Thaçi në Slloveni, mbështetje për integrimin e Kosovës në BE

Zëvendëskryeministri i parë dhe ministri i Jashtëm i Kosovës, Hashim Thaçi, zhvilloi sot një takim me homologun slloven, Karl Erjavec.
Sipas KosovaPress, Erjavec dhe Thaçi thanë se Kosova dhe Sllovenia kanë bashkëpunim të mirë politik e ekonomik dhe se do të punojnë ngushtë për procesin e integrimit të Kosovës në BE.
"Kosova e sheh Slloveninë si partner të rëndësishëm ekonomik dhe ne po angazhohemi që të rrisim edhe më shumë këtë bashkëpunim. Kemi mirëpritur investimet në telekomunikacion, në sektorin ajror, bankar dhe prania e bizneseve sllovene e pasuron tregun e Kosovës", tha Thaçi.
Kosova dhe Sllovenia duhet të zhvillojnë konsultime të rregullta politike në nivel të Ministrive të Punëve të Jashtme, u shpreh Thaçi, sepse shkwmbimi i rregullt i pikëpamjeve dhe përvojave në çështjet dypalëshe, rajonale dhe evropiane, sipas tij, është një kontribut shumë i rëndësishëm në forcimin e mëtejshëm të marrëdhënieve të mira ndërmjet Kosovës dhe Sllovenisë.
Ndërsa, zëvendëskryeministri slloven, Karl Erjavec, tha se Sllovenia me përvojën e saj po e mbështet Kosovën përmes projekteve të binjakëzimit të BE-së, si në fuqizimin e burimeve njerëzore në procesin e integrimit në BE, ashtu edhe në reformën e administratës publike.
"Sllovenia është njëri prej shteteve më mbështetës të politikave të zgjerimit të BE-ë për të gjitha shtetet e rajonit. Vazhdimi i procesit të zgjerimit në drejtim të Ballkanit Perëndimor përbën prioritet për politikën tonë të jashtme dhe unë ia rikonfirmova homologut tim, Thaçit, edhe njëherë përkrahjen e Sllovenisë për integrimin e Kosovës në BE dhe anëtarësimin e saj në organizata rajonale dhe ndërkombëtare", tha Erjavec, duke shtuar se e vlerëson lart edhe punën e Qeverisë së Kosovës në përmbushjen e detyrimeve të saj që lidhen me MSA-në.
Politika e jashtme e Sllovenisë e mbështet përmbylljen e procesit të MSA-së me Kosovën dhe liberalizimin e vizave për qytetarët e Kosovës./atsh/