‘Territorialja’/ Sulmohen gazetarët gjatë protestës në Maliq, mes tyre edhe korrespondenti i Report Tv! Aktivisti i Lapajt vihet nën hetim (VIDEO)

Policia ka njoftuar se ka dërguar materialet në prokurori, ku nisën hetimet ndaj 45-vjeçarit Arian Asimi, i cili gjatë ditës së sotme në fshatin Libonik të Maliqit kanosi dhe fyeu disa gazetarë, mes të cilëve edhe korrespodentin e Report Tv në Korçë, Armand Braho.

Ngjarja ndodhi në protestën që po zhvillohej me qëllim mos-shkrirjen e bashkisë Maliq, ndërsa organizatori Arian Asimi (i njohur edhe si aktivist i partisë së Adriatik Lapajt) dhe disa prej protestuesve sulmuan gazetarët që po raportonin ngjarjen në terren.

Njoftimi i Policisë:

Maliq/ Kanosi dhe fyeu gazetarët gjatë një proteste, procedohet penalisht 45-vjeçari

Specialistët për Hetimin e Krimeve në Komisariatin e Policisë Maliq referuan materialet në Prokurori, ku filloi procedimi penal ndaj shtetasit A. A., 45 vjeç, banues në fshatin Libonik, Maliq, për veprat penale “Kanosja për shkak të detyrës” dhe “Fyerja”.

Ditën e sotme, gjatë protestës së organizuar nga shtetasi A. A., përpara Bashkisë Maliq, ky shtetas kanosi dhe fyeu shtetasit Xh. Sh., A. B., I. R., S. Xh., Dh. Ç. dhe E. Xh., me profesion gazetarë, të cilët ishin të pranishëm në protestë në ushtrim të detyrës së tyre.

Materialet procedurale iu referuan Prokurorisë së Korçës, për veprime të mëtejshme.

Asociacioni i Gazetarëve të Shqipërisë ka dënuar sulmin ndaj gazetarëve që po mbulonin në terren protestën kundër shkrirjes së Bashkisë së Maliqit. Gazetarët u sulmuan dhe u penguan gjatë ushtrimit të detyrës nga organizatori i protestës, Arjan Asimi, i cili i akuzoi mediat si “të shitura” dhe “në shërbim të pushtetit”.

AGSH e cilëson të papranueshme çdo formë intimidimi, fyerjeje apo dhune ndaj gazetarëve, duke theksuar se e drejta për të protestuar nuk mund të cenojë të drejtën e medias për të raportuar lirisht.

Shoqata kërkon nga Policia e Shtetit që të dokumentojë plotësisht ngjarjen, të verifikojë denoncimet e gazetarëve dhe të marrë masat e parashikuara nga ligji.

“Asociacioni i Gazetarëve të Shqipërisë (AGSH) shpreh shqetësim serioz për incidentin e ndodhur gjatë një proteste të zhvilluar në Maliq, ku gazetarët që po raportonin nga terreni janë penguar dhe sulmuar gjatë ushtrimit të detyrës.

Sipas dëshmive të gazetarëve të pranishëm, organizatori i protestës, Arjan Asimi, ka ndërhyrë në momentin kur ata po intervistonin qytetarë pjesëmarrës në protestë, duke ndërprerë intervistat dhe duke i akuzuar mediat si “të shitura” dhe “në shërbim të pushtetit”. Situata më pas është përshkallëzuar me ofendime dhe përplasje fizike, duke detyruar gazetarët të ndërpresin raportimin dhe të largohen nga protesta.

AGSH e konsideron të papranueshme çdo formë intimidimi, fyerjeje, kërcënimi apo dhune ndaj gazetarëve, pavarësisht se nga kush ushtrohet ajo dhe pavarësisht bindjeve apo përkatësive politike të personave të përfshirë.

Protesta është një e drejtë demokratike, por po aq themelore është e drejta e gazetarëve për ta raportuar atë lirisht, pa u penguar, fyer apo sulmuar. Pakënaqësia ndaj mënyrës se si një media raporton nuk mund të shërbejë në asnjë rrethanë si justifikim për agresion ndaj punonjësve të medias.

Gazetarët e përfshirë në incident i janë drejtuar Komisariatit të Policisë Maliq. AGSH u kërkon Policisë së Shtetit dhe autoriteteve kompetente të dokumentojnë plotësisht ngjarjen, të verifikojnë me seriozitet denoncimet e gazetarëve dhe të marrin masat e parashikuara nga ligji.

AGSH u bën thirrje gjithashtu organizatorëve të protestave, përfaqësuesve politikë dhe çdo personi publik që të respektojnë punën e gazetarëve dhe të garantojnë që aktivitetet publike të jenë mjedise të sigurta për raportimin e lirë”, shkruan AGSH.