Arrestohet Vangjush Dako, akuzohet për leje ndërtimi për pallatin e dëmtuar dhe tenderin e shëtitores! SPAK urdhër arrest dhe për 8 ish-zyrtarë e 1 ndërtues

Avokati Petrit Ismaili zbulon si shkoi ish kryetari i bashkisë së Durrësit, Vangjush Dako me këmbët e tij në Drejtorinë e Policisë e Tiranës.

Sipas tij në momentin kur ka mësuar për urdhrin e arrestit Dako ka qenë në Tiranë.

“Nuk ka shkuar policia në banesën e Dakos, ai ishte në Tiranë. Pas sinjalizimit në media që kishte një masë sigurimi njoftova autoritetet e policisë për vendndodhjen e zotit Dako dhe jemi vetëdorëzuar në drejtorinë e policisë” deklaroi avokati mbrëmjen e sotme pasi doli nga drejtoria e policisë së Tiranës ku po mbahet Vangjush Dako.

Avokati mohon që policia të ketë shkuar në banesën e tij.

“Dako ka qenë në kontakt me autoritetet e SPAK. Bëhet fjalë për dy vendime kolegjiale që janë në fushën e ndërtimit tek autoriteti i bashkisë” tha avokat Ismaili.

Ai e quajti të nxituar arrestimin e Dakos duke thënë se SPAK është nën tryesninë e ndërkombëtarëve por dhe të medias. 

"SPAK nuk po mban dot ekuilibër nën trysninë mediatike dhe të politikës dhe të ndërkombëtarëve. Në këtë trysni po merr masa të nxituara. Gjykoj se nuk ka qenë e nevojshme masa e arrestit me burg" deklaroi Ismaili.

Petrit Ismaili, avokati i Vangjush Dakos përveç detajeve lidhur me akuzat që rëndojnë ndaj klientit të tij, foli edhe për gjendjen shëndetësore të ish kryebashkiakut të Durrësit. Ai tha se Dako nuk ka pasur probleme shëndetësore përveçse stresit dhe ngarkesës emocionale të rastit.

“Nuk mund të jap deklarime të hollësishme. Klienti im është i gatshëm të ballafaqohet me drejtësinë. Nuk ka pasur probleme. Natyrisht pjesa emocionale, stresi e këto janë. Nuk ka pasur probleme shëndetësore”, nënvizoi ai.

Avokati i Vangjush Dakos, Petrit Ismaili e ka konsideruar si të panevojshme masën e arrestit me burg ndaj ish kryebashkiakut të Durrësit. Duke dhënë detaje për arrestimin e klientit të tij, Ismaili tha se ndaj Dakos ka patur kallëzim nga një grup banorësh lidhur me kolaudimin e një pallati, leja për të cilin është dhënë që në vitin 2011 si dhe për një kallëzim të bërë nga deputeti i PD, Ferdinand Xhaferraj në vitin 2021. Mes të tjerash, avokati i ish kryebashkiakut të Durrësit tha se për këtë zhvillim, SPAK ka patur trysni të lartë nga mediat dhe ndërkombëtarët. 

“Sapo u ekzekutua vendimi i GJKKO e cila ka vendosur arrest me burg për Dakon. Akuza, është një shpërdorim detyre në dy raste. Një rast është kallëzim i një grupi banorësh të një pallati që pretendojnë se ka patur shkelje në kolaudim.  Një kallëzim është nga Ferdinand Xhaferri në prag të zgjedhjeve 2021.

SPAK nuk po mban dot ekuilibër nën trysninë mediatike dhe të politikës dhe të ndërkombëtarëve. Në këtë trysni po merr masa të nxituara. Gjykoj se nuk ka qenë e nevojshme masa e arrestit me burg. Nuk ka shkuar policia në banesën e Dakos, ai ishte në Tiranë. Jemi në kushtet e vetëdorëzimit. Bëhet fjalë për vendime kolegjiale jo vendime vetëm të Dakos. Unë di se bëhet fjalë për një pallat me leje ndërtimi të rregullt të dhënë nga bashkia.”- tha Ismaili.

Ish kryebashkiaku i Durrësit, Vangjush Dako ka qenë ditën e sotme në drejtorinë e policisë së Tiranës në momentin kur është arrestuar nën akuzën e shpërdorimi të detyrës për një leje ndërtimi të dhënë 11 vite më parë dhe një tender.

Gazetari i Report TV, Aldo Mustafa ka bërë me dije se Dako kishte pasur dijeni mbi urdhër arrestin e lëshuar ndaj tij. Raportohet se ish kryebashkiaku fillimisht ka konsumuar një kafe në lokalin poshtë apartamentit ku banon dhe më pas është nisur drejt Tiranës për t’u paraqitur në ambientet e drejtorisë së policisë, ku është kryer arrestimi i tij.

Report TV mëson se deri tani ndaj Vangjush Dakos është ngritur akuza vetëm për shpërdorim detyre dy herë. Bëhet fjalë për pallatin e dëmtuar gjatë tërmetit dhe tenderin në vlerën e 22 milionëve që i ka shkaktuar shtetit një dëm prej 18 milionë lekësh.

Ngritja e akuzës u ngrit pas padisë që banorët e pallatit nr 8, lagjja 5 në Durrës për të cilën banorët bënë kallëzim në SPAK në shtator 2020.  Burimet bëjnë me dije se ky pallat ka pasur 4 kate pa leje.

Në orën 19:40 avokati Petrit Ismaili i ish kryebashkiakut ka hyrë në ambientet e drejtorisë së policisë së Tiranës

Sipas detajeve të mësuara nga arrestimi i Vangjush Dakos dhe ish zyrtarëve të tjerë gjatë ditës së sotme, mësohet se hetimet e SPAK kanë nisur pas kallëzimit nga 15 banorë të pallatit të dëmtuar nga tërmeti i 2019-ës.

