Tentoi t'i vjedhë bankës gjysmë milion euro, ekstradohet në Shqipëri italiani i dënuar me 7 vjet

Një shtetas italian u ekstradua nga Italia në Shqipëri, ku rezulton i dënuar me 7 vite burgim për vjedhje të bankave dhe falsifikim të dokumenteve. Bruno Pomenti 62 vjeç banues në Pontinia të Italisë ishte shpallur në kërkim nga Interpol Tirana, pasi Gjykata e Elbasanit më 23 korrik të vitit 2015 e ka dënuar me 7 vjet burg.

Në vitin 2012 në filialin e një banke të nivelit të dytë  në Elbasan, shtetasi italian ka paraqitur një vërtetim bankar të falsifikuar me një  shumë të konsiderueshme në Euro në llogarinë e tij.  Ai donte të tërhiqte gjysmë milion euro që sipas italianit, ishin depozituar në llogarinë e tij në Itali, pranë së njëjtës bankë

Drejtori i filialit të bankës së nivelit të dytë në Elbasan, në atë kohë kishte paraqitur një padi pranë autoriteteve vendase dhe nga hetimet e nisura menjëherë u zbulua se shtetasi italian në të vërtetë kishte në llogarinë e tij bankare vetëm 50 mijë euro. 

Si rezultat i bashkëpunimit të Interpol Tirana me Interpol Roma, u bë i mundur arrestimi i tij në Itali, duke u finalizuar me ekstradimin drejt vendit tonë. 

Pas ekstradimit ai është vendosur në paraburgimin e qelive në 313 ku së pari do të njihet me dënimin dhënë në mungesë ndaj tij.

 

 

G.M./Shqiptarja.com

TAG:
• ekstradim
• Bruno pomenti
• Bruno pomenti