Thirrja e deputetit të PS: Iniciativë ligjore për vendosjen e automateve që shpëtojnë jetë në çdo familje nga energjia elektrike

TIRANË- Duke marrë shkak nga tragjedia në Fushë-Arrëz ku humbën jetën nëna me 2 vajzat pasi ranë në kontakt me energjinë elektrike, Deputeti Benet Beci në komisionin e Veprimtarisë Prodhueseka kërkuar iniciativë ligjore për vendosjen e automateve që shpëtojnë jetë në çdo familje. Në komisionin e Veprimtarisë Prodhuese, deputeti thotë se kjo duhet të shndërrohet në një detyrim ligjor, duke propozuar edhe mundësinë që kjo gjë të realizohet nga investimet publike që mbulojnë kompanitë përgjegjëse.

“Tragjedinë e rëndë që ndodhi në familjen Kola në Fushë Arrëz e diskutova sot në komisionin e Veprimtarive Prodhuese. Ngjarja ka të bëjë me humbjen e jetës së tre anëtarëve të një familjeje si rezultat i rënies nën tension. I kërkova komisionit që të nisim një iniciativë ligjore për vendosjen e automateve që shpëtojnë jetë në çdo familje. Të jetë detyrim ligjor, por dhe të shohim mundësinë që kjo të realizohet nga investimet publike që mbulojnë kompanitë përgjegjëse. Gjeta mbështetjen e Kryetarit dhe anëtarëve të komisionit për këtë iniciativë, si dhe shprehjen e tyre të keqardhjes për këtë fatkeqësi”, shprehet Beci.

Kjo kërkesë për këtë nismë ligjore vjen pas tragjedisë së regjistruar në 28 maj në Fushë Arrëz të Pukës, ku humbën jetën nëna Prendusha Kola, 43 vjeç dhe Sidorela Kola, 19 vjeç e Emiljana Kola, 16 vjeç. Ka qenë njëra prej vajzave po lahej në dush dhe e ka zënë korrenti. E motra ka shkuar për ta shpëtuar dhe pas saj edhe e ëma, por fatkeqësisht nuk mundën të shpëtonin.

B.K./Shqiptarja.com

TAG:
• Emiljana Kola
• Sidorela Kola
• Prendusha Kola
• Benet Beci
• puke