Risjellja e kësaj kërkese duket e motivuar pikë së pari nga mosorganizimi dhe mospërgatitja e Partisë Demokratike për të dalë në zgjedhjet parlamentare.
Pavarësisht arsyeve që përligjin kërkesën e opozitës, ligjet në fuqi parashikojnë shtyrjen e datës së zgjedhjeve vetëm nëse plotësohet një kusht i vetëm: futjen e vendit në luftë brenda tre muajve që mbeten deri në datën e votimit.
Të paktën, kjo është ajo që thotë Kushtetuta, e cila sanksionon gjendjen e luftës, si të vetmen arsye për të shtyrë përtej katër viteve mandatin e skaduar të një qeverie.
Nëni 65 i Kushtetutës specifikon se “Kuvendi zgjidhet çdo 4 vjet. Mandati i Kuvendit fillon me mbledhjen e parë të tij pas zgjedhjeve dhe përfundon në të njëjtën datë të të njëjtit muaj të vitit të katërt nga data e mbledhjes së parë. Në çdo rast, Kuvendi qëndron në detyrë deri në mbledhjen e parë të Kuvendit të ri të zgjedhur”.
Është neni 66, ai që specifikon përjashtimet nga ky rregull. “Mandati i Kuvendit zgjatet vetëm në rast lufte dhe për aq kohë sa vazhdon ajo. Kur Kuvendi është i shpërndarë, ai rithirret vetiu”. Kushtetuta nuk njeh asnjë arsye tjetër për shtyrjen e zgjedhjeve.
Nga ana tjetër, afati i mbajtjes së zgjedhjeve përcaktohet qartë në Kodin Zgjedhor. Neni 8 i këtij Kodi përcakton se: “Zgjedhjet e përgjithshme për Kuvendin apo për njësitë e qeverisjes vendore zhvillohen njëherësh në të gjithë territorin e vendit brenda periudhës që shtrihet nga 15 marsi deri më 30 qershor ose nga 15 shtatori deri më 30 nëntor”.
![kushtetuta](http://www.shqiptarja.com/foto/277564.jpg)
(Neni kushtetues që ndalon shtyrjen e zgjedhjeve)
Me zgjedhjet e vitit 2013 që u zhvilluan në datën 23 qershor, në përputhje me specifikimet e Kushtetutës dhe të Kodit Zgjedhor, harku kohor për mbajtjen e këtyre zgjedhjeve të përgjithshme shtrihej nga 15 marsi në 30 qershor, e Presidenti Nishani dekretoi nëntë muaj përpara përfundimit të mandatit datën e zgjedhjeve në 18 qershor.
Në këto kushte, vetëm dorëheqja e papritur e kësaj qeverie (çka do të afronte datën e zgjedhjeve) apo shpallja e luftës nga ana e Shqipërisë apo nga ana e një shteti të dytë ndaj Shqipërisë, mund të ndryshojë 18 qershorin si data në të cilën shqiptarët do të votojnë për mandatin e ardhshëm qeverisës.
Redaksia Online
l.q/Shqiptarja.com
![](https://www.shqiptarja.com/template/img/sh_logo1.png)