Sula: Do të verifikojmë ADN-në, në
morg janë 40 të paidentifikuar ende

Prej vitit 1991, familjarët e të zhdukurve gjatë regjimit komunist kanë bërë kërkime individuale për gjetjen e eshtrave, por në mjaft raste dhe kur janë gjetur varreza nuk është bërë e mundur identifikimi i tyre. Zëvendësministrja Genta Sula tha dje se më këtë nismë do të arrihet në identifikimin e eshtrave që do të gjenden.

“Disa prej tyre ia kanë arritur qëllimit, por shumica e tyre jo. Shpesh herë vendodhjet i ka mbuluar misteri i regjimit sepse edhe dosjet mbeten të klasifikuara apo te papërpunuara. Por edhe kur vendndodhja dihej, identifikimi biologjik i mbetjeve mortore ishte i pamundur për shkak të teknologjisë së pamjaftueshme të institucioneve tona të mjekësisë ligjore. Me dhembje me kokën ulur konstatoj se psh mbetjet mortore të 40 personave të paidentifikuar ndodhen ende në morgun e Tiranës”, tha Sula.