Tentoi të përdhunojë 21-vjeçaren nga Australia, arrestohet i riu në Durrës! Në pranga dhe dy të tjerë për ngacmim seksual

Një 18-vjeçar është arrestuar nga policia në Durrës pasi ka tentuar që të përdhunojë një 21-vjeçare nga Australia. Sipas policia i riu me iniciale I.B, u arrestua në flagrancë për veprën penale “Marrëdhënia seksuale me dhunë më të rritura”, mbetur në tentativë.

‘Specialistët për Hetimin e Krimeve të Komisariatit të Policisë Durrës kanë arrestuar në flagrancë për veprën penale “Marrëdhënia seksuale me dhunë më të rritura”, mbetur në tentativë,  shtetasin I. B., 18 vjeç, pasi mbrëmjen e djeshme ka kallëzuar një shtetase australiane 21 vjeçe, se ky shtetas ka tentuar të kryejë marrëdhënie seksuale me dhunë me të.’- njofton policia. 

Në pranga po në Durrës kanë rënë edhe dy burra, banues në fshatin Kryevidh, të cilët dyshohet se kanë ngacmuar seksualisht në një lokal një 18-vjeçare.

‘Shërbimet e Komisariatit të Policisë Kavajë arrestuan në flagrancë për veprën penale “Ngacmimi seksual”, shtetasit S. K., 40 vjeç dhe D. P., 57 vjeç, të dy banues në fshatin Kryevidh, pasi mbrëmjen e djeshme, ka kallëzuar një shtetase 18 vjeçe, se këta 2 shtetas e kanë ngacmuar seksualisht, në një lokal.’- njoftoi policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

M.Q./Shqiptarja.com

TAG:
• Durres