Rama intervistë për CNN: Nuk ka shqiptarë në Afganistan! Shqipëria do presë 4000 afganë! Nëse duan të rrinë përgjithmonë, ne i mirëpresim! NATO të ruajë vlerat ose rrezikon të zbehet

TIRANË- Në Afganistan nuk ka asnjë shqiptar që pret të evakuohet mes kaosit në aeroportin e Kabulit, (që do të thotë se 36-vjeçarja është rikthyer në atdhe) e ndërsa Shqipëria po bëhet gati për të pritur jo 3000 siç është deklaruar më parë, por 4000 afganë që u rrezikohet jeta nga talebanët. Shqipëria është bërë gati për t'u siguruar mbrojtje për një periudhë 1 vjeçare, mirëpo kryeministri Edi Rama në një intervistë për gjigantin CNN tha se kush prej tyre dëshiron që të qëndrojë përgjithmonë, është i mirëpritur dhe krejtësisht i lirë ta bëjë.

"Ne ishim të parët që dolëm dhe thamë që jemi të gatshëm njerëzit që kanë punuar me ne, për momentin po punomë për listat që po na sjellin rreth 2000 dhe 2000 të tjerë që po punojmë për t'i mirëpritur, pra do të ketë rreth 4 mijë dhe ky është numri që do të kalojnë në vendet e tjera përfshirë edhe SHBA-së. Nuk është çështja nëse jam i gatshëm, por ky është një vend ku te Kanuni ndër rreshtat e para thotë "shtëpia e shqiptarit i përket Zotit dhe mikut, ata do të jenë miqtë tanë, nëse duan të qëndrojnë le të qëndrojnë", tha Rama.

Për ata që u duket shumë, numri i afganëve që Shqipëria do të strehojë, kryeministri hoqi një paralele me shqiptarët e Kosovës që gjetën një strehë të ngrohtë në vendin tonë, atëherë kur në atdheun e tyre u rrezikohej jeta. Aso kohe, Shqipëria ishte më e varfër nga sa është sot, por pritja e tyre nuk i bëri shqiptarët që të vdisnin urie, tha Rama, e nisur nga kjo e sheh si një detyrim moral pritjen e afganëve. Vendi ynë ka qenë ndër të parat që u ka hapur dyer bashkëpunëtorëve të perëndimit në Afganistan, në një kohë që shumë vende anëtarë të NATO-s kanë refuzuar. Për këtë arsye, Rama nuk i kurseu kritikat për këtë aleancë, duke thënë se duhet të mbrojë vlerat për të cilat është ngritur ose rrezikon të zbehet.

"Ne kemi kujtesë dhe besojmë se është në nderin e anëtarëve të NATO që kanë mbrojtur vlerat për të cilat ne qëndrojmë, ndërkohë që rrezikon që NATO të zbehet në vendet që kërkojnë liri, trajtim të barabartë për gratë. Është e qartë që jemi sfiduar në një mënyrë të tillë sic nuk jemi sfiduar më parë, jo nga ndonjë kundërshtarë, por nga vetja jonë, sfidohemi ose të qëndrojmë për atë që i themi botës ose për zgjedhjet e ardhshme aty këtu, jemi mes sondazheve dhe objektivave dhe ky është një objektiv shumë i madh ku nuk mund të dështojmë.  Jemi vend i vogël, por nuk ka rëndësi, ka të bëjë me atë që ne jemi dhe ka të bëjë me faktin që qëndrojmë për diçka që është e rëndësishme për fëmijët tanë, ne kemi përjetuar luftën, kemi parë 500 mijë refugjatë lufte që lëvizën nga Kosova dhe ne ishim në një situatë më të vështirë ekonomike nga sa kemi qenë kenë, dhe pritja e tyre nuk na bëri të vdisnin urie, por na bëri më të pasur moralisht, tha Rama.

Nga njëra anë Greqia e Turqia po ndërton mure për të parandaluar një fluks refugjatësh në vendet e tyre, Rama thotë se zgjedh që të respektojë këtë vendim të marrë nga shtetet fqinje, por vë theksin se pavarësisht të gjithave ngjyrës, racës, gjuhës apo fesë që kanë, në fund të fundit janë njerëz që duhen shpëtuar teksa sjell edhe një shembull personal nga familja e tij për të treguar se këto tipare nuk janë të rëndësishme.

"Mendoj se faqja më e ndritur e historisë që ju përmendet është faqja që shkroi Angela Merkel duke u hapur krahët refugjatëve sirianë, i shpëtoi nderin Evropës atë kohë. Ne respektojmë nevojat dhe interesat e gjithë miqve dhe aleatëve tanë dhe nuk duam që t'u japim leksion. Unë nuk diskutoj shifrat, nuk është fjala për shifra të ulëta apo të larta, por është fjala për disponibilitet. Ne ndoshta patëm fatkeqësinë, sepse e dimë se çfarë do të thotë të jetosh nën regjim, 30 vite më parë ishim në afganët që i ikim ferrit. Ne ishin Koreja e Veriut në Evropë. Italia tashmë po përfiton shumë nga integrimi i shqiptarëve. Unë jam katolik, bashkëshortja ime është myslimane, dy fëmijët tanë janë ortodoksë,  kemi një të vogël që mund të zgjedhë të bëhet e hebre kjo takon atij. Këtu bëhet fjalë për njerëz, për njerëz që i besuan asaj çfarë ne i besuam 30 vite më parë që i ikën ferrit të talebanizmit të kuq. Nëse Evropa dhe SHBA nuk do të gjenden dhe duke u tërhequr jemi të detyruar t'u japim strehë u japim strehë", tha ai.

Në listën e personave që pritet të vijnë në Shqipëri janë gazetarë, kineastë, edukatorë, dhe Rama, duke u zhveshur nga kostumi i një drejtuesi shtetit, e duke veshur atë të artistit, tha se do të ishte mëkat që këtyre personave t'u prihen ëndrrat dhe shpresat për të ardhmen.

"E thatë në mënyrë të përsosur, unë se kisha mendjen tek politika kur dola në rrugë për të qenë aty me të gjithë të tjerët dhe për të kërkuar ndryshimin e regjimit. Ishte për shkak të kufizimeve në veprimtaritë artistike dhe ndjeva nevojën për liri. Duke parë profilet e njerëzve mund të shihja gazetare, kineastë, yje filmash, si mund t'i lëmë këta njerëz në baltë. Si mund t'ua mbyllim dritaren e ëndrrave dhe shpresave këtyre njerëzve. Ne e dimë shumë mirë se për ta ka një litar të errët të përgatitur për të varur të gjitha ëndrrat dhe shpresat dhe ata vetë", përfundoi Rama në intervistën për CNN.

Sot, me vendim të Këshillit të Ministrave, u përcaktua se afganët do të qëndrojnë në Shqipëri për të paktën një periudhë 1 vjeçare, e ndërsa u ngrit një Task-Forcë e përbërë nga 7 ministra, e drejtuar nga Olta Xhaçka që do të merret në çdo hap, deri në akomodimin e tyre në vendet e përcaktuara në Tiranë, Durrës e Berat. Në një kohë që flitet për numra apo strehimin e tyre, nuk ka ende një datë konkrete se kur afganët priten që të vijnë në Shqipëri, kjo për shkak të situatës kaotike në aeroportin e Kabulit.

 

Rendit zhvillimet sipas orarit:

Të Fundit Të Parat

B.K./Shqiptarja.com

TAG:
• edi rama
• cnn
• strehimi i afganeve ne shqiperi