THUMANË - Shqipëria është me sytë nga Thumana dhe Durrësi aty ku janë shënuar dhjetëra viktima si pasojë e tërmetit të fuqishëm që tronditi Shqipërinë në orët e para të mëngjesit të kësaj të marte. Në Thumanën e Fushë-Krujës u shemben thuajse totalisht tre pallate 5 katësh, duke lënë nën rrënoja njerëz të pajetë. E trishtë ishte pamja e ofruar teksa një gjyshe kishte ndërruar jetë nën rrënoja ndërsa në prehrin e saj mbante nipin e vogël, i cili fatmirësisht doli gjallë nga forcat e shpëtimit. Një grua, një burrë, një vajzë, një foshnje, e të tjerë, të cilët ende nuk janë identifikuar, u ndanë tragjikisht nga jeta nga lëkundjes e njëpasnjëshme sizmike, ajo më e forta 6.4 ballë.
Një lajm shprese vjen nga Thumana. Një grua është shpëtuar pas më shumë se 16 orëve nën rrënoja. Lindita Cara ishte nën rrënoja së bashku me bashkëshortin e saj i cili u shpëtua më herët dhe fëmijët, fati i të cilëve nuk dihet ekzaktësisht. Lindita Cara, ishte motra e një burri i cili tërhoqi vëmendjen sot, i cili me një kovë në kokë nisi kërkimet vetë për të shpëtuar motrën e tij.
Një familjar i banorëve të bllokuar nën rrënojat e banesave në Thumanë ka treguar për Report Tv se vijojnë të presin të shpëtohen edhe një çift bashkë me djalin e tyre që kishte ardhur nga Anglia dy ditë më parë. Ai tha se nuk di asgjë për fatin e tyre ndërsa u shpreh se do të vijojë të presë për ta derisa të rrëzohet edhe guri i fundit.
"Kemi vëllanë nënë rrënoja Hajredin Çupi, bashkëshorten dhe djalin që ka ardhur nga Anglia. Jemi në pritje. Djali tjetër ndodhet në Spitalin Ushtarak jashtë rrezikut për jetën. Nuk dihet se në çfarë gjendje janë. Kemi ardhur këtu për 20 minuta nga Vora po nuk kemi komunikuar me to. Janë këputur shkallët dhe nuk kanë mundur të dalin. Tani ata i zënë rrënojat poshtë. Nuk kemi asnjë informacion akoma. Presim. Zoti e di atë punë se atë nuk e ka bërë robi. Nuk kemi ku të shkojmë. Kur të lëvizet edhe guri i fundit i pallatit ne këtu do jemi", u shpreh familjari.
Mikel Çupi ka dhënë shenja jete, pavarësisht 10 orëve të tmerrit nën rrënoja në një nga pallatet e shembura në Thumanë. Vëllai i tij është shpëtuar në orët e para të mëngjesit, ndërsa nuk dihet ende për fatin e prindërve të tyre. Mikel Çupi kishte vetëm dy ditë që kishte ardhur në Shqipëri pranë familjes së tij, nga Anglia ku edhe jeton.
Një tjetër familje deri më tani është pa asnjë informacion. Robert Vata ka arritur të shpëtojë, ndërsa motra e tij u nxor e pajetë. Ende nuk dihet asgjë për pjesën tjetër të familjes.
Një rastësi e trishtë ka bashkuar në ditën e tërmetit një polic me fatin e nënës së tij, e cila ka mbetur e bllokuar në banesën e saj në Thumanë, e cila është shembur si pasojë e tërmetit. Polici është pjesë e skuadrës së shpëtimit të Forcave speciale që prej mëngjesit të dërguar në Thumanë për të shpëtuar banorët e bllokuar. Ai është përfshirë në operacion për të shpëtuar pikërisht nënën e tij fati i së cilës ende nuk bëhet e ditur, por edhe të banorëve të tjerë.
9 orë nën rrënoja, një person është nxjerrë i gjallë nga forcat ushtarake. Ai kishte mbetur nën rrënoja që prej orëve të mëngjesit. Pas finalizimit me sukses të operacionit për shpëtimin e tij, ai është dërguar në spital për të marrë edhe ndihmën e parë mjekësore. I riu është djali i Bert Carës, 57-vjeçari që u shpëtua pak orë më parë, ndërkohë që nën rrënoja vijojnë të qëndrojnë nëna dhe tre fëmijë të tjerë të Carës.
Lëkundje të forta kanë shkaktuar dëme të mëdha edhe në fshatin Bubq pranë Prezës. Banesa e Besim Bardhit në këtë fshat është shkatërruar e gjitha. Fati ka dashur që çifti i bashkëshortëve që ndodheshin brenda të shpëtonin.
