të Donald Trump

Juristi Kreshnik Spahiu deklaroi se procesi i integrimit të Shqipërisë në BE është në një udhëkryq, pasi vendi jonë u bë pjesë e ‘Bordit të Paqes’ për Gazën, një iniciativë kjo e Presidentit amerikan Donald Trump.

Në emisionin ‘Repolitix’ me gazetarin Denis Minga në Report Tv, Spahiu tha se BE ka të drejtë të plotë të jetë skeptike për Shqipërinë, në momentin që vendi ynë del jashtë linjës së Unionit dhe i vihet në ‘shërbim’ Shteteve të Bashkuara të Amerikës.

“Këtu po luhet fati i BE-së. BE është në udhëkryq. Rrezikon shpërbërja e NATO-s. Si ne mund ta injorojmë këtë fakt, ku del një Shqipëri apo një Kosovë dhe e injoron krejt vullnetin e BE-së për këtë çështje (referuar pjesëmarrjes së Shqipërisë dhe Kosovës në Bordin e Paqes). BE ka të gjithë të drejtën e vet që të tregojë skepticizëm për një mënyrë të cilën ata mund ta konceptojnë sesi përdoret Shqipëria në momente të caktuara”, tha mes të tjerash Spahiu.

Më tej Spahiu argumentoi se ka disa shtete brenda Bashkimit Europian që do të bënin çmos për të penguar anëtarësimin e Shqipërisë në BE, mes të cilave sipas juristit, edhe Greqia e Bullgaria.

“Dhe e dyta BE është një bashkim kombesh dhe aty ku ka bashkim kombesh, ka edhe bashkim interesash. Greqia do i bëjë zbor Shqipërisë për t’i dhënë votën e vet. Po ashtu edhe Bullgaria do bëhet pengesë. Ajo çfarë BE shikon te Shqipëria janë një sërë problemesh, për të cilat vendet dhe shtetet anëtare hezitojnë në qëndrimin e tyre diplomatik, politik dhe ekonomik. Shqipëria duhet të japë garanci, edhe sikur të mos i ketë. Duhet të japë garanci në vizionin e vet”, përfundoi Spahiu.

R.Xh/Shqiptarja.com