Fitorja 5-0 e Marokut kundër Nigerit në raundin e 6-të të Grupit E kualifikues për zonën e Afrikës, i ka dhenë të drejtë marokenëve që të sigurojnë zyrtarisht një biletë për në Kupën e Botës 2026. Ata bëhen kombëtarja e parë nga Afrika që sigurojnë një biletë për në finalet e turneut që do zhvillohet verës që vjen në SHBA, Kanada dhe Meksikë.

Në Botërorin e Katarit në vitin 2022 ata ishin surpriza e eventit, duke eliminuar Portugalinë në çerkfinale, teksa do tentojnë sërish të bëjnë mirë. Pas fitores së fundit, Maroku kryeson grupin me 18 pikë të plota, ndërsa pas tyre renditet Tanzania me 9 pikë. Zambia ka grumbulluar 6, Nigeri 4 dhe Kongo mban vendin e fundit me vetëm 1 pikë.

Maroku bëhet skuadra e 14-të që merr një biletë nga garimi kualifikues, përjashto tre vendet organizatore që e kanë vendin e sigurt.

Kupa e Botës 2026

Turneu do të zhvillohet nga 11 qershori deri më 19 korrik 2026. Do të organizohet bashkërisht nga 16 qytete në tre vende të Amerikës së Veriut. Vendi kryesor pritës i ndeshjeve janë Shtetet e Bashkuara, ndërsa Kanadaja dhe Meksika do të jenë organizatorët ndihmës. Ky turne do të jetë i pari që përfshin 48 ekipe, nga 32 që ka pasur më herët.

Kombëtaret e kualifikuara deri më tani:

Organizatorët: Shtetet e Bashkuara të Amerikës, Meksika, Kanadaja

Azia: Japonia, Irani, Uzbekistani, Jordania, Koreja e Jugut, Australia

Afrika: Maroku

Oqeania: Zelanda e Re

Amerika Latine: Argjentina, Ekuadori, Brazili, Paraguai, Uruguaji, Kolumbia

Dy kombëtare do e kenë paraqitjen e parë në një Kupë Bote. Bëhet fjalër për Uzbekistanin dhe Jordaninë. Brazili është ekipi me më tepër paraqitje, 23.