Një mision shpëtimi është realizuar LIVE në transmetim. Bert Cara 57-vjeç i cili kishte mbetur i bllokuar në rrënojat e katit të dytë në një pallat në Thumanë ka nxjerrë kokën teksa forcat ushtarake po gërmonin për të hequr barrierat bllokuese të cilat kanë mbuluar edhe të tjerë persona gjendja te cilëve ende nuk dihet.
Misioni për shpëtimin e tij ka zgjatur për disa minuta. Ai ka pësuar disa dëmtime në kokë, ndërsa duket se gjendja e tij shëndetësore është e rënduar. Ndërkohë të bllokuar nën rrënoja vijojnë të jenë gruaja dhe 4 fëmijët e tij.
"Bert Cara, ka gruan dhe katër fëmijët. Është rreth 57 vjeç, edhe gruan në një moshë ndërsa fëmijët nën 30-vjeç. Brenda i bllokuar është edhe Kastriot Cakoni bashkë me gruan Faten", u shpreh i afërmi i Carës.
Gjatë gjithë kohës familjarët e tij kanë qëndruar pranë forcave të ushtarake dhe janë përlotur, nga kjo situatë. Banori është transportuar me barrelë drejt spitalit, për të marrë edhe ndihmën e nevojshme mjekësore.
Në misionin për shpëtimin e jetëve në Thumanë janë angazhuar edhe familjarët e personave të mbetur nën rrënoja. Një prej tyre ka treguar se motra, nëna dhe mbesa e tij kanë mbetur të bllokuar nën rrënoja. Ai tha se nëna dhe mbesa nuk reagojnë.
"Kam motrën. Ajo reagon por nëna dhe mbesa jo. Tre veta janë brenda. Motra quhet Lindita Cara", u shpreh banori. Ai është afruar me një kovë në kokë pranë dhomës ku kanë mbetur të bllokuara familjaret e tij.
Kristian Preçi, është një djalë i ri i cili kishte dalë nga burgu vetëm pak ditë më parë. Fatkeqësisht ai u nda nga jeta si pasojë e tërmetit të fuqishëm që tronditi Shqipërinë në orët e para të mëngjesit të sotëm. Kristiani ishte banor i Thumanës, zonës që u godit më shumë nga tërmeti, me tre pallate totalisht të shembur, nën rrënojat e të cilëve u gjetën viktima, ashtu sikundër pati edhe lajme të mira për të shpëtuar brenda atyre rrënoja.
Por Kristiani nuk pati atë fat. Ai ndërroi jetë në Kurbin, pasi kishte dalë me makinën e tij nga paniku i krijuar nga tërmeti. Ka humbur kontrollin e automjetit dhe është përplasur për vdekje.
Avokati i tij tha se Preçi kishte vuajtur dënim duke qenë i pafajshëm. "Sot humbi jetën nga tërmeti Kristian Preçi banor i Thumanës, klienti im që fitoi pafajësinë pas 5 muajsh burgim të padrejtë. Ngushëllim familjarëve, qoftë i parajsës. Kristiani ishte një djalë i mrekullueshëm. Iku shpejt", shkruan avokati.
Ndërkohë një 32 vjeçar, Ersid Hoxholli, i ndjerë në panik pas tërmetit në tentativë për t'i shpëtuar lëkundjeve të fuqishme që u ndjenë, u hodh nga ballkoni i katit të tretë.
Një grua rreth është nxjerrë nga rrënojat e pallatit në Thumanë. Ajo është e qujatur Manjola dhe ka patur plagë të rënda por fatmirësisht ka reaguar dhe ka komunikuar. Ndërkohë po ashtu është shpëtuar edhe një burrë rreth 40-vjeç.
Fatkeqësisht nga rrënojat eshte nxjerrë i pajetë edhe trupi i një personi, ende të pa identifikuar. Kështu numri i viktimave vetëm në Thumanë shkon në 3.
Forcat e shpetimit po punojne me 4 fronte ndërhyrje.
Qyteti i Durrësit dhe i Thumanës janë dy zonat më të prekura nga tërmeti tragjik që ra orët e para të mëngjesit të sotëm. Në Thumanë janë shembur totalisht 3 pallate. Report Tv sjell pamjet e asaj çfarë ka mbetur nga pallatet e shembura. Ashtu siç shihet në foto në katin e fundit të njërit prej pallateve ka mbetur lartë vetëm dera që duke i ka rezistuar lëkundjeve.
