Spektakël në Premier League/ City rikthehet në krye, fitojnë edhe Tottenham e Chelsea

Manchester City është rikthyer në krye të renditjes së Premier League, pasi në javën e 32-të ka mposhtur Cardiff-in, me rezultatin 2-0, në sfidën e zhvilluar në “Etihad Stadium”. Të besuarit e Guardiolës zhbllokuan rezultatin që në minutën e 6’, me anë të fantazistit belg, Kevin De Bruyne, ndërsa Leroy Sane mbylli llogaritë në minutën e 44-t, pasi dërgoi në rrjetë një top të marrë nga braziliani Gabriel Jesus.

Vetëm 3 ditë pas humbjes ndaj Liverpoolit në transfertë, Tottenham luajti ndeshjen e parë zyrtare në stadiumin e ri, të cilin e inauguroi vetëm pak ditë më parë dhe e nisi me këmbën e mbarë. Kjo pasi Tottenham arriti të fitojë 2-0 përballë një tjetër skuadre londineze, si Crystal Palace, ndërsa golat për “Spurs” u shënuan nga Son Hueng-min dhe Eriksen, të dy në pjesën e dytë.

Fitore mjaft të rëndësishme për misionin Champions League, mori edhe skuadra tjetër e Londrës, Chelsea, që mposhti me rezultatin 3-0 modestët e Brightonit. Me Higuain në stol, skuadra e Sarrit zhbllokoi rezultatin me anë të francezit Olivier Giroud, ndërsa në pjesën e dytë ishin Hazard dhe Loftus Cheek që mbyllën llogaritë dhe ngjitën “blutë e Londrës” në vendin e pestë, duke kaluar Manchester United.

TAG:
• Manchester City
• Tottenham