Atentat në Vlorë, qëllohet për vdekje nga një mjet me targa italiane 41-vjeçari! I dënuar më parë për bashkëpunim në një vrasje (EMRI)

Report Tv sjell pamje të makinës që u gjet e djegur në fshatin Kotë të Vlorës pak minuta pas atentatit që tronditi mbrëmjen e sotme qytetin bregdetar.

Dyshohet se makina u përket autorëve që ekzekutuan Laertjad Kekajn dhe se brenda është gjetur një kallashnikov që dyshohen se është përdorur në vrasje.

FNSH po kreh zonën në Sevaster informon gazetari i Report Tv, Armand Xhelili.

Makina ngjyrë e errët është shkrumbuar totalisht.

Report Tv mëson detaje të reja lidhur me atentatin që tronditi mbrëmjen e 9 shtatorit 2023 qytetin e Vlorës.

Të shtënat e para kanë qenë para bibliotekës. Mësohet se autori ka qëlluar Laertjad Kekajn teksa ka qenë në motor. Në këtë moment 41 vjeçari është rrëzuar nga motori dhe ka ecur 100 metra në këmbë i ndjekur dhe nga autori.

Policia e Vlorës ka reaguar zyrtarisht në lidhje me atentatin që ndodhi mbrëmjen e sotme në Vlorë, ku u qëllua për vdekje Laertjad Kekajn

‘Rreth orës 21:50, në lagjen “28-Nëntori”, në rrethana ende të paqarta, është vrarë me armë zjarri shtetasi L. K., 41 vjeç. Nga kontrolli i zonës, në aksin rrugor “Kotë- Sevaster”, shërbimet e Policisë kanë konstatuar një automjet tip “Audi”, duke u djegur.

Janë ngritur menjëherë pika kontrolli në hyrje/daljet e qytetit të Vlorës dhe në akset “Vlorë-Fier”, “Vlorë-Tepelenë” dhe “Vlorë-Himarë”. Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve.

Grupi hetimor ndodhet në vendngjarje dhe në drejtimin e  prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim identifikimin dhe kapjen e autorëve.’- njofton policia.

Laert Keka, i cili u ekzekutua mbrëmjen e sotme me armë zjarri në Vlorë rezulton një person me precedent penal. Burime për Report Tv thonë se vite më parë, rreth vitit 2000-2002 dyshohet se ka marrë peng një kambist dhe e ka ekzekutuar. Vite më vonë është akuzuar edhe për vjedhje me dhunë. Viktima ka vuajtur mbi 10 vite burg.

Ekspertë të kriminalistës dhe të policisë po punojnë për të mbledhur prova që do të ndihmojnë në zbardhjen e autorëve të krimit të vrasjes së ndodhur rreth orës 21:50 në vendin e quajtur Kisha Ortodokse në Vlorë.

Nëndrejtori për Rendin dhe Sigurinë, kryekomisari Gazmend Shehu në vendngjarje në një prononcim për median tha se janë ngritur pika kontrolli për arrestimin e autorëve të mundshëm.

Nga persona të armatosur është shtënë me armë zjarri drejt një personi që ka gjetur vdekjen e menjëhershme0. Janë marrë masat për ndjekjen e autorëve. Janë bllokuar pikat e qytetit”

Detaje të reja janë mësuar nga atentati në Vlorë. Mësohet se, viktima, Laert Keka rezulton se kishte qenë i dënuar për bashkëpunim në një vrasje. Sipas gazetarit të Report Tv, Armand Xhelili, 41-vjeçari është qëlluar nga një person i maskuar i cili ka zbritur nga makina dhe ka qëlluar në drejtim të 41-vjeçarit.

Një makinë është gjetur e djegur në fshatin Kote në Vlorë. Dyshohet se makina u perket atentatorëve të cilët ekzekutuan për vdekje Laertjad Kekajn mbrëmjen e sotme në Vlorë.

Laertjad Kekaj është ekzekutuar mbrëmjen e sotme me armë zjarri nga persona ende te paidentifikuar në Vlorë. 41-vjeçari është qëlluar nga një makinë në lëvizje. Nga pamjet e siguruara nga Report Tv, viktima ndodhet ende në vendin e ngjarjes. Mësohet se Laertjad Kekaj kishte ndryshuar edhe emrin edhe mbiemrin.

Report Tv ka siguruar pamjet nga vendi i ngjarjes në Vlorë, ku mbeti i vdekur Laertjad Kekaj. Siç duket viktima ka qenë duke udhëtuar me motor, kur është qëlluar nga një makinë.

Report Tv mëson se një person është vrarë në Vlorë. Viktimë ka mbetur Laertjad Kekaj, i cili thuhet se është qëlluar nga një makinë me targa italiane.