Kujtojmë se në shtator të vitit 2020 banorët protestuan dhe depozituan edhe një kallëzim për Dakon dhe zyrtarët e tjerë të cilët kanë dhënë lejen e ndërtimit për pallatin.

Leja për ndërtimin e pallatit është dhënë në shtator të vitit 2011. Ndërsa Dako ka dhënë leje për ndërtimin e 4 kateve shtesë të pallatit.

Report TV mëson se hetimet kanë nisur një vit më parë. Bëhet fjalë për një pallat që ka mbivendosje të lejes së ndërtimit, një në vitin 2013 dhe një në vitin 2016.

Po kështu dhe për falsifikim të dokumenteve lidhur me lejet e ndërtimit.

Ndërkohë për tenderin në vlerën e 18 milionë lekëve bëhet fjalë për një shërbim konsulentë dhe Dako në këtë tender ka pasur rolin e autoritetet kontraktues, pra ka firmosur tenderin, informon gazetari i Report TV, Sokol Dema.  

Ky është pallati ‘Tod Trungu’ në Durrës për të cilin raportohet se ka shkelje në lejen e ndërtimit të dhënë 11 vite më parë gjatë drejtimit të Vangjush Dakos. Ky i fundit dhe disa ish zyrtarë të tjerë të drejtorisë së Urbanistikës akuzohen për shpërdorim detyre dhe falsifikim dokumentesh.

Ky pallat pësoi dëmtime pas tërmetit të nëntorit të vitit 2019. Pas hetimeve të nisura nga SPAK një vit më parë, u gjetën shkelje nga ana e ish kryebashkiakut Vangjush Dako dhe disa prej ish zyrtarëve të tjerë.

Në pranga ka rënë edhe Fiqiri Farruku, ndërtuesi i pallatit.

Report TV ka siguruar emrat e disa prej zyrtarëve dhe ish zyrtarëve të drejtorisë së Urabanistikës në bashkinë e Durrësit për të cilët SPAK ka lëshuar urdhër arreste nën akuzën e korrupsionit dhe shpërdorimit të detyrës.

Adhurim Qehajaj, ish drejtori i Urbanistikës (arrest me burg)

Edlira Kertusha juriste tek Ubranistika (arrest shtëpie)

Adi Likmeta, arkitekt dhe specialist në bashkinë e Durrësit  (arrest me burg)

Roza Kovaci (arrest shtëpie)

Adnand Toçilla përgjegjësi i zyrës urbanistike (arrest me burg)

Përveç pallat pa leje, gazetarja e Report TV Keti Banushi mëson se Vangjush Dako akuzohet dhe për tender që dyshohet se i ka shkaktuar shtetit një dëm prej 18 milionë lekësh. Bëhet fjalë për një tender të vitit 2014 – 2015, bëjnë të ditur burime të besueshme nga prokuroria.

Ndërkohë gazetari i Report TV në Durrës informon se Vangjush Dako është vetëdorëzuar dhe ndodhet në Tiranë. 

Report TV mëson se nga 10 urdhërarreste të lëshuara janë 7 arreste me burg, përfshi dhe ish kryebashkiakun e Durrësit, ndërsa për 3 gra është firmosur “arrest shtëpie”.

Ndërkohë në videon e siguruar shihet teksa drejtoria e policisë së Tiranës ka mbuluar hyrjen e institucionit ku pritet të mbërrijë Vangjush Dako i arrestuar në kuadër të aksionit të SPAK gjatë ditës së sotme ku u lëshuan urdhër arreste për disa ish zyrtarë të bashkisë së Durrësit të përfshirë në korrupsion dhe shpërdorim detyre.

Në mars 2023 ish kryebashkiaku i Durrësit u thirr në SPAK për tu marrë në pyetje lidhur me dosjen e hapur për dhënien e lejes së ndërtimit të 11 viteve më përpara, për një pallat i cili u dëmtua nga tërmeti i vitit 2019. 

 Atëherë Dako u mor në pyetje për gati 3 orë pikërisht për këtë çështje, informon gazetarja e Report TV, Keti Banushi.   

Lajmi se Dako ishte thirrur në SPAK u mësua një ditë më pas (17 mars 2023) kur Kryetari i Bashkisë së Krujës, Artur Bushi u paraqit në godinën e Prokurorisë së Posaçme për tu marrë në pyetje pas kallëzimit të një qytetari,Muharrem Hoqja që e akuzonte  për shpërdorim detyre.

Gazetarja e Report TV zbardh detaje të reja të operacionit që është në vijim.

“Është ekzekutuar urdhërarresti për zotin Dako dhe po vijon ekzekutimi i urdhërarresteve të tjera.  Agjentë të policisë po ekzekutojnë urdhërarrestet në Durrës” informon gazetarja e Report TV Keti Banushi.

Ish deputeti Gert Bogdani pretendon se urdhër arrestet për Vangjush Dakon dhe 9 ish zyrtarët janë prerë prej 3 ditësh. Në një intervistë për Report Tv tha se bëhet fjalë për një ndërtim pa leje dhe aludon se nuk do të ketë të arrestuar se ata kanë pasur kohë t’ia mbathin.

“Urdhër arrestet kanë nja 3 ditë që janë prerë. Ata tani janë larguar, nuk do arrestohet njeri. Kam përshtypjen që bëhet fjalë për ndërtim pa leje. Me këtë mënyrë të funksionuari të BKH ka një mënyrë interesante operimi”, tha Bogdani.