Në Thumanë, ku është dhe zona më dramatike me pasojat më të mëdha, dyshohet që të paktën 7 persona të jenë nën rrënojat e pallateve të shembur. Sipas informacioneve nga terreni, ata kanë dhënë shenja jete pasi ka folur në tentativë për të kërkuar ndihmë. Forcat Speciale që ndodhen në terren janë duke punuar me kujdes të veçantë për të pasur fatin e mirë dhe për të nxjerrë të gjallë personat nën rrënoja. Deri më tani në Thumanë të Fushë-Krujës dy gra u nxorrën të pajeta, të zëna poshtë nga pallati i shembur, ndërsa janë shpëtuar deri më tani 5 persona, të cilët kanë mundur t'ia hedhin, duke dalë gjallë nga rrënojat. Jo vetëm dëme fizike, të gjithë po kalojnë momente të vështira edhe psikologjike në këtë gjendje shoku që ka prekur gjithë vendin pas lëkundjes së fortë sizmike në 03:55 të mëngjesit, 6.4 ballë. Burime për Report Tv bëjnë me dije se tre emrat nga personat që janë përgjigjur janë, Çimi, Pëllumb dhe zonja me emrin Mira.
Në Thumanë është situata më dramatike. Tre pallate të shembura, nga rrënojat e të cilëve deri më tani janë nxjerrë dy gra të vdekura.
.jpg)
Të tjerë banorë janë nxjerrë të gjallë, siç dëshmohet edhe në këtë foto. Një grua e gjakosur, e lënduar, e përlotur dhe e traumatizuar nga tërmeti, teksa të tjerë i qëndrojnë afër për ta qetësuar. Ndërkohë vijojnë kërkimet nën rrënoja për të gjetur të tjerë persona.
.jpg)
Në Thumanë është situata më dramatike nga lëkundjet e njëpasnjëshme të tërmetit që prekën Shqipërinë, ku më i fuqishmi ishte 6.4 ballë.
Në Thumanë për fat të keq dyshohet të ketë përsona nënë rrënoja, pasi janë shembur tre pallate. Fëmijë, të moshuar, gra e vajza, janë zënë nënë rrënoja teksa kanë qenë në gjumë dhe nuk e kanë ndjerë tërmetin e rënë në orën 03:55 të mëngjesit të së martës.
Lajme të tjera
-
Kërkojnë akses në rrugën Thumanë-Kashar, banorët protestë para Kuvendit
2 Shtator, 21:54 -
Banorët në protestë për aksin Thumanë- Kashar, tentojnë të bllokojnë autostradën! Policia hedh gaz lotsjellës
13 Gusht, 18:44 -
Makinat përplasen ‘kokë me kokë’ në aksin Fushë-Krujë-Thumanë, një nga mjetet përfundon mbi barrierë! Një i plagosur
12 Gusht, 09:22 -
Drejtori i Rrugores, Altin Qato qëllon me shpullë të riun, pezullohet nga detyra! Policia: Kundërshtuan dhe ofenduan efektivët
2 Gusht, 22:17 -
Sherr për pronën në Kurbin, kushërinjtë qëllojnë me armë ndaj njëri-tjetrit, 3 të plagosur! 4 të arrestuar, mes tyre polici që përdori armën e shërbimit
26 Korrik, 16:13 -
Krujë/ Zbulohet një parcelë me kanabis në Thumanë, arrestohet 42- vjeçari
19 Korrik, 09:58 -
Në mes të arave me misër, droni zbulon parcelat me drogë në Krujë
14 Korrik, 11:19 -
Hapet aksi Thumanë-Kashar, me pagesë 2.1 euro për mjet! Rama: Shumë shpejt fillon rruga e Ndroqit dhe zgjerimi i Tiranë-Durrës
30 Qershor, 20:18 -
Protestoi e vetme më 8 Mars për banesën e dëmtuar nga tërmeti! Gruaja nga Thumana kalon natën para bashkisë! Ministria i premton fondin e rikonstruksionit (VIDEO)
9 Mars, 11:04
-
Krujë/ S'i japin fondin për të rikonstruktuar shtëpinë e dëmtuar nga tërmeti, gruaja e vetme proteston për 8 mars te shkallët e bashkisë
8 Mars, 21:06
-
VIDEO/Hidhte mbetje në rrugë, gjobitet me 50 mijë lekë drejtuesi i një makine në Fushë-Krujë
18 Janar, 13:41 -
VIDEO/ Kruja dhe Fieri mbulohen nga mjegulla e dendur! Fushëpamja në rrugë, tepër e kufizuar! Vështirësi në qarkullimin e automjeteve
8 Dhjetor 2023, 09